لما كان عمري ١٤ سنه

لما كان عمري ١٤ سنة كان ياسين أخويا شرب حاجة مجهولة في حفلة وخلطها بكمية كبيرة من المسكنات عشان حد قاله إن ده هيخليه دماغه عالية أسرع 
الميكس ده دمر له الكبد في أقل من ٢٤ ساعة. جلده بقى لونه أصفر فجأة وبعدين عينيه.....
بدأ يرجع دم في الحمام وجسمه كله بيتنفض وبابا وماما طاروا بيه على المستشفى 
كنت قاعدة في صالة الانتظار مرعوبة لحد ما ماما سحبتني من إيدي للممر ومسكت كفوف إيدي بقوة وقالت لي
يا ملاك .. أخوكي محتاج فص كبد.. وإنتي الوحيدة اللي مطابقة ليه.
جسمي كله سقع ودمي هرب من عروقي 
عايزين تفتحوا بطني
ردت بسرعة وهي بتحاول تقنعني
الكبد بيجدد نفسه يا حبيبتي.. هي عملية واحدة وخلاص إنتي كده بتنقذي حياته بتهبيله عمر جديد.
بس أنا مش عايزة أعمل عمليات.. أنا خايفة

يا ماما.
ماما ضغطت على إيدي أكتر وصوتها بدأ يعلى 
أخوكي بيموت يا ملاك إنتي فاهمة بيموت وإنتي بإيدك تنقذيه!
بس أنا خايفة يجرالي حاجة.. أفرضي العملية فشلت افرضي أنا اللي مت
الدكاترة قالوا إنها أمان مفيش خطر عليكي.
طب ما هما قالوا إن ياسين ممكن ميعيشش! طالما هي أمان ليه هو حالته كده
وش ماما اتحول وبقت نظراتها قاسية
أخوكي مرمي جوه بيصارع الموت عشان غلطة طيش غلطة واحدة هتدفع تمنها عمره.. وإنتي واقفة هنا بتفكري في نفسك
دموعي نزلت غصب عني 
كنت طفلة عندها ١٤ سنة وماما بتبص لي كأني مجرمة أو وحش عشان بس خايفة من المشرط والعمليات.
قلت بصوت مخنوق أنا مش بفكر في نفسي أنا بس مرعوبة.
قالت لي بحدة 
خافي براحتك بس اعملي اللي عليكي.. ده حق العيلة والدم اللي بينكم.
في اللحظة دي بابا جه من عند أوضة ياسين شاف حالتي وخدني في حضنه وقال بهدوء 
يا ملاك يا بنتي.. أنا عارف إن الموضوع يخوف بس ياسين وقته بيخلص وقائمة الانتظار طويلة جدا.. هو ملوش غيرك.
سألته بكسرة طب ليه مش إنت أو ماما
عملنا التحاليل يا بنتي إحنا مش متطابقين.. مفيش غيرك ينفع.
كان لازم أفهم.. كان لازم أعرف من أول ما سحبوني للممر إن مفيش خيار تاني. دي عيلتي وده نظامها ياسين يطلب و ملاك تنفذ
أنا دايما كنت رقم 2 دي كانت الحقيقة المره
قلت بصوت واطي 
طب والسباحة أنا عندي بطولة الجمهورية الشهر الجاي.. المدرب قال إن فيه كشافين من نوادي كبيرة هيجوا وممكن أخد منحة دراسية بسببها.. دي فرصتي الوحيدة أثبت نفسي.
ماما اتنهدت بضيق ونفخت 
سباحة أخوكي بينتهي وإنتي بتكلميني في سباحة ونوادي
بابا بص لي بعيون تعبانة وقال 
الدكتور قال محتاجة ٦ أسابيع بس عشان ترجعي لحياتك.. ممكن البطولة دي تروح بس فيه غيرها السنة الجاية. عملية واحدة يا ملاك وكل ده ينتهي أخوكي يخف وإنتي جرحك يلم ونرجع نعيش طبيعي.. أوعدك مش هنطلب منك حاجة زي كده تاني أبدا....
كنت عايزة أصدقه.. كان نفسي أصدق إنها مرة واحدة وهتعدي وهنقذ أخويا وأرجع لحياتي ومافتكرش الكابوس ده تاني.
وعد يا بابا هي المرة دي بس
بابا حضنني بقوة 
وعد يا بنتي.. هي مرة واحدة بس.
ماما قربت مني وباست راسي وصوتها بقى حنين لأول مرة إنتي ملاكنا يا حبيبتي.. إنتي جيتي الدنيا دي عشان تنقذينا وعشان كده سميناك ملاك...
مبقتش عارفة أرد أقول إيه.. مكنتش حاسة إني ملاك كنت حاسة إني قربان.
قلت بضعف ماشي.. أنا موافقة.
جسم ماما كله ارتاح وبابا عصرني في حضنه