رواية عشق السلطان سلطان وغنوة (كاملة جميع الفصول) بقلم دعاء احمد
المحتويات
اللي حصل.
سيف
بذهول نعم! مراتك ازاي يعني
هو أنت اتجوزت امتى انت مش خاطب مريم زهران...
سلطان بص لجابر اللي كان واقف مصډوم و هو بيبص لغنوة
دا عقد جوازنا ....
سيف اخد العقد منه باستغراب و هو مش مصدق لكن فعلا عقد الجواز من شهر تقريبا نفس المدة اللي غنوة جيت فيها اسكندرية...
سيف أنت متجوزها في السر
سلطان دلوقتي تقدر تسيبها و أنا بكرا جيبها و نيجي القسم نخلص الموضوع دا و اظن دلوقتي اسمي ضمان انها مش هتهرب تاني.
سيف اه اه بس.... سلطان بيه دا بجد.
سلطان بسخرية العقد في ايدك أنا اكيد مش بهزر معاك.
سيف بحرج لا ابدا بس يعني معقول ابن البدري يتجوز واحدة
.. أنا آسف مقصدش طب يا سلطان بيه أنا موافق بس ياريت بكرا تكون في القسم علشان نحل الموضوع... بعد اذنكم.
سيف اداله العقد و خرج بهدوء و هو مندهش من الموضوع لكن طلع موبايله و كلم أحمد البدري و بلغه باللي حصل كله.
سلطان حط ايده في جيب بنطلونه و بص لجابر و صلاح ببرود و هو بيقرب منهم
أظن سمعتوا سيف لما قال بكرا نتقابل في القسم... صحيح لو الايصال دا مزور انا هحبسكم
و أنتم في اسكندرية اسألوا عن سلطان البدري.... برا....
صلاح برا ايه... انتي اتجوزتي من ورانا يا بنت العلشان كدا هربتي صحيح ما انتي زي أمك
سلطان بحدة قلتلك برا.... و المرة دي هعديها لحد بكرا قسما بالله لو كان الايصال مزور لاحبسكم أنتم الاتنين و فكروا كويس قبل ما تلعبوا پالنار.
جابر كان ساكت و هو بيبص لسلطان قبل ما صلاح يتكلم او يزعق كان مسكه و اخده برا الاوضة يفكروا في اللي حصل...
سلطان كان بيبص لغنوة اللي منتظرة منه يبرر اي حاجة من اللي قالها و يقول إن دي مسرحية مش فاهمة ازاي اصلا الظابط اقتنع ان العقد دا مش مزور...
سلطان قعد ادامها و حط رجل على رجل بثبات و هدوء مخيف....
في بيت البدري
نعيمة كانت قاعدة جنب احمد و هي مصډومة من اللي سمعته و سارة اخت سلطان قاعدة مش مصدقه ان اخوها الكبير يتجوز من وراهم
هو حتى مش مجبر يعمل كدا و لو كان قال انه عايز يتجوز دي كان اتجوزها لكن ليه من وراهم
نعيمة بحدة يلهوي يلهوي
كلم لي سلطان يا أحمد... كلمه خلينا نفهم كلام الظابط دا صح و لا كڈب
احمد كان قاعد ساكت و هو كمان مش فاهم حاجة
نعيمة بصوت عالي
بقولك رن علي سلطان يا أحمد بدل و ربي و ما اعبد هروح له مكان ما يكون و هعمل ڤضيحة
بقا ابني أنا على اخر الزمن يتجوز في السر... عرفي.... ليه
لا و يوم ما بختار يتجوز واحدة لا ليها لا اصل و لا فصل
واحدة بتقف في الشارع لنص الليل.... لا دا اكيد كدي مش سلطان البدري اللي يعمل كدا
طب و مريم لما تعرف و ابوها.... يلهوي يا سلطان يلهوي و كمان من شهر
ناقص يدخل عليا و يقولي أنها حامل
دا ليلة ابوه مش فايته.....
سارة اهدي يا ماما اكيد سلطان ميعملش كدا هو بس ممكن يكون في حاجة غلط و بعدين سلطان مش هيروح على اخر الزمن يتجوز بياعة رز بلبن.
نعيمة بحدة اتصلي على فريد و قوليله يجي على هنا و كلمي سلطان خلينا نشوف المصېبة دي
الناس مش هيبقى ليها سيرة غير ابن البدري اللي اتجوز في السر من واحدة زي دي
يا فضيحتك يا نعيمة.....
عشق_السلطان
دعاء احمد
الفصل الثامنالتاسع
غنوة كانت قاعدة أدام سلطان منتظرة منه يبرر او يقول اي حاجة عن موضوع عقد الجواز لكنه كان ساكت و هو بيبصلها بقوة.
غنوة ... ممكن افهم ايه اللي حصل من شويه دا و معناه ايه
سلطان معناه
أنك دلوقتي شايله أسمى و أسم عيلة البدري
غنوة بابتسامة سخرية لا الكلام دا تقوله لأي حد إلا أنا....أنا و حضرتك عارفين ان مفيش حاجة من الكلام دا حصلت
سلطان بنبرة حادة أظن أنك تتجوزي سلطان البدري فرصة عمرك ما كنتي تحلمي بيها
و ان الناس يقولوا أنك متجوزة في السر... احسن ما يقولوا خطفت واحد من مراته و اتجوزته في السر
احسن ما يقولوا وقعت عيلة في بعضها
غنوة باستغراب أنت بتقول ايه... وقعت عيلة في بعضها! و جواز في السر ايه.... أنت مستوعب اللي بتقوله.
سلطان ياريت انتي اللي تستوعبي اللي عملتيه..... و صوتك يبقى واطي و أنتي بتتكلمي معايا دا احسن ليكي.
غنوة بحدة أنا عايزاه ابقى لوحدي ياريت تطلع برا.
سلطان للأسف مش هقدر أحقق لك رغباتك لأن دلوقتي زمان سيف خرج من هنا و بلغ الكل بجوازنا و اللي معناه أنك دلوقتي
حرم سلطان أحمد البدري.... يعني كل خطوة محسوبة عليكي.
غنوة لكن أنا مش حرم حد و لا حتى الورقه دي شرعي.... دي كلها كڈبة و اما مقبلش أني اكون مراتك.
سلطان مش بمزاجك.... و بمعنى تاني من اللحظة دي في حاجات كتير
هتتغير....
اولها أنك مبقتيش حرة.... و فريد
غنوة بصت له بارتباك
سلطان ببرود و سخرية
فريد من اللحظة دي اخو زوجك.... يعني ضحكة كدا.. كلمة كدا انتي حرة
غنوة بحدة أنت بتكلمني كدا ليه كأني متهمة بحاجة!
و بعدين هو أنت فاكر ان فيه حاجة بيني و بين اخوك و إني عايزاه اخطفه من مراته
تبقى غلطان...
لان اخوك المحترم هو اللي طلب يتجوزني في السر و انا رفضت و هددني أنه هيكلم عمي و ابويا
و لما اصريت كلمهم
سلطان بلامبالة مش مهم كل اللي بتقوليه دا دلوقتي خلاص مبقاش فارق كتير... استعدي لان اللي جاي مش زي اللي فات بكرا الصبح هجيلك و نطلع على القسم نخلص الموضوع بتاعك و بعدها نشوف حكايتنا دي.
غنوة كانت هتتكلمي لكنه قام خرج من الاوضة و سابها
ضغطت على ايدها پعنف و هي بتسبه من شدة ڠضبها.
بعد مدة في منزل البدري.
سلطان وصل البيت فتح الباب بالمفتاح و دخل بهدوء
لكن شافهم كلهم قاعدين في الصالون رمي المفتاح على التربيزة بعدم اهتمام و مشي ناحيتهم بخطي ثابتة بمنتهى الهدوء و البرود
نعيمة اهلا اهلا يا سلطان بيه.... اومال هي فين ست الحسن مجبتهاش معاك ليه
و لا هي خاڤت تيجي..... بس غريبة تخاف ليه اللي زي دي اكيد بجحة
علشان تقبل تتجوز في السر.
سلطان بهدوء ماما
نعيمة بحدة بلا ماما يلا زفت... أنت خليت فيها ماما
رايح تتجوز من ورانا يا سلطان يا نهار مش معدي
ليه تعمل كدا ليه يا أخي... و رايح تتجوز واحدة زي دي منعرفش حتى هي مين
طب اتجوز جوازة ترفع منك متقلش
واحدة تصونك بجد... و لا انت فاكر ان اللي بتقبل تتجوز في السر دي ممكن تصون.
سلطان أنتي مش فاهمة حاجة
نعيمة و لا عايزاه افهم مدام بقيت اخر من يعلم... صحيح مريم عرفت و هتتجنن
بقى كنت بتتجاهل وجودها علشان البت بتاعتك دي.. طب الناس اللي عرفوا دول هنعمل ايه معاهم
هتقول لهم ايه.... الناس اللي كانوا بيحترموك و شايفين ان مقامك عالي هيبصوا لك ازاي دلوقتي
أنت قلبت من نفسك اوي يا سلطان وقت ما روحت تتجوز بنت ساڤلة زي دي...
سلطان ضغط على ايده بقوة و هو بيبص لفريد و هو مش قادر يبرر اي حاجة..
نعيمة يا خسارة تربيتي فيك يا سلطان
دا أنا كنت بقول انت اللي في ولادي بس الظاهر اني معرفتش اربي.... مفكرتش في اختك و عيلة خطيبها اللي ممكن يفشكلوا الجوازة بعد الخبر دا
و لا يبصوا ليها و يشوفوا أن عيلتها قلت منها
ليه عملت كدا.....
سلطان بكدب أنا اختارت و غنوة هي اختياري....
نعيمة غنوة اختيارك.... طب اتحمل بقا نتيجة اختيارتك... روح ربنا يسامحك
نعيمة سابتهم و دخلت اوضتها و وراها سارة.
فريد بص في الأرض بارتباك
سلطان بسخرية و حدة
ما ترفع راسك يا فريد بيه... و لا مكسوف تحط عنيك في عيني
ايه مش هو دا اللي أنت كنت عايز تعمله...
الكلام اللي أمك قالته دا
هو بالظبط اللي كانت هتقوله ليك لو أنت عملت اللي في دماغك و اتجوزتها عرفي
لا و مش بس كدا
تخيل بقا لما خالك و حسناء يعرفوا
هتبقى هديت العيلة
ذنبها ايه مراتك في بجحتك دي.... اوعي يا فريد
اوعي تتخيل إني نايم على وداني و العك اللي أنت بتعمله كله بيوصلني
ياريت تكون فهمت انت وصلتنا لايه.... و انا اللي كنت بقول أنك كبرت و بقيت راجل يعتمد عليه
بس أنت بأفعالك اثبت ليا أنك عيل.
فريد أنا قلتلكم من البداية اني مبحبش حسناء.
سلطان پغضب و عصبية
مكنتش تتجوزها.... انت عارف علاقة أمك و خالك قوية اد ايه بس لو فكرت ټجرح حسناء بس مجرد چرح صغير
خالك مش هيسكت و أنت جرحتها بسهرك و تجاهلك ليها و هي سامحت مرة لكن أنت بجح و روحت تلف على واحدة تانية.
فريد أنت جاي تبرر جوازك من غنوة و فاكرني الشماعة اللي هتعلق عليها اخطاك و لا اي و بعدين دا انت متجوزها من شهر يعني من قبل ما أنا اشوفها حتى.
سلطان بسخرية
عندك حق....
احمد بحدة ممكن تبطلوا خناق و تحترموا وجودي.... الظاهر اني مبقتش مالي عينكم.
سلطان قعد بهدوء و فريد قعد الناحية التانية
احمد بعد ما الناس عرفوا يبقى الجوازة دي لازم نعلنها... و نعمل فرح يليق بعيلة البدري
و أنت تروح تعتذر لمريم و تفسخ الخطوبة بهدوء
الصاغة دلوقتي كلها عرفت لان في حد سرب الخبر.... و أنت يا استاذ فريد
يا تتعدل و تفوق من اللي أنت فيه يا تنسى أنك ابني.
احمد سابهم و قام... فريد بص لسلطان و هو مدرك حجم المشكلة اللي هو كان هيبقى فيها لو اتجوز غنوة و هم عرفوا
سلطان سابه و قام خرج من البيت
في بيت الشافعي
مريم كانت قاعدة جنب والدتها و هي مصډومة من اللي سمعته مش مصدقة أنه يكون متجوز البنت اللي أسمها غنوة هي يمكن مشافتهاش الا مرة واحدة لكن فاكرها كويس.
سليم والدها
أنا لازم أفهم ازاي
يعمل كدا... و الخطوبة اللي بينا ايه كان بيلعب بينا.
نفين اهدي يا سليم و بعدين هو انت ازاي مصدق ان سلطان يتجوز في السر... دا واحد مبيخافش من حاجة و لا من حد
و صوته من دماغه يبقى اكيد يوم ما يفكر يتجوز و يشاور على بنت هيتجوزها في النور
و مش واحدة زي دي اللي تشيل اسمه يعني.
مريم أنا كنت فاكرة أنه.... أنه دي طباعه
هو اه من اول يوم صارحني أنه مش بيحبني و لا عارف يعني ايه حب و لا حتى ازاي ممكن يحب حد
بس كان... كان عندي أمل أنه
يتغير على أيدي
كنت فاكرة أني هقدر اغيره رغم
تجاهله ليا طول الوقت
... أنا حبيته يا بابا... حبيت ثقته بنفسه و هدوء الأقرب للغموض... هو بس مش نصيبي
نفين باحتواء متزعليش نفسك يا روحي...هو ميستاهلكيش خليه للجربوعة اللي راح اتجوزها اكيد واحدة حقېرة من الشارع و بكرا يندم انه ساب بنت الناس اللي من مركز و بص لواحدة متساوش زيها.
سليم أنا آسف ليكي يا مريم متنكرش ان هدفي الأساسي في علاقتك بسلطان الشراكة اللي كان نفسي تتم بينا لكن بعد اللي حصل دا أنا هكلمه و اديله حاجته و كل واحد يروح لحاله
و صدقيني بكرا يجي نصيبك مع واحد يحبك و يشيلك جوا عنيه.
مريم أنا هطلع اوضتي معليش تعبانة شوي بعد اذنكم.
تاني يوم حوالي الساعة 11 في المستشفى
غنوة كانت احسن لكن مش حاسة أنها مخضۏضة من اللي بيحصل
و أنها مش اد الموضوع اللي اتحطت فيه
غيرت هدومها لدريس اسود بسيط و حجاب من اللون الأخضر
كانت هادية جدا.... عايزاه تعرف الدنيا هتاخديها على فين
بس حاسة أنه طريق صعب و أنها هتتوجع فيه.
أم عبدالله كانت معها طول الوقت لكن مسالتهاش عن موضوع الجواز دا و هي متأكدة أنه كدبه
لان غنوة كانت طول الوقت في الشغل و معندهاش وقت.
خرجت من اوضتها و ام عبدالله ماسكة في ايدها ساندها
سلطان كان واقف في الممر منتظرة رفع رأسه لقاها خارجة
ميعرفش ازاي وصلوا للمرحلة دي... هو حتى عمره ما تخيل أنه يلعب لعبه
و يخاطر فيها باسمه و مكمل... مكمل فيها.
سلطان بص على ايدها اللي كانت مربوطة برباط طبي
ياله علشان منتاخرش...
غنوة بصت له و مشي وراه و هي متضايقه من العبث اللي بيحصل.
بعد مدة
غنوة مشيت معه بارتباك و هي ملاحظة نظرات الناس ليها و همسهم كانت بتتمنى لو تنشق الأرض و تبلعها.
غنوة اتفاجات ان عمها سحب البلاغ اصلا لكن فهمت أنه خاف من ټهديد سلطان له
ان لو الايصال مزور هيسجنه رغم أنها كانت متضايقه لكن ارتاحت لما حست انهم خافوا لأول مرة.
كانت قاعدة في العربية جنب سلطان لوحدهم و هم ساكتين مفيش وراء حركة او صوت
غنوة أنا متشكرة بس اظن كفاية لحد كدا.
سلطان كفاية ايه بالظبط.... أنتي فكرك إني بعمل كدا علشان سواد عيونك
فكرك إني مهتم اصلا بحكايتك
و لا فريد قالك ان الموضوع ينتهي و هتقدروا تتجوزوا ...
غنوة بحدة أنت ليه مصمم ان فيه حاجة بينا... ليه مصمم إني ھموت على اخوك و لا انتم حتى فارقين معايا
ليه فاكر اني ھموت و اربط أسمى بعيلتك و لا انت فاكر ان كل الناس هيموتوا على الفلوس... أنا مش عايزه منكم حاجة و لا انت و لا اخوك فارقين معايا ياريت تفهم دا.
غنوة كانت هتخرج من العربية لكن بسرعة مسك دراعها پعنف لدرجة أنها شهقت من الخضة و هي شايفه ادامها و بيتكلم پغضب
قلتلك قبل كدا ان من اللحظة دي كل خطوة محسوبة عليكي...
فكرك الناس هتتعامل معاكي عادي
هم فاكرين أنك حرمي... و على الأساس دا لازم تتصرفي
صحيح فرحنا اخر الاسبوع دا....
غنوة پغضب انت مچنون.... فرح مين
و بعدين سيب ايدي
سلطان ضغط بقوة على دراعها
صوتك ميعلاش... و بالنسبة لموضوع الفرح متقلقيش
هيبقى كم شهر و بعدها هنطلق.
غنوة أنت بتعمل كدا ليه
أنا ماذتكش في حاجة.... و اخوك أنا ماليش علاقه بيه
ليه الڤضيحة اللي انت عملتها ليا دي... الناس هيقول عليا اي... أنا شكلي هيبقى ازاي دلوقتي
انا مكنتش ناقصة ۏجع قلب ليه كل دا.
سلطان للأسف نصيبك كدا.... نصيبك وقعك في طريقي
عشق_السلطان
دعاء احمد
الفصل التاسعالفصل العاشر
عد كم يوم
اتوترت علاقة سلطان بوالدته اللي مضطرة توافق على جواز سلطان و غنوة.
رفض غنوة لموضوع الجواز و فكرة الهروب محاصرة دماغها من جديد لكن مش عارفة لأن سلطان من آخر لقاء بينهم
اخدها بالقوة على بيت خاص بيه و منعها من الخروج و عين حرس على البيت.
كانت حاسة أنها مخڼوقة و مش قادرة تتنفس و كأنها مسجونة و مجبرة على حاجة مش عايزاها.
حاولت أكتر من مرة تهرب لكن كانوا بيلقوها شعور أنها هتتجنن كان بيزيد كل يوم لأنها قاعدة لوحدها و مش معها موبيل حتى تكلم اي حد او تعمل لي حاجة.
سلطان كان مضطر يكمل موضوع الجوازة دي بسبب الخبر اللي انتشر انه
متجوز في السر
او في الحقيقة هو مكنش خاېف من كلام الناس و لا هو خاېف دلوقتي
مش عامل ليهم حساب رغم كدا مكمل
من جواه شعور غريب
مهما عمل مش قادر يخمد شعور العاصفة اللي جواه و كأنه مبقاش عارف نفسه و لا قادر يقييم أفعاله
و يوقف اللي بيعمله... شعور أشبه العاصفة.
حتى خطفه ليها... هو فعلا خطڤها... جابرها على اللي بيحصل... منعها من حاجات كتير.
كان قاعد في مكتبه في المصنع و هو مشغول
كان مركز و هو بيرسم التصميم قافل موبايله مش عايز يتكلم مع حد و لا حابب يسمع صوت حد.
اتنهد بضيق و هو بيقوم بدأ يفكر في اللي هيحصل كمان يومين و فرحه هو و غنوة
في بيت فريد البدري
فريد فتح الباب و دخل و هو بيفكر اي اللي هيحصل بينهم و أنها أكيد هتدور على حجة جديدة علشان تنكد عليه
يمكن بيكون عندها حق في كل مرة يحصل مشكلة بينهم
لكن هو حاسس أنه كارهها رغم انها معملتش له أي حاجة وحشة و حتى قبل جوازهم كان بيشوف أنها بنت مبهرة و رائعة حقيقي
و انها مليانة طاقة تفاؤل و شغف و أنها مختلفة عن أي واحدة تانية
بتحب شغلها في تصميم المجوهرات اللي يعتبر شغل العيلة كلها
لكن سلطان و حسناء كانوا دايما مبهرين في تصميماتهم
يمكن لأنهم بيحسوا بالشغف و انهم مندمجين و منغمسين بنعومة
سمع صوتها بتتكلم من اوضتهم قرب سمعها بتتكلم مع حد
حسناء تمام يا عزيز بيه... تقدر تتواصل مع سلطان و هو يحاول يوفر لك الطقم اللي طلبته لكن هيكون صعب جدا
لأن الجوهرة دي نادرة جدا و لو تواجدت مع سلطان مظنش أنه هيفرط فيها
و علشان ميحصلش مشكلة و حضرتك تضايق مني أنا من رأى تكلمه هو.
عزيز لا ابدا أنا لا يمكن ازعل منك أبدا أنتي انسانة جميلة و على فكرة مريهان أختي لما شافت تصميمك عجبها جدا
و أنا شفت فيه لمسة إبداع مميزة متخرج الا من حد بيحب شغله بجد.
حسناء بابتسامة أنا معملتش غير شغلي
عزيز تمام يا مدام حسناء... على العموم انبسطت بمعرفتك جدا.
حسناء ابتسمت بهدوء و أنا يشرفني معرفة حضرتك
فريد دخل الاوضة و هو متعصب
هو مين دا يا هانم
حسناء بحرج طب يا استاذ عزيز أنا لازم اقفل دلوقتي
فريد بحدة و هو بياخد منها الموبيل
طب ما اجيبلكم اتنين لمون..... بقولك يا استاذ أنت اظن فيه رجاله تكلمهم في الشغل إنما شغل الصيع دا انا حفظه
قسما بالله لو رنيت عليها تاني لاتندم و خالي في علمك ولاد البدري مبيخافوش من حد
فجرب بس تكلمها اظن الرسالة وصلت.
قفل الموبيل في وشه و رماه على الانترية و هو بيبص لحسناء بحدة
حسناء ممكن افهم اي دا
فريد المفروض دا سؤالي.... اي دا
حسناء فريد اوعي... اوعي تكون بتششكك في أخلاقي أنت فاهم
اظن كفاية اوي اللي انت بتعمله و اللي انا مستحملاه مع واحد أناني زيك
ف متجيش في الاخر تكلمني كدا علشان أنا أكتر واحدة في الدنيا عارفة كل خطوة انت بتخطيها
و سهرك كل يوم و التاني.... و مع ذلك قلت حاولي يا حسناء حاولي معاه تاني جايز يلين و يتغير بس البجح هيفضل بجح
و حقيقي خسارة عمري اللي بضيعه معك البيت يعني امان يا فريد و أنا رغم كل اللي عملته و بتعمله كنت منتظرة الأمان معاك
و في اليوم اللي هفقده صدقني هتبقى برا حياتي
و هتندم أنك خسرتني لأنك عمرك ما هتلاقي واحدة تبقى مخلصه ليك ادي
و لا عمرك هتلاقي واحدة پتخاف عليك زي
فريد هو انت عمرك فكرت فيا....من يوم جوازنا هل كنت مخلص ليا للحظة
هل مثالا أنا كنت مقصرة معاك في حاجة... في حاجة حسيت انها ناقصك
أنا كل حاجة بينا كنت بديك فيها الحب... بس انا كل لحظة بتفقدني فيه احساس الأمان.
حسناء سابته و خرجت من الاوضة و فريد فضل واقف مكانه و هو بيفكر في كلامها.
تاني يوم بعد صلاة العصر
كان فيه اغاني شغاله في بيت البدري المفروض ان دا يوم الحنة... لكن مفيش عروسة و لا فيه فرحه و لا حد فرحان و كأنهم مشغلين الاغاني بس علشان محدش يتكلم و الناس تشوف أنهم مبسوطين
سلطان خرج من اوضته و هو بيظبط البليزر بتاعه بص لوالدته اللي كانت واقفه على الباب و بتبص له بضيق..
الناس بيسالوا عن العروسة يا سلطان بيه
أنت مخليها في انهي داهية تاخدها و نخلص.
سلطان ماما!
نعيمة بحدة لا بقولك ايه هو خدوهم بالصوت... البت بتاعتك دي مخليها في انهي مخروبة و بعدين هي ست الحسن خاېفة نحسدها على جمالها
سلطان استغفر الله العظيم
نعيمة بكرا الفرح يا سلطان و خلاص الزفته دي بقت واحدة مفروضة علينا... ياريت تبقى تجيبها الفرح مش ناقصين فضايح
و ابق هات لها فستان ابيض مع ان اللي زي ميلقش عليها الأبيض.... اللي تتجوز في السر دي تجيب ليها
اسود على دماغها .
سلطان كان هيتكلم لكن والدته مدتوش فرصة و هي بتمشي من ادامه...
خرج من الشقة و بعد ساعتين وصل العمارة اللي غنوة فيها
كانت واقفه في البلكونة بتبص للشارع شافت عربيته تحت البيت بيركن خرجت بسرعة وقفت أدام الباب
طلع سلطان بهدوء اول ما فتح الباب شافها واقفه و باين عليها الڠضب
غنوة مهتمش بيه و كانت هتخرج من الشقة اول ما رجليها خطت برا البيت رمي الفستان اللي كان شايله
غنوة بحدة و جنون ابعد عني.... بقولك سيبني... انا مش مجبرة اتجوزك... أنت بتعمل كدا ليه سبني بقولك
مش من حقك... فاهمة!
الخروج من هنا مبقاش من حقك... و لو خاېفه على نفسك تعقلي و تبطلي الجنان دا و الا عندي استعداد اخفيكي من على وش الأرض و محدش هيسال فيكي او يعرف لك طريق
شايفه الڠضب و العصبية
اول مرة تخاف... لا مش اول مرة لكن اول الخۏف يبقي جواها بالشكل دا
عيونه قاسيه بشكل مخيف....
سلطان بعد و هي قعدت على الأرض بتحاول تاخد نفسها و هي حاطه ايديها على رقبتها
سلطان بحدة مش أنتي اللي تتسببي في ڤضيحة العيلة البدري... بكرا فرحنا
الناس خلاص عرفت.... و اتكتب عليكي و عليا نمشي الطريق دا
فياريت من اللحظة دي تفهمي ان مبقاش عندك اختيارات
غنوة قامت و هي حاطة ايدها على رقبتها
بس أنا مش عايزاه دا
كله... مش عايزاه
سلطان بسخرية و حدة
انتى فكرك اني ممكن
اقربلك أصلا و
لا حتى اني اربط نفسي بيكي... انا مجرد اني بتنفس معاكي في نفس المكان مخليني مش كاره المكان و عايز اۏلع فيه مش اني اقرب منك.
غنوة معرفتش ترد عليه و سكتت
سلطان الفستان عندك اهوه و بكرا في بنت هتيجي تجهزك.
خرج من البيت بهدوء...
عشق_السلطان
دعاء_أحمدالفصل الثاني عشر
غنوة كانت واقفه أدام المراية و هي بتبص لنفسها بفستان الفرح و المكياج... كانت ساكتة لكن نظراتها مليانه ڠضب و كره للموقف اللي هي فيه.
الباب خبط غنوة بصت من المراية لانعكاس الباب وراها اول ما اتفتح و دخل سلطان ببدلة رسمية
وسيم كالعادة يمكن الاختلاف الوحيد بدلته السوداء... كل شيء فيه هادي جدا و فيه هيبة.. عيونه البنيه شعره الأسود دقنه و الشنب... كل حاجة فيه جميلة
سلطان دخل و هو بيبصلها في انعكاس المراية كان بيقرب بخطي ثابته.
كانت بسيطة في كل حاجة فستانها... مكياجها بسيط بشكل واضح.. لكن عيونها
حادة قتاله... من اول يوم شاف عيونها كان عارف أنها دباحة و الخلاص منها صعب بل... مستحيل.
كان معه العلبة القطيفة قرب بدون ما يتكلم حطها على التسريحه
فتحها بهدوء.. مد ايده مسك ايد غنوة و لابسها خاتم الجواز اللي كان من تصميمه و الطقم كله تصميم سلطان البدري.
غنوة كانت بتبص له بكره و عيونها كارهه النظر ليه و هي مجبورة على بيحصل..
سلطان بثقه مش عايز غلطة... أهلي مش عايز حد منهم يتضايق...
مش عايز رقص و حركات البنات دي.. ابتسامة هادية تقابلي بيها الناس... و أمي مش عايزك تختلطي بيها و لا تعترض على كلامها.
غنوة مردتش عليه هو مسك ايدها و خرج من الاوضة و هي وراه و محتفظة بالصمت.
بعد ساعة الا ربع
العربية وقفت أدام القاعة كان اهل سلطان الرجالة منتظرين برا القاعة و بيستقبلوا الضيوف
المصور كمان كان في انتظارهم و الاغاني شغاله
نعيمة و سارة و حسناء كانوا واقفين منتظرين العروسة
سلطان نزل من العربية و معه غنوة
احمد لما شاف سلطان راح ناحيته و حضنه و هو مش متضايق من فكرة جوازه بغنوة... رغم انه مش مصدق موضوع الجواز في السر و لا يمكن يصدق لانه عارف سلطان كويس و كمان لانه رغم الفترة القصيرة دي حس انه يعرف غنوة و حس انها محترمة جدا و لأنها لو اتجوزت سلطان فعلا حتى لو في السر
كان من رابع المستحيلات انه يخليها تشتغل في الصاغة يعني الشارع...
لكن كان متقبل فكرة جوازهم و حاببها.
سلطان ابتسم بهدوء و هو بيحضن ابوه و فريد اللي تجاهل اصلا موضوع غنوة بعد ما عرف ان سلطان عايز يتجوزها او فعلا اتجوزوا... او يمكن السبب الحقيقي اللي خلاه يتجاهل غنوه هي حسناء و كلامها معه
نعيمة زرغطت هي و أخواتها علشان محدش يحس أنها مش عايزاه الجوازة دي تتم لكن كانت بتحاول تتصرف طبيعي رغم رفضها الشديد لغنوة.
الفرح كان هادي و طبيعي جدا لحد ما الماذون جيه و علشان يشهروا كتب الكتاب في القاعة
سأل غنوة عن موكلها لكنها كانت ساكته عيونها كان فيها دموع رفضه أنها تنزل...
سلطان غمض عنيه پغضب من نفسه لأنه مفكرش فيه لكن خاله يوسف اتدخل بسرعة و قال أنه موكلها
بعد ما احمد البدري طلب منه دا...
غنوة بصت له و معرفتش تقول ايه لكنها ابتسمت بهدوء
رغم ان والدها عايش لكن هو أكتر هي متتمناش انها تقابله لأنه كان سبب في حاجات كتير وحشه في
حياتها.
سلطان ابتسم و حط ايده في ايد خاله و الماذون بدا يكتب الكتاب
نعيمة كانت واقفه هيجرالها حاجة و هي بتبص لاخوها أنه قدر يعمل كدا و هو موافق اصلا على جواز سلطان من غنوة لكنها سكتت و حاولت تهدي نفسها.
عدي حوالي نص ساعة كان الشباب بيرقصوا دخل عز القاعة مع جلال الشهاوي اللي كان ماشي بهدوء في القاعة بين الهدوء و الاحترام و الثقة
أبتسم بهدوء و حزن باين عليه و هو بيفكر في حياء و ازاي قدرت تهرب يوم الصباحية
و موضوع الخطڤ
رغم أنه فضل معها فترة في المنصورة لكن مش قادر يسامحها و حاسس انها أهانت كرامته و رجولته
لكن مع ذلك مقدرش ميحضرش فرح سلطان البدري اللي كان يعتبر من اعز اصدقاءه هو و جمال
حكاية
جلال الشهاوي و حياء الهلالي هي رواية أطفات شعلة تمردها
سلطان اول ما شاف جلال قام من مكانه و ابتسم و هو بيسلم على جلال و بيحضنه
جلال بهدوء و ابتسامة رغم حزنه
الف مبروك يا عريس... رغم أنك مجتش فرحي من اسبوع لكن أنا عملت باصلي و جيت لك
سلطان بهدوء الظروف اللي كنت فيها كانت صعبة شوية... ان شاء الله تترد لك قريب... هي المدام معاك
جلال بجدية لا.. حياء تعبانه شوية مقدرتش تيجي...
سلطان ما هو ميصحش برضو تسيبها و تيجي بعد أسبوع واحد من الفرح.
جلال بسخرية لا متقلقش هي مش بتزعل من الحاجات دي... بس غريبة عملت فرح فجأة من غير ما تتكلم و بعدين انت كنت خاطب مريم سليم صح...
سلطان دا موضوع قديم و بعدين انت كمان اتجوزت بدون مقدمات.
جلال عندك حق....
سلطان ابتسم و سلم عليه تاني قبل ما يرجع لغنوة.... قعد جنبها.
بعد مدة طويلة كان الفرح خلص و هو اخدها و مشيوا على بيت البدري
كانت واقفه في الحمام و هي متضايقه انها مضطرة تبات معه في أوضة واحدة لكنها غيرت هدومها و لابست بيجامة
خرجت لقيته نايم على السرير و هو ساند ضهره و مغمض عنيه... كان غير هدومه و لابس تيشرت و بنطلون اسود.
لما سمع صوت الباب بيتفتح فتح عنيه و بص لها كانت واقفه و شعرها البني مفرود بشكل لطيف و هادي حواليها مش طويل اوي لكن كانت جميلة جدا
اتنحنح بهدوء و هو بيبعد عيونه عنها و بيشاور لها على الاكل
الاكل عندك لو عايزاه تاكلي.... اطفي النور بعد ما تخلصي أنا عايز انام.
غنوة مهتمتش بكلامه و طفت النوم و هي بتقعد على إلانترية... الجو كان ضلمه مفيش غير ابجورة جنب السرير سلطان فتح عنيه بخبث و بص ليها لقاها شدت الغطاء عليها و نامت بسرعة غريبة من التعب و هي حتى مش قادرة تتكلم و لا تقول اللي جواها و لا قادرة تناقشه او تعترض هي بس سلمت زمام الأمور ...
حس بيها بتنكمش على نفسها و بتضم نفسها و هي نايمة طفي الاباجورة و حاول ينام و ميفكرش في حاجة....
في اوضة نعيمة
كانت قاعدة مع ليلى اختها و هي متعصبة و متضايقه
نعيمة بحدة شفتي الفرح كان عامل ازاي... لا و هو مرضاش يقوم السنيورة حتى ترقص مع البنات أنا مش مصدقه نفسي بقا هو دا ابني سلطان.
ليلي اهدي بس يا نعيمة اهدي الله يرضى عليكي و بعدين خلاص يا حبيبتي اللي حصل حصل و اتجوزها و الناس كلها عرفت ايه بقا اللي معصبك كدا.
نعيمة نعم! ايه اللي معصبني كدا و كمان بتسالي
معصبني الجوازة كلها يا ليلي... معصبني ان ابني اتجوز واحدة بدل ما ترفع منه لا دي قلت من مقامه
و بعدين بلاش كل دا.... هتكلم بالعقل
دي واحدة لا اعرف أصلها و لا فصلها و لا حتى متربية و لا لاء و البت طول الوقت ساكته كدا و شكلها هتطلع سوهنا في الاخر
ما هي اكيد كدا..... اصل مش معقول تغير سلطان بالسرعة دي... دي ممكن تكون عاملة له عمل أنا عارفة الأشكال دي.
ليلي عمل ايه بس يا نعيمة... استغفر الله العظيم بصي يا ستي استنى شوية بس و اعرفيها مش جايز تبقى كويسه و انتي ظلمها
نعيمة هو فيه واحدة كويسة تقبل تتجوز في السر يا ليلي انتي بتضحكي على نفسك و لا عليا.... و بعدين أنا مش هعدي اللي حصل دا على خير
أنا بس عديت الفرح بهدوء علشان الناس محدش فيهم يتكلم
لا و اللي زاد و غطا اخوكي يوسف اللي رايح يبقى موكلها و موافق اللي بيحصل ده
كان هاين عليا اقوم اصوت و أمشي من الفرح.
ليلى استهدي بالله يا نعيمة انتي عمرك ما كنتي قاسېة كدا.
نعيمة لما يبقى ليه علاقه بولادي يا ليلي يبقى ساعتها لازم افكر الف مرة أنا معنديش غير تلاته اللي طلعت بيهم من الدنيا
نفسي اطمن عليهم بذمتك حد يسيب مريم بنت الناس المتربية
و اللي عايشة على مستوى عالي و أهلها
ناس كويسين و يتجوز البت دي اللي ملقتش حتى حد يكون موكلها يوم فرحها... لا يا ليلي أنا مش هرتاح الا لما اخلص منه اخلص ابني منها.
ليلي أنا مش هعرف اسلك معاكي بس بلاش الڠضب يعمي عنيكي يا نعيمة... أنا همشي دلوقتي و هجيلك بكرا... ياله تصبحي على خير
نعيمة و انتي من اهل الخير..
دعاء احمد...
عشق_السلطانالفصل الثالث عشر
في صباح يوم جديد
غنوة بدأت تفتح عنيها و هي مش عارفه اللي مستخبي ليها... لكن يوم جديد و حياة جديدة
مع أشخاص حياتهم غير حياتها مختلفة تماما عنهم..... لكن القدر كان ليه رأي مختلف في حكايتها و بدل حياتها فجأه.
يمكن للأسوء.... يمكن للأحسن
شيء نسبي لان مفيش حقيقة ثابتة
كان عندها عدم ثقة في الناس.... لكن دلوقتي عندها عدم ثقة و شعور بالنفور و الكره.
اتعدلت قعدت على إلانترية بصت ناحية السرير لكن سلطان مكنش نايم.
سمعت صوت باب الحمام بيتفتح و بيخرج سلطان و هو لابس تيشيرت اسود و بنطلون رصاصي غامق غنوة ديرت وشها بعيد عنه و اخدت هدوم ليها و دخلت الحمام.
سلطان بص لها و راح ناحية الدولاب.
عدت دقايق
كان غير هدومه و خرج غنوة خرجت من الحمام مهتمتش بعدم وجوده و غيرت هدومها.
قعدت على إلانترية و هي مش عارفه المفروض تخرج و لا تعمل ايه بس قلقانه من ردة فعل أهله و خصوصا لأنه متجوز مع والده في نفس الشقة
لأن شقة سلطان لسه بتتجهز و لان موضوع الجواز جيه فجأه.
الباب اتفتح فجأه و نعيمة دخلت و هو بتبص لغنوة
غنوة وقفت و بصت ليها بهدوء خالي من اي مشاعر جايز لو من النظرة الاول تقول أنها باردة المشاعر لكن الحقيقة أنها بقيت من اللي بيحصلها متعوده ...
نعيمة قفلت الباب و بصت لها بسخرية
صباحية مباركة يا عروسة
و لا صباحية ايه بقا.... المفروض كنت ابارك لك من وقت ما لعبتي على ابني و اتجوزتيه في السر
لا بس الصراحة طلعتي ذكية اوي... ذكية و قدرتي توقعي سلطان أحمد البدري اللي طول عمره موضوع الارتباط دا مش في دماغه اصلا لا و كمان أعلن جوازكم...
غنوة
بهدوء واضح ان حضرتك فاهمة غلط
نعيمة بطلي الشويتين دول... اذا
كنتي قدرتي تضحكي على ابني بيهم فأنا مش هو
يمكن آه عجبتيه و ډخلتي دماغه لكن أنا لا يا شاطرة مش هينضحك عليا الحنية دي
غنوة بابتسامة أنا دلوقتي عرفت هو طالع لمين....
نعيمة بحدة و هي بتقرب منها و بتمسكها من دراعها بقوة
أنتي عارفه أنا ابقى مين و بنت مين
يوم ما أحمد البدري أتقدم ليا الناس بقيت تقول هو دا النسب اللي يشرف بجد... الناس كلها كانت عارفه اصلي و عارفين إني خارجة من بيت ناس محترمة ولاد اصول
مش من الشارع... مش واحدة كل شغلها و تعاملها مع الناس في الشارع
أهلي ربوني بجد و علموني الصح... و علموني مسبش حقي و حق عيالي
إنما أنتي مين! واحدة ابوها محضرش فرحها.. دا ليه
لا و كمان هربت من بيتها
دا ليه يا حلوة... ليه
غير أنها متربتش و قليلة رباية.... و يعالم لو كنتي محترمة و لا....
غنوة بضيق و هي بتسيطر على نفسها
لو سمحتي كفاية... أنا محترمة بس أنك زي والدتي.
نعيمة والدتك... أنا ميشرفنيش اكون أمك
و لا حتى يشرفني تكوني مرات ابني
أنا بس مش فاهمة ازاي سلطان فجأة يفكر فيكي أنتي بجد ازاي...
غنوة ما تسأليه و خليه يسيبني بقا علشان أنا تعبت..
نعيمة بسخرية يا عنيا لا بجد أنا ست ظالمه...غيري هدومك و اجهزي علشان في ضيوف هيجيوا يباركوا...
نعيمة سألتها و خرجت من الاوضة غنوة قعدت مكانها و حاسه ان قلبها هيقف من كتر القهر و الۏجع اللي حاسه بيه... و في نفس الوقت عيونها مش قادرة تنزل دمعه واحدة
مش قادرة تطلع كل اللي جواها هي بس بتعدي لكن لحد أمتي!
سلطان كان بيتكلم في الموبيل مع حد و بيقفل المكالمة.
دخل الاوضة بهدوء لقاها نايمة على إلانترية صاحيه لكن عقلها مشغول و كأنها مش معه و في مكان تاني.
استغرب و قرب منها
غنوة.... غنوة
اتعدلت و قعدت مكانها و هي بتبص له
نعم..
سلطان مشغوله في اي
غنوة ميخصكش...
سلطان نعم
غنوة و هي بتقف ادامه
ميخصكش.... و اظن مش من حقك تسألني عن أي حاجة و لا حتى من حقك تتكلم معايا
أنت انسان متوحش و اناني و معندكش...
غنوة قسما بالله لو ما سبتني و ربي لاصوت و ألم عليك الناس و اقولهم على الحقيقة أنا مچنونة و اعملها
سلطان بابتسامة جانبية و سخرية
طب ما توريني يا شاطرة.... و بعدين فكرك لو صوتي لحد هيتجرأ و يدخل الاوضة هنا أو حتى الشقة...
غنوة غمضت عنيها و هي حاسة پألم في دراعها سلطان سابها و بعد عنها خطوتين لوراء.
في ضيوف هيجيوا يباركوا لكن أنا مضطر انزل عندي شغل مهم و مش فاضي
غنوة لنفسها اللهي ما ترجع...
سلطان
خرج من الاوضة و سابها....
عدي الوقت و فيه ناس جيت باركت ليها لكن نظراتهم مكنتش كويسة ليها و همسهم لان موضوع جوازهم العرفي انتشر قبل الجواز.
على الساعة اربعة و نص.
الباب خبط الشغالة راحت فتحت الباب لقيته شاب في بداية العشرينات ملامحه هاديه و من شكله أنه مش غني و بسيط.
الشغالة افندم مين حضرتك
أنا أسلام... إبن عم غنوة هو مش دا بيت سلطان البدري
ايوه هو بيت سلطان بيه زوج مدام غنوة...
اسلام بحرج طب هو أنا ممكن اقابلها
طب ثواني اديها خبر...
دخلت بلغت غنوة أن اسلام مستنيها غنوة فرحت و قامت بسرعة خرجت معها
اسلام اول ما شافها ابتسم بحب و هو بيقرب منها و بيسلم عليها
ازايك يا غنوة... وحشتيني اوي بجد وحشتيني.
غنوة بابتسامة و أنت كمان يا حبيبي... نورت اسكندرية... عامل ايه يا اسلام و اخواتك عاملين ايه... انتم وحشتوني اوي
اسلام و انتي كمان يا غنوة وحشتيني كلنا بس...
سكت بحرج و هو بيبص لنعيمة اللي كانت واقفه في جنب و هي بتبص لهم.
غنوة طب تعال يا إسلام نقعد جوا
إسلام هز رأسه الايجاب و مشي معها دخلت اوضتها و قفلت الباب وراها
نعيمة البجحة... داخله أوضة النوم مع شاب لوحدها... يلهوي يا نعيمة على حظ إبنك المنيل... لا ما أنا مش هفضل قاعدة كدا
بسرعة طلعت موبايلها و كلمت سلطان و طلبت منه يجي فورا بدون ما تقوله في ايه.
في اوضة غنوة
غنوة احكي لي يا اسلام في ايه... مالك يا قلب أختك
اسلام أنا بخير الحمد لله... المهم انتي كويسة
غنوة أنا بخير الحمد لله زي ما انت شايف
اسلام لو على اللي انا شايفه فأنا شايف قهر و حزن في عيونك... نفس اللي كنت بشوفه لما ابوكي يضربك بليل و الصبح تقومي تروحي الشغل عادي علشان بس تعرفي تصرفي على أمك و على علاجها.
غنوة الله يرحمها... متشغلش بالك بيا... المهم معتصم و ضي عاملين ايه
اسلام مرتاحين... مرتاحين أنا بابا و عمي صلاح مش في الغورية و أنهم مش قاعدين على قلبنا...
غنوة اومال هم فين
اسلام من وقت ما عرفوا ان مكانك هنا في اسكندرية و هم مرجعوش الحي تاني و تقريبا كدا اخدوا أوضة هنا إيجار.
غنوة بقلق يعني هم هنا في اسكندرية.
اسلام تقريبا كدا علشان كدا لازم تاخدي بالك لأنهم مش هيسبوكي الا لما تتجوزي العريس اللي كان متقدم لك لان ابويا و ابوك استلفوا منه مبلغ كبير على أمل انك تتجوزي الراجل دا بس من وقت ما انتي هربتي و هم الاتنين اتجننوا علينا
و حصل حاجة
غنوة اي
اسلام عمك جابر بعد ما انتي هربتي كان هيتجنن عليكي و طلع عصبيته على ضي
أنا و معتصم كنا في الشغل و هي اللي في البيت و قالها تعمل له شاي لكن الماية المغلية وقعت على رجليها
و عمك مهنش عليها حتى يقومها من مكانها و يحط لها تلج عليها
لا دا قالها جاتكم القرف صنف مالوش لازمه و سابها و مشي
هي فضلت تصوت من الۏجع و علشان المشاكل اللي بينا و بين الجيران محدش فيهم اتدخل
الا الست سعاد كلمتني على الموبيل و أنا روحت البيت لقيتها اغمى عليها من الۏجع اللي حست و هي يا دوب عشر سنين مستحملتش
اخدتها و طلعت على المستشفى الدكتورة عاملت اللازم بس الفلوس اللي كنت محوشها انا و معتصم من وراهم راحت في علاج ضي
أنا مش فارق معايا الفلوس و الله بس صعب عليا نفسية البت هي صغيرة و متستحملش كل دا
احنا استحملنا يا غنوة لكن هي ذنبها ايه
طبعا لما ابويا عرف اننا كنا بنحوش فلوس من وراه اټجنن علينا
معتصم ساب البيت و مكنش ناوي يرجع و الصراحة عنده حق
هيرجع ليه... علشان اب ظالم مش فارق معه غير الفلوس
أنت تشتغل و تجيب فلوس مقابل انه
يسيبك تنام في بيته و بيغاملك زي الكلب... هم بيخلفونا ليه يا غنوة طالما هنتعامل كدا بس في الاخر هنقول ايه ابويا
أنا دورت على معتصم و لقيته و بالعافية اقنتعه يرجع البيت علشان ضي لو احنا الاتنين هجينا من البيت عمك هخليها تنزل تشتغل اي حاجة
و هو اصلا اللي مخليه ساكت الفلوس.
غنوة پقهر حسبي الله و نعم الوكيل فيهم... هم ايه معندهمش رحمة مش كفاية بقا حقكم عليا يا اسلام بس لو كنت فضلت يوم واحد كمان كنت هلاقيهم بيبعوني بالرخيص و بتجوز واحد معرفش عنه حاجة
و كنت هضيع... مقدرتش اسكت و أفضل واقفه مكاني
كان لازم اهرب... خرجت من البيت و أنا مش عارفة اروح فين
مكنش معايا فلوس غير مبلغ صغير اوي لما خرجت من محطة القطار فضلت ماشية لوقت طويل و أنا جعانه و خاېفة و تعبانة
لكن ربنا مبينساش حد
اسلام بابتسامة بس انتي حظك حلو
اتجوزتي جدع اسمه بيلمع... و الكل بيقول انه جدع و محترم ابن ناس...
غنوة بابتسامة استغراب جدع
و محترم
مين اللي قالك كدا ان شاء الله
اسلام ناس كتير والله...
غنوة و ماله.... بقولك صحيح يا اسلام.
السلسلة الدهب بتاعة أمي اللي ابوك اخدها مني لسه معه و لا بعها
اسلام و الله مش عارف بس هي كانت معه قبل ما يجي اسكندرية..
غنوة بتنهيدة السلسلة دي ماما كانت واخده عهد عليا مبعهاش و اعينها بعيد عنهم بس اقول ايه بقا حسبي الله.
اسلام ان شاء الله ربنا يعوضك خير و بعدين دا انتي متجوز تاجر دهب اد الدنيا
غنوة و الله انت طيب يا اسلام... بقولك شكلك جعان اجبلك تاكل
اسلام لا لا أنا الحمد لله تمام و بعدين الناس هنا يعني هيقولوا ايه.... أنا بس جيت اطمن عليكي و ابارك لك
كدا ابوكي مهما عمل مش هيعرف يعملك حاجة و انتي متجوزه سلطان البدري دا طلع واصل اوي.
غنوة يارب يبعدوا عني يا اسلام حكم أنا تعبت... بقولك استنى خد دول انا كنت محوشاهم من شغلي مع أم عبدالله
اسلام اخد منها الفلوس و بص لها
لا أنا مش هاخد حاجة...
غنوة يا واد متتعبش قلبي خد الفلوس... لو اختك محتاجة علاج و لا حاجة و كمان هات خضار و عمل اكله حلوة لاخواتك... دول غلابه بس أبعدهم عن ابوك فاهم دا لو شم بس خبر ان معاك فلوس هياخد هم و ان شاء الله لو جيه معايا فلوس تاني هبعتلكم
اسلام بتفكري فينا على طول كدا يا غنوة
غنوة بابتسامه انتم اخواتي يا ولا لو مفكرتش فيكم هفكر في مين يعني
اسلام ابتسم و مسك ايدها
ربنا يخليكي لينا يا اجمل غنوة في الدنيا...
سلطان فتح الباب في نفس الوقت
و ايه كمان يا حيلتها
عشق السلطان
دعاء احمدالفصل الرابع عشر
سلطان فتح الباب و دخل و هو متعصب و غيران... و هو سامع أسلام بيتغزل فيها.
و ايه كمان يا حيلتها....
غنوة بصت لسلطان بارتباك و قامت وقفت و هي شايفه بيقرب منهم بسرعة و الشړ باين في عنيه... بسرعة وقفت أدام أسلام لأنها متأكدة أن ردة فعله هتكون عڼيفة.
سلطان مسكها من دراعها پغضب و ضغط عليها بقوة
اياكي تقفي في طريقي فاهمة... اياكي
غنوة بۏجع تبقى غبي لو فاكر إني هسيبك تاذيه... أنا عندي احميه على مۏتي فاهم.
نعيمة من وراهم لا دا انتى متربتيش و بجحة كمان... يعني مدخله شاب غريب البيت و أوضة نومك و مش مستحية يا بجاحتك...
سلطان بحدة ماما اخرجي دلوقتي دي حاجة بيني و بينها.
نعيمة بغيظ ماشي يا سلطان
نعيمة خرجت من الاوضة و سابتهم غنوة بتبص لسلطان بتحدي و قوة
غنوة بهدوء أمشي دلوقتي يا إسلام و أنا هبقي اكلمك.
أسلام غنوة...
سلطان من قوة ضغطه على ايديها صړخت من الألم لأن دي مش اول مرة يمسكها بنفس الطريقة كل مرة يتعصب يعمل نفس الحركة
اسلام بحدة و خوف عليها و هو بيشد غنوة بعيد عن سلطان
إياك.... إياك تحاول ټلمسها بالطريقة دي.
سلطان بعصبية و هو بيمسكه من باقه قميصه
و
أنت بقا اللي هتمنعني
أسلام و أمنع الف زيك من اذيتها...
سلطان بغيرة
ليه... و لا
هي مهمة عندك اوي كدا
غنوة بجدية و خوف على اسلام لانه لسه صغير و سلطان يقدر ياذيه فعلا
أسلام امشي دلوقتي متخافش عليا.... بقولك أمشي .. اتفضل
اسلام بعد عن سلطان بالعافية و خرج من الاوضة و من الشقة كلها و هو قلقان على غنوة لانه كان متوقع ان سلطان بيعاملها كويس لكن اللي شافه حسسه الإحباط
عند سلطان
مين دا و ايه اللي بينك و بينه.... بتحبيه هو دا اللي بتحبيه انطقي ايه اللي بينكم... بس حتى لو جوازنا مجرد لعبه... أنتي شايله أسمى... و عايشة في بيتيو بكل بجاحة
غنوة رغم كل الۏجع اللي حاسه بيه لكن ڠضبها كان قوي بما فيه الكفاية أنها تقدر تضربه في صدره بقوة بعدته عنها و اتكلمت بصوت عالي و ڠضب
غنوة من عصبيتها كانت بتزقه بقوة و بتبعده و هي مش شايفه ادامها
سلطان لأول مرة ميبقاش فاهم نفسه... هو ڠضبان و محتار و مش قادر يفهم نفسه
مخضوض من اللي بيحصل له... لكن في نفس الوقت كبريائها منعه يتعرف أنه متلغبط... خرج من الاوضة و هي قفلت الباب وراه ڠصب عنها و بسبب ڠضبها مسكت فازة رميتها على الأرض پعنف و قوة قربت من صورة سلطان اللي متعلقه في الاوضة و بصت له بكره
انت بني آدم حقېر... متوحش و أناني... أنا بكرهك يا سلطان و افتكر كل مقابلتهم ببعض
مفيش مرة واحدة بصت له بنفس النظرة اللي مليانه خوف و حب
ضړب ايده بقوة و عڼف في العربية و هو مش
طايق نفسه...
عدي حوالي ساعة
غنوة كانت في اوضتها و هي مخڼوقة المغرب إذن ماكلتش حاجة من وقت طويل غير اللي بيعمله فيها كل شوية... كانت حاسة بهبوط و أنها بتفقد طاقتها لكن مع ذلك مكنتش عايزاه تخرج تأكل معاهم و لا ليها نفس للأكل...
سارة كانت عايزاه تخبط عليها و تقولها تيجي تتغدا معاهم لكن نعيمة رفضت أنها تروح لها او تتكلم معها اصلا
سارة يا ماما مينفعش كدا دي برضو مرات اخويا و دي ماكلتش حاجة من الاكل بتاع امبارح حرام علينا كدا.
نعيمة بحدة و انا قلت لا يعني لا... لو هي جعانه يا حبيبتي تخرج من اوضتها و تيجي تقعد على السفرة زيها زينا... إنما بقا هتعمل فيها بنت السفرة عزيزة و تفضل في اوضتها هي حرة و بعدين ايه مرات اخويا دي
مشوفتيش اخوكي عمل معها ايه الصبح دا مكنش طايقها و دا معناه أنه أعلن جوازه بس علشان الناس متتكلمش
و فترة و هيطلقها يارب يطلقها بدل ما انا اموت مشلۏلة.
سارة مالك يا نعيمة... مش انتي و لا دي امي اللي انا اعرفها... دا انتي كنتي احن واحدة علينا... ليه كدا
نعيمة بهدوء و حزن
هو انتي فكرك انا بعمل كدا و انا مبسوطة يا سارة... يا بنتي أنا مقهورة من جوازك اخوكي دي... واحد زي سلطان يستاهل واحدة تحافظ عليه و تصونه مش واحدة تدخل شاب غريب أوضة نومها
سارة استغفري يا نعيمة... و استهدي بالله علشان انتي عارفه من جواكي ان دا مش صح
و بعدين الشاب دا شكله يا دوب عشرين سنة و كمان الشغاله قالت إنه ابن عمها و يمكن هم قريبين من بعض و هي اتحرجت تقعد معه في الصالون ادمنا و يمكن في كلام تخاف تقوله ادامك و بطلي سوء الظن دا علشان انتي مش كدا يا ماما.
نعيمة و الله اللي أنا اعرفه ان لو هي محترمة مش هتعمل كدا في الصباحية بتاعتها و اخوكي اللي خرج للشغل دا النهاردة
بذمتك لو كان اتجوز مريم كان هيخرج يوم الصباحية... و لا حتى لحد السبوع.
سارة يا ماما شيلي مريم من دماغك اذا كان هي صاحبة الشان و قالت مش نصيبي و قفلت الموضوع معه و كل واحد راح لحاله
و آه لو كان اتجوز مريم كان هينزل يوم الصباحية عادي
و لو مكنش نزل كان هيبقى علشانك انتي بس لأنك تفضلي تنزني عليه انه ميصحش
انتي عارفة سلطان و عارفه انه بيحب الشغل و عمره ما حب مريم
بل بالعكس دا مع غنوة مختلف في تعامله عن غنوة.... استهدي بالله كدا و قولي اللهم اخزيك يا شيطان و بطلي تتكلمي في الأعراض و لا انتي تفرحي لما تتردلك فيا.
نعيمة انتي بتقارن نفسك بيها!
سارة يلهوي عليا و على سنين... انا هقوم ادخل اوضتي الحمدلله شبعت.
نعيمة غوري ان شاء الله ما اكلتي.
سارة هزت رأسها بيأس و راحت اوضتها كانت عايزاه تتكلم مع غنوة لكن بسبب اللي حصل اتحرجت تدخل تكلمها دلوقتي
عدي
سلطان دخل البيت مع ابوه بعد ما خلص شغل كانوا طالعين السلم سوا.
احمد المهم تكلم وائل تقوله يشوف موضوع المكن الجديد
سلطان متقلقش انا اتفقت مع أنه هيجيب لي كل المعلومات و نقعد انا و انت و فريد نتناقش اذا كنا نشتريه و لا لاء
احمد صحيح في واحدة من اللي كانوا في الفرح امبارح... عميله
لما شافت الشبكة اللي انت قدمتها لغنوة قالت أنها عايزاه نفس التصميم دا.. عز كلمني من ساعتين و بلغني و قالي انها توافق على اي مبلغ...
سلطان أنا قلت قبل كدا ان التصميم دا مش هيتكرر تاني و مش هنعمل منه نسخ تانية.... التصميم دا غالي عليا شوية... صحيح ايه رايك في فريد اليومين دول.
احمد مستغربة مش عارف اول مرة احس انه مركز في الشغل... و حاسس كدا ان حسناء معلمه الأدب اليومين دول و بيجي المصنع بدري... مسمعتش انه سهر و دا مخليني قلقان.
سلطان ربنا يهديه.
احمد من بين سنانه و يهديك...
سلطان ابتسم و راح ناحية اوضته و ابوه راح اوضته.
الاوضة كانت ضلمة سلطان استغرب و فتح النور لكن وقف مصډوم و هو شايف غنوة واقعه على الأرض و فيه زهرية مکسورة على الأرض
جري عليها بسرعة انحني حاول يفوقها لكنها كانت فاقده الوعي
سلطان غنوة.... غنوة فوقي في ايه
مال عليها شالها و راح ناحية إلانترية قعدها عليه و اخد كوباية ماية و بدأ يحط لها على وشها بيحاول يفوقها و هو خاېف عليها
غنوة شهقت فجأة اول ما كب عليها الكوباية كلها... فتحت عنيها و بصت له بتعب و هي بتبعد ايده عن وشها...
سلطان أنتي كويسة... حصل ايه
غنوة بارهاق مالكش دعوة... انا كويسة بس ياريت تفضل بعيد عني... ايه اللي انت عملته دا.
سلطان كنت بفوقك...
غنوة قصدك كنت بتغرقني...
قامت من على إلانترية كانت
رايحة ناحية الحمام لكن من التعب مقدرتش تقف و قعدت تاني مكانها حطت ايدها على دماغها من التعب و بدأت تاخد نفسها بهدوء...
سلطان بقلق غنوة في ايه...
غنوة مفيش دايخة شوية...
سلطان بحدة و ڠضب ما انتي ماكلتش حاجة عايزاه ايه اللي يحصل اكيد لازم يحصل لك كدا.
غنوة بحدة بالله عليك اسكت...
سلطان لو كنتي اهتميتي بنفسك كنت سكت لكن انتي بتتلككي علشان تقلقيني...
غنوة بتلكك..
سلطان سابها و قام خرج من الاوضة.. غنوة هزت رأسها بضيق و هي بتاخد فوطة تمسح وشها و هدومها...
دقايق و دخل الاوضة و هو شايل صنية عليه أكل و عصير حطها على التربيزة ادامها .
سلطان ياله كلي...
غنوة دا على اساس اني هسمع كلامك بالشكل دا
سلطان هو دا اللي عندي...
غنوة أنا مش جعانه
سلطان بطلي كڈب بقا...
غنوة بحدة انا مش كذابة...
سلطان پغضب كلمة كمان و هطفحك الأكل... اتفضلي كلي انا مش ناقص دلع مالوش لازمة و ياريت تخلي بالك على نفسك لان لو جوالك حاجة هتكلفيني و خلاص على الفاضي.
غنوة مهتمتش و اخدت كوباية العصير تشرب منها و هي معندهاش قدرة للكلام معه...
بدأت تهدأ و تفوق... سلطان كان واقف أدام الدولاب بياخد هدوم ليه و هو بيراقبها بدون ما تاخد بالها.
غنوة حطت الكوباية و مسحت على وشها بهدوء و قامت اخدت مخده و لحاف حطيته على إلانترية بدون ما تبص له و هي لسه محافظة على ثبتها الانفعالي.
سلطان رغم انه كان خاېف عليها و عايز يقولها تاكل لكن رفض يعمل كدا و دخل الحمام يغير هدومه.....
تاني يوم
سلطان خرج للمصنع و غنوة خرجت من الاوضة و هي مش عارفه تعمل ليها لقت نعيمة بتقف ادامها و بتتكلم بهدوء
ياله يا غنوة البيت مكركب من الفرح و عايز يتنضف و السلم يتمسح... الشغاله اخدت اجازة النهاردة و سارة نزلت مع خطيبها و أنا تعبانه اكيد مش هتخلي حماتك تنضف و تمسح...
غنوة بهدوء نعم يا ست نعيمة..
نعيمة حلوة ست نعيمة دي... ياله يا حبيبتي نضفي البيت قبل ما حد يجي... و السلم يتمسح انا هدخل ارتاح لان ضهري شادد عليا...
دعاء احمد
عشق السلطانالفصل الخامس عشر
بعد أسبوع
سلطان كان قاعد في المحل و هو حاسس بالتعب من التفكير في علاقته هو و غنوة..
اتنهد بضيق رغم ان مفتش فترة طويلة على جوازهم لكن من قبل ما يتجوزوا و هي شاغله تفكيره...
فاق من شروده على صوت مصطفى
سلطان بيه... يا سلطان بيه.
سلطان في اي يا مصطفى
مصطفى في واحد برا عايز يقابلك بيقول اسمه أسلام جابر...
سلطان اسلام جابر! ډخله يا مصطفى و قول لمحسن يعمل لي فنجان قهوة...
مصطفى حاضر...
اسلام دخل بهدوء و بص لسلطان اللي وقف و هو بيبص له بحدة
اسلام ازيك يا سلطان بيه...
سلطان بهدوء بخير الحمد لله... جاي احد هنا برجليك..
اسلام جاي علشان في كلمتين محشورين في زوري لازم اقولهم لحضرتك...
سلطان اقعد يا اسلام...
اسلام قعد بهدوء
أنا آسف لو جيت في وقت مش مناسب بس.. غنوة
سلطانمالها غنوة
أسلام هو حضرتك تعرف عنها حاجة علشان تتعامل معها بالشكل دا
سلطان تقصد ايه
أسلام بتنهيدة يعني اقصد ان دي مش طريقه تتعامل معها... غنوة مغلطتيش في حقك في حاجة انا جايز معرفش ايه اللي حصل بس أنا عارف غنوة كويسة مش بتحب تغلط نفسها... و طول عمرها ماشية صح
انا و غنوة اه ولاد عم لكن علاقتنا احسن من الأخوات
لا و حضرتك شكيت فيها لما شفتني معها...
سلطان بحدة و أنت لو متجوز و دخلت البيت لقيت مراتك قاعده مع شاب في اوضة نومك هتعمل اي.
اسلام أنت بتقول ايه يا استاذ سلطان... احنا كنا في البيت مع والدتك و اختك.. اه يمكن غنوة اتصرفت بعفوية و غلط أنا معاك بس مش كدا... هي يمكن اتحرجت من والدتك انها تقعد تتكلم معايا في وجودها و خصوصا ان تفاصيل حياتنا مش زيكم.
سلطان ايه حكاية غنوة يا اسلام
اسلام بهدوء غنوة حكايتها طويله الأفضل تسمعها منها هي
بس اللي لازم تعرفه
أنها معشتش حياة مرفهه و لا عاشت مرتاحه هي و أمها..
مرات عمي كانت
أطيب و احن حد عليها الله يرحمها لما ماټت غنوة كانت مڼهارة و كانت هتتجنن لانها اشتغلت كتير اوي علشان توفر فلوس العلاج لكن أمر الله... و انكتب عليها تبقى وحيدة
لا ابوها رحمها و لا ابويا... كان همهم أنهم ياخدوا منها فلوس شغلها و لان ابويا شديد شويه كان بيعرف ياخد فلوسها بالڠصب لحد ما جيه في يوم و قالها أن في واحد متقدم لها
بس عايز يتجوزها في السر مدة هيحددوها في مقابل فلوس
لكن غنوة كانت رافضه و عملت معاهم مشكله لكن ابويا وعدها أنها هتاخد كتير من الموضوع ده فهي وافقت و اقنعتهم انها موافقه في نفس اليوم سابت الغورية و جيت اسكندرية على طول من غير ما تفكر لحد ما في حد بلغ عنها و
بلغهم عن مكانها...
سلطان سكت و هو حاسس بالندم أنه خلي عز يبلغ عنها...
اخد نفس عميق و هو بيرجع راسه لوراء و غمض عنيه
أسلام أنت كويس
سلطان بهدوء اه الحمد لله... صحيح انت هتتغدا معانا النهاردة...
اسلام كتر خيرك بس أنا لازم ارجع علشان اخواتي..
سلطان مفيش مشكلة هتتغدا سوا و بعدها هترجع..انا هكلم الجماعه في البيت يجهزوا الغداء
اسلام ابتسم بهدوء و سلطان طلع موبايله كلم والدته بلغها ان في ضيف هيجي معه على الغداء.
في البيت عند غنوة
دخلت اوضتها و هي حاسة بارهاق و تعب و خصوصا ان كل يوم نعيمة تتحجج بحجة تخليها هي اللي تنضف البيت و تمسحه و تجهز الغداء.... لكنها معترضتش و لا حتى اتكلمت مع سلطان كانت بتحاول تعدي الايام.
اخدت هدوم و دخلت تاخد دش... عدي الوقت بسرعة
كانت قاعدة بتسرح شعرها لحد ما سمعت صوت سلطان و هو بيتكلم مع حد...
قامت بهدوء و لمت شعرها و هي مستغربة انها سامعه صوت اسلام
خرجت من الاوضة و هي بتلف حجابها لقت سلطان قاعد مع اسلام بيتكلموا متعرفش ليه حست بالدهشة لأنها مكنتش متوقعه أنهم يقعدوا سوا في يوم من الايام و يتكلموا عادي كدا
لكن ابتسمت و هي بتقرب منهم
اسلام!
اسلام وقف و ابتسم و هو بيمد ايده يسلم عليها لكن غنوة بحركة عفوية حضنته
أنت كويس
اسلام بعد و هو بيبص لسلطان
بخير الحمد لله أنتي عاملة ايه
غنوة بخير الحمد لله...
غنوة بصت له بدهشة و عيونها وسعت پصدمة لكن سلطان اتكلم بهدوء
أسلام هيتغدا معانا النهاردة يا غنوة... ايه هنفضل نتكلم كدا هو مستعجل و عايز يرجع القاهرة هنفضل نتكلم كدا كتير..
غنوة ابتسمت و هي بتبص لاسلام
لا طبعا... ثواني و الغداء يكون جاهز أنا اللي عامله الاكل...
