روايه ظنوا أن ابنتهم فقيرة بقلم الهواري

حطيت رجل على رجل، وبصيت في وشهم واحد واحد وسايباهم يتخنقوا في صمتهم.
شيرين حاولت تلم نفسها بسرعة وقالت بتوتر وهي بتضحك ضحكة ناشفة إنتي بتقولي إيه؟ شركة إيه؟ إنتي شكلك تعبتي من القعدة في المستشفى الشهر اللي فات.
ابتسمت ابتسامة هادية بس تقيلة لا يا شيرين أنا تعبت من الكدب بس. أصل الشركة اسمها الشرق للتطوير الزراعي صح؟ ولا أقولك رقم السجل التجاري كمان؟
القلم الدهب وقع من إيد أمي على الترابيزة.
ياسر سكت وسكوت ياسر ده عمره ما كان عادي.
قومت بهدوء، وفتحت الشنطة بتاعتي، وطلعت ملف رفيع وحطيته قدامهم.
ده مش بس اسم الشركة ده كمان عقد مبدئي بينك وبينهم يا شيرين متوقع من أسبوعين. وده تحويلات على حسابك تثبت إنك خدتي عربون.
شيرين صوتها بدأ يعلى إنتي بتتجسسي عليا؟!
ضحكت ضحكة خفيفة لا أنا بس لما قررت أفكر في ال 72 ساعة فكرت صح.
بصيت ناحية أمي وقلت تعرفي يا ماما؟ الأرض اللي قولتي

عليها ملهاش لازمة الشركة دي عرضت فيها 180 مليون جنيه. مية وتمانين مليون.
الصمت اللي حصل المرة دي كان تقيل لدرجة إن صوت التكييف بقى عالي.
أمي قعدت على الكرسي ووشها بقى أصفر مية كام؟
قربت منها شوية، وقلت بهدوء 180 مليون يا ماما مش 900 جنيه اللي طلبتهم منك وإنتي قلتيلي فقرك اختيارك.
عينها دمعت بس المرة دي مش تعاطف دي صدمة.
ياسر حاول يتكلم طيب ما إحنا أهل وكل حاجة تتقسم
قاطعته وأنا ببصله بثبات أهل؟ وسكت لحظة الأهل دول اللي بيجوا المستشفى في المطر ومعاهم فلوس متكرمشة ويقولوا هبيع دهبي عشانك مش اللي يقفلوا السكة في وشك.
ولأول مرة لفيت ناحية ياسمين.
كانت واقفة على الباب واضح إنها سمعت كل حاجة وعينها مليانة خوف.
مشيت ناحيتها، ومسكت إيدها، ووديتها تقعد على الكرسي الكبير مكان شيرين.
شيرين صرخت إنتي بتعملي إيه؟!
قلت بهدوء بعرفكم بس مين الهانم بجد.
وبعدين فتحت الملف التاني
ده بقى يا ياسر شوية ورق صغيرين كده فيهم شوية توقيعات حلوة منك على شوية نصب بسيط في أراضي ناس غلابة في الصعيد.
ياسر وقف فجأة إنتي بتهدديني؟!
رفعت عيني في عينه لا أنا بعرفك إن أنا مش نورا بتاعة زمان.
بصيت لأمي والبروش الألماس اللي ضاع؟
طلعت علبة صغيرة من الشنطة وفتحتها.
لقيته في درج مكتبك يا ماما. كنتي مخبياه كويس بس مش كفاية.
أمي بقت بتترعش إنتي إنتي بتعملي فينا كده ليه؟!
خدت نفس طويل وقلت بصوت واطي عشان أنا تعبت.
سكت شوية تعبت أكون الغلطة اللي بتدارى والبنت اللي بتتكسفوا منها واللي لما تقع محدش يسأل فيها.
بصيت لياسمين غير دي.
وقفت، وقولت بوضوح الأرض مش للبيع غير بشروطي أنا. وال 54 مليون جنيه اللي كسبتهم دول مش هيتصرفوا عليكم.
عيونهم اتوسعت كام؟!
ابتسمت أيوه 54 مليون. ورقة اللوتاري كانت في جيبي وأنا بكلمكم من المستشفى بس كنت مستنية أشوف مين فيكم يستاهل.
سكتت وبعدين قلت
والنتيجة ظهرت.
قربت من ياسمين، وحطيت في إيدها كارت ده حساب جديد باسمك فيه مليون جنيه كبداية. ومكتب استشارات قانونية هيخلصلك كل حاجة تخصك ولو حابة تسيبي ياسر هتسيبيه وانتي مرفوعة الرأس.
ياسر صرخ إنتي بتخربي بيتي!
بصيتله ببرود هو كان بيت؟
وبعدين مشيت ناحية الباب ووقفت لحظة قبل ما أخرج.
لفيت وبصيت لهم آخر مرة أنا هسافر وهبدأ من جديد. بس قبل ما أمشي الملفات دي كلها نسخة منها عند محامي ولو حد فكر يقرب لياسمين أو يحاول يلعب معايا هتبقى آخر مرة يشوف فيها الشمس.
فتحت الباب
والهوا دخل بقوة.
المطر كان لسه بينزل بس المرة دي كان شكله مختلف.
وأنا نازلة السلم حسيت لأول مرة إن رجلي خفيفة.
ورايا عيلة كانت بتعاملني كأني ولا حاجة.
وقدامي حياة أنا اللي هختارها.
مشيت من غير ما أبص ورايا.
لأن اللي عرف قيمته عمره ما يرجع لنقطة كان فيها رخيص.
الباب قفل ورايا بصوت تقيل الصوت ده كان كأنه بيقفل فصل كامل من عمري.
نزلت السلم وأنا سامعة صوت خناقتهم