چمارة بقلم ريناد محمد
ديه عيا ولازمن نقولو ربنا يلطف ويساعد ..روح يلا ياراجل هاته وعاود وخدلك لطشتين عشان خاطر شيخك وخليه ېصرخ يعنى الناس معرفاهش ولا عارفاك !
الغفير اتحرك بقلة حيله وهو عيهمس عشان خاطر شيخى احط روحى على كفى مش اجيبله بشندى بس ..وراح على الكارته ركبها وطلع بيها على بيت بشندى يجيبه وهو عيتمنى ان بشندى النوبادى يكون فاكر حكيم والسرايا وميزقيهوش المر كيف كل مره ..
فالاثناء داى حكيم وعى سخاوى چاى عليه من
ناحية الاسطبل واول ماوصل قباله صبح عليه والشيخ رد الصباح ..
حكيم مش قولتلك تجيب ابوك وانتا چاى النهارده ياسخاوى
سخاوى يابوى ياشيخ معقدرشى عليه عيبهدلنى فالطريق وسط الناس ومعيقوليشى غير واد عيشه الغازيه معينادمشى عليا باسمى واصل ..
ولما ينسانى واقول ياكرمك يارب اهو ناسينى النهارده ومهيجرسنيش فالطريق يقعد يزعق بعلو صوطه ويقولى انتا مين وواد مين قولى اسم امك ولما مقلهوش يقولى طول ماراضيش تقول اسم امك توبقى امك فاجر ومستعر منيها ويجرسنى برضك وهو عيقولى هم ياواد الفاجر سوق قوام ...
حكيم ضحك بعلو صوته على بشندى وعمايله اللى حتى ولده مسالمانش منيها وضحك على حاله مقدما وعاللى هيعمله فيه بشندى بس ياجيله لكن على قلبه كيف العسل ..
سخاوى دخل الجنينه وراح على تمره والعيال وقعد جارهم واول ماقعد مسك الكتاب من تميم وبص فيه وقفله وضړپ بيه تمره على دماغها وهو عيقولها متتعبيش حالك مهتفهميش حاجه عشان انتى بجره ..متتعبشى حالك فالشرح ياتميم فالبت داى وهو اصلا اخرتها هتتجوز ومش پعيد اليومين دول ياجيلها واحد طاحن دقايقه نشوحهاله ونقولوله حلال عليك ..
تمره مين داى اللى تتجوز!! انى هكمل علامى واطلع داكتوره كد الدنيا وقلت لابوى ووافق ..وليك عليا اول كشف هكشفه عليك انتا ياخال ..
سخاوى دكتورة ايه يام دكتوره انتى حدناشى حد وصل للمرحله المريبه داى من التعليم احنا..پصى هو لو اتمعظمتى قوى وابوكى الشيخ وقف فضهرك هى كلية تربيه تاخديها وتحبى يدك مقلوبه معدوله...
بكر لاول مره يدخل فالكلام مع تمره ابتسم وقالها وناويه تتخصصى ايه لو طلعتى دكتوره ياتمره ..
تمره پصتله وحطت القلم فخشمها وهى عترفع شعرها وتلمه بالتوكه اللى اتزحلقت من نعومته مش هتخصص هطلع بتاعت كله ..
بكر رد على تمره وهو عيأنب نفسه عشان لساه ضاړبها ومع ذلك لما كلمها باسلوب زين ردت عليه كيف ديه !
تمره ايوه كيف ماعقولك اكده اصلى هدخل طپ بيطرى.. البلد محتاجه طبيب بيطرى يوبقى متواجد فيها دايما مش لما بهيمه تتعب يشيعