كل مربية بقلم زيزي
كل مربية كنت بجيبها كانت بتمشي بعد ما تقابل جوزي لأول مرة وفي الآخر ركبت كاميرا خفية واكتشفت الحقيقة اللي قلبت حياتي كلها.
أنا أم لبنتين صغيرين مريم عندها خمس سنين وليلى عندها تلات سنين.
بعد سنين قعدة في البيت معاهم، قررت أرجع أشتغل تاني. كنت محتاجة أحس إني لسه ليا حياة برا الطبخ والغسيل وصوت الكرتون اللي شغال طول اليوم.
جوزي كريم شغله واخده بالكامل.
مدير في شركة كبيرة، دايم السفر، وحتى لما بيكون موجود في البيت يبقى قافل على نفسه أوضة المكتب وماسك اللابتوب.
عشان كده بدأت أدور على مربية أطفال.
كلمت مكتب توظيف مشهور، وبعد يومين بعتولي أول مربية مدام هناء.
ست شيك جدًا، شكلها محترم وكلامها هادي، والبنات ارتاحولها بسرعة.
أخيرًا حسّيت براحة.
رجعت شغلي وأنا مطمنة إن البيت في أمان.
بعد تلات أيام، كريم رجع من سفر وقت الضهر.
كان أول مرة يشوف فيها مدام هناء.
فاكرة إني كلمته وأنا في الشغل وسألته بهزار ها؟ مدام هناء عدّت الاختبار؟
ضحك ضحكة خفيفة وقال آه شكلها محترمة.
قفلت المكالمة وأنا مرتاحة.
لكن لما رجعت البيت بالليل لقيت مدام هناء واقفة عند الباب، ماسكة شنطتها، ووشها شاحب بشكل غريب.
أول ما شافتني قالت بسرعة أنا آسفة يا مدام ريم عندي ظروف ومش هقدر أكمل.
اتصدمت.
ظروف إيه بس؟ حصل حاجة؟ البنات ضايقوكي؟
هزت راسها بسرعة لا لا البنات زي الفل.
طب في إيه؟
بصت نحية أوضة المكتب اللي فيها كريم وبعدها بلعت ريقها وقالت سامحيني أنا لازم أمشي.
ومشيت.
وقفت مكاني مستغربة جدًا، بس قولت يمكن فعلًا عندها مشكلة.
المكتب بعت بعدها مربية تانية اسمها أمينة.
ست كبيرة شوية، طيبة جدًا، وكانت دايمًا تضحك مع البنات.
الأسبوع كله كان عادي لأن كريم كان بيرجع متأخر وهي بتمشي قبل ما يوصل.
لحد يوم السبت.
اضطريت أنزل الشغل كام ساعة ضروري، وسيبت البنات معاها.
كريم كان موجود في البيت، بس كالعادة قافل على نفسه بالمكتب.
رجعت بعد المغرب ولقيت أمينة خارجة بسرعة وهي شبه منهارة.
حتى إسدال الصلاة بتاعها كان واقع منها على الأرض.
جريت وراها مدام أمينة! في إيه؟ حصل حاجة للبنات؟
بصتلي بخوف غريب وقالت خدي بالك من بيتك يا بنتي
وركبت أول تاكسي ومشيت.
قلبي وقع.
دخلت البيت أجري لقيت البنات قاعدين بيتفرجوا على الكرتون عادي جدًا، وكريم في المكتب ولا كأن فيه حاجة حصلت.
سألته إيه اللي حصل بينك وبين المربية؟
رفع عينه من اللابتوب ببرود ولا حاجة. الست شكلها تعبانة نفسيًا.
حاولت أقتنع لكن جوايا كان فيه حاجة غلط.
ورغم كده، جبت مربية تالتة.
واسمها سمر.
ودي ما كملتش حتى أربع أيام.
أول ما شافت كريم اختفت تاني يوم الصبح وبعتت رسالة للمكتب إنها مستحيل
ساعتها عرفت إن الموضوع مش صدفة.
في حاجة بتحصل أول ما أي مربية تقابل جوزي.
وفي الليلة دي وأنا نايمة جنب كريم، فضلت باصة للسقف وسؤال واحد بيلف في دماغي
هو بيعمل فيهم إيه؟!تاني يوم صحيت وأنا مصدعة من التفكير.
فضلت أبص لكريم وهو نايم جنبي هادي جدًا، طبيعي جدًا، كأنه معملش أي حاجة.
بس جوايا كان بيقولي إن فيه سر.
الموضوع ما بقاش مجرد صدفة.
تلات مربيات يمشوا أول ما يشوفوه؟ أكيد فيه حاجة بتحصل.
لكن إيه؟
كريم عمره ما كان عصبي، ولا صوته عالي، ولا حتى قليل الذوق مع حد.
بالعكس أي حد يشوفه يقول ده راجل محترم ومثالي.
وده اللي كان مخليني محتارة أكتر.
فضلت يومين أفكر، وفي الآخر قررت أجيب مربية رابعة بس المرة دي وأنا مركبة كاميرات صغيرة في الصالة والمطبخ والممر.
المربية الجديدة كانت بنت اسمها ندى.
صغيرة شوية، مرحة، والبنات حبوها بسرعة.
وأنا بعرّفها على البيت، قالتلي بابتسامة متقلقيش يا مدام ريم، أنا بحب الأطفال جدًا.
ابتسمتلها لكن جوايا توتر غريب.
اليوم اللي بعده، كنت في الشغل، وعارفة إن كريم هيرجع البيت الضهر شوية.
إيدي كانت بتترعش وأنا بفتح تطبيق الكاميرات.
شفت ندى قاعدة على الأرض بتلعب مع البنات.
وبعدين باب الشقة اتفتح.
كريم دخل.
وقف يسلّم على البنات، وبعدها بص لندى بابتسامة هادية أهلًا.
ندى قامت بسرعة أهلًا بحضرتك.
كنت مركزة في الشاشة لدرجة إني نسيت النفس.
كريم حط شنطته وبعدين قال حاجة غريبة جدًا
ممكن نتكلم دقيقة؟
قلبي دق بسرعة.
ندى باين عليها التوتر، بس هزت راسها وراحت وراه ناحية المطبخ.
كنت سامعاهم من الكاميرا بالصوت.
كريم سكت ثواني وبعدها قال بهدوء
أنا عارف إن الكلام اللي هقوله هيبان غريب بس لازم تسمعيني للنهاية.
ندى بصتله باستغراب اتفضل.
كريم طلع ظرف صغير من جيبه وحطه قدامها.
وقال ده مرتب ٣ شهور كاملين مقدم.
ندى اتصدمت ليه؟
رد بصوت هادي جدًا لأنك هتمشي النهارده.
أنا شهقت وأنا ببص للشاشة.
إيه ده؟!
ندى قامت واقفة يعني إيه؟ أنا عملت حاجة غلط؟
كريم هز راسه لا. بس مينفعش تفضلي هنا.
ندى بدأت تتوتر أنا مش فاهمة.
ساعتها كريم قال الجملة اللي جمدت دمي
أي حد بيقرب من البيت ده بيتأذي.
سكتت مكاني وأنا حاسة إن قلبي وقف.
ندى رجعت خطوة لورا حضرتك بتخوفني.
كريم بص حواليه كأنه بيتأكد إن البنات مش سامعين وبعدها قال بصوت أوطى
من شهرين، واحدة اشتغلت هنا واتعرضت لحادث وهي مروحة. والتانية اتسرق بيتها بعدها بأيام. والتالتة جالها تهديدات غريبة.
ندى وشها قلب أبيض إيه علاقة ده بالشغل هنا؟
كريم رد بسرعة معرفش بس كلهم كانوا شغالين عندنا.
أنا بقيت مش فاهمة أي حاجة.
ندى قالت بخوف حضرتك قصدك إن حد
كريم ما ردش.
وبعدين فجأة، رفع عينه مباشرة ناحية الكاميرا المستخبية فوق الرف.
واتجمدت