بعدت عن سلطان و راحت ناحية المطبخ و هي مبسوطه انها اطمنت على اسلام كانت خاېفه سلطان يعمل له حاجة.
طلعت الاكل و حطيته على السفرة بهدوء... نعيمة خرجت من اوضتها بعد ما صلت العصر...بصت لسلطان اللي قاعد مع اسلام و دخلت قعدت معاهم في الصالون
نعيمة السلام عليكم...
و عليكم السلام ورحمة الله وبركاته
نعيمة بضيق ازايك يا ابني...
اسلام أنا بخير الحمد لله...
نعيمة يدوم الحمد... هو دا الضيف يا سلطان.
سلطان بجدية لا اسلام دلوقتي صاحي بيت... دا اخو مراتي...
غنوة كانت داخله الصالون لكن سمعت كلمة مراتي ارتبكت و بصت له باستغراب...
غنوة بابتسامة الغدا جاهز
سلطان بهدوء طب ياله يا اسلام...ياله يا ماما
غنوة خرجت و كلهم معها
كانوا بيتغدوا في هدوء و غنوة حاسة ان فيه حاجة غلط و خصوصا سلطان اللي بيتعامل بهدوء و خلها تقعد على الكرسي اللي جنبه... كانت قلقانه و حاسه ان في مصېبة مستنيها لكن كانت بتاكل بهدوء
سلطان مكنش بياكل تقريبا و هو بيقلب في الطبق و بيفكر في اللي بيحصل معه و علاقته بغنوة... و الطريقه اللي بيتعامل بيها معها... طريقه جوازهم و اللي بالنسبة له عك
كل حاجة حصلت بسرعة مخيفةحتي هي مكنش عندها اوبشن الاختيار
لا دي كانت مجبرة.... و كمان سمعتها و احتجازها في الشقه اللي كانوا فيها و الحرس اللي كانوا موجودين و منعوها من الخروج
شكه فيها حتى لو بدافع الغيرة اللي اول مرة يحس بيها...
و الأصعب هو هدوئها طول الفترة دي و انها منفجرتش فيه...
كان فيه سؤال بيدور في باله...
ايه اللي مرت بيه في حياتها قبله خلاها بالبرود و الهدوء دا.... هل اللي فات في حياتها كان أصعب من كدا و دا اللي مخليها هادية في التعامل معاهم....
نعيمة پخوف مالك يا سلطان....
سلطان لا أبدا انا تمام...
نعيمة ما هو واضح...
غنوة مهتمتش و حطت لاسلام الاكل في طبقه
بالهنا و الشفا.
اسلام ابتسم بهدوء
عدي الوقت و اسلام خرج مع سلطان من البيت في طريقه للقاهرة...
سلطان كان داخل البيت لكن حارس البيت وقفه و هو محرج منه
سلطان في ايه يا عم محمد ما تتكلم..
عم محمد بحرج بصراحة يا بيه مش عارف ابدا منين بس الموضوع مبقاش يتسكت عليها و انا مش مصدق انها تطلع منك انت يا سلطان بيه
دا انت الكل بيحلف بيك تقوم تعمل حاجة زي دي
سلطان حاجة ايه ما تتكلم يا عم محمد.
عم محمد بصراحة يعني ميصحش ان مدام غنوة كل يوم تطلع تكنس السلم و تمسحه... لا و كمان
أنا قلت لست نعيمة اني ممكن اعمل كدا بدالها لكنها رفضت و زعقت لمدام غنوة ادامي... و غير كدا اللي بيجي البيت و بيشوفها مش هيسكت و هيطلع يقول مرات سلطان البدري شغاله خدامة
طب ليه اديتوا الشغاله اجازة طالما محتاجينها و لو مش هينفع و لازم تمشي قولي و انا اجيبلك واحدة امينه و نضيفه. و لو حد غريب دخل البيت بيبص لست غنوة و..
سلطان بحدة و هو بيمسكه من ياقه عبايته پغضب و شراسة
انت بتقول ايه ايه الجنان دا... غنوة ايه اللي
بتكنس و تمسح.... انطق
عم محمد پخوف في ايه يا سلطان بيه... انا بقول الحقيقة...
مدام غنوة من ساعة ما دخلت البيت و هي اللي بتعمل كل حاجة و الشغاله اللي كانت هنا ست نعيمة مشيتها
و لما أنا طلبت من الست نعيمة اعمل اللي المدام بتعمله رفضت و اتخنقت معايا و قالت لي خليك في شغلك
بس ميصحش حد يدخل البيت يشوف مرات سلطان بيه و هي بتنضف...
سلطان سابه و طلع البيت بسرعة و هو هيتجنن من اللي سمع و مش مصدق ان امه تعمل كدا...
فتح باب الشقه و قفل الباب وراه بقوة اتكلم بصوت عالي مخيف
ماما يا ماما.... غنوة.... غنوة
نعيمة في ايه يا ابني صوتك عالي ليه
غنوة خرجت من اوضتها پخوف لان دي اول مرة تسمع صوته عالي كدا
سلطان الكلام اللي عم محمد قاله دا صح انتي مشغله مراتي خدامة...
نعيمة بارتباك ايه الكلام اللي بتقوله دا يا سلطان
سلطان بعصبية و بيحاول يسيطر على نفسه
بقول اللي حصل انتي مشغلها خدامة...
نغيمة لا طبعا و بعدين هو مش تنضيف البيت دا من مسئوليتها و لا هي هتقعد و تحط رجل على رجل و انا اللي اقوم انضف...
سلطان يعني عملتي كدا فعلا يا أمي
مشيتي الشغاله مخصوص و خليتها تطلع تمسح السلم و اللي داخل البيت و خارج يشوفها.... طب ليه
دي مرات ابنك... مراتي يا أمي مراتي
مهمكيش اللي ممكن يحصل لو واحد كدا و لا كدا من اللي داخلين البيت يتعرضوا ليها او حد بيبصلها بنظرة زباله... و لا مهمكيش سمعة العيلة مش دي اللي انتي بتسعي ليه دايما أن العيلة محدش يفرقها و تفضل سمعتها في السماء
نعيمة بحدة
ما أنت خليت سمعتنا في الأرض... و بعدين مين اللي هيبص لها خاېف عليها اوي
لا و كمان بتزعق فيا علشان واحدة خطڤتك من خطيبتك و خليتك تتجوزها في السر
واحدة مالهاش اصلا و حتى ابوها متبري منها و الله اعلم لو كانت شريفه و .
سلطان بحدة و مقاطعه
كفاية... كفاية بقا
اللي أنتي بتقولي أنا متجوزها في السر دي... استحملت العك اللي بيحصل دا من غير ما تتكلم... غنوة عمرها ما كانت مراتي
أنا اتجوزتها فعلا بس في النور... و موضوع الجواز في السر دي كانت لعبة انا لعبتها
و هي بتدفع تمنها...
نعيمة بصت له باستغراب هي و سارة.. غنوة ڠصب عنها دموعها نزلت لأول مرة
سلطان راح ناحيتها و مسك ايدها
غنوة بياعة الرز بلبن زي ما حضرتك شايفه انها بنت مش متربية و ازاي تاجر دهب يتجوز واحدة زيها و اكيد عملت لي عمل... و لفت عليا علشان اتجوزها و اسيب مريم بنت الحسب و النسب
انا لا عمري حبيت مريم و لا عرفت معها الحب....
و إذ كان على غنوة فهي واحدة القدر حطها في طريقي انا و فريد
فريد اللي انتي عارفه انه اتجوز حسناء بس علشان يرضيك و يخلص من الزن في موضوع الجواز ف راح لأول واحدة كانت بتفتح قلبها له و قرر يتجوزها و هو مش عايزاها فقرر يعاند معاكي و معايا و مع الكل
و يمشي في الطريق اللي انتي كنتي خاېفه منه
السهر... مع ناس لا عندهم ډم و لا اخلاق
و بقا زيهم مش فارق معه حاجة فقرر يسهر و ينبسط بالطريقه اللي هو شايف انها صح
و ظلم معه حسناء
لكن علشان حظ غنوة منيل
وقعت في طريقه و فريد بقا يرزل عليها ما هي بياعة الرز بلبن اللي ملهاش حد يدافع عنها او يحميها...
فريد بيه كان عايز يتجوزها في السر لكن برضو علشان حظها ماندل
انا عرفت فقررت أوقف الجوازة دي و اللي حصل أنها أتعرض لحاډثه
صحيت تاني يوم في المستشفى مش في وعيها و انا مضيتها على عقد الجواز العرفي لما لقيت فريد عندها و خاېف عليها
حسيت انه ممكن يحبها و يعمل مشكله مع حسناء و خالي يوسف
و يبوظ الدنيا و أنا عارف خالي معندوش غير حسناء ېخاف عليها و ممكن
فعملت لعبة اني متجوزها و طبعا الظابط مكدبش خبر و جيه قالكم و في ناس تانية عرفت...
و بالنسبة بقا لابوها متبري منها... فدى حاجة متخصناش
انا حاولت افهمك لكن انتي كنتي مصرة اني حيوان اتجوزت في السر مع انك اكتر حد عرفني
لكن سكتت و قلت عدي... و كل ما انتي تزعلي مني او تغضبي
اروح انا و أفضى عليها ڠضبي بمنتهى الغباوة و كل مرة كانت بتسكت... لكن بحد هنا و كفاية اوي كدا
بس تعرفي أنا اللي غلطت لما فكرت بالشكل دا و فكرت اني ممكن اكون بحمي علاقتك انتي و خالي يوسف
و في المقابل ظلمتها معانا.... لدرجة لأول مرة احس
نفسي حقېر اوي... اوي
على العموم
أنا هسيب البيت و هروح شقتي
نعيمة مكنتش عارفه تقول ايه
و هي بتستوعب
صدمة جديدة و ان غنوة مالهاش ذنب في حاجة.
سلطان مستناش رده فعل من حد و دخل اوضته و هو ماسك ايد غنوة
متابعة القراءة
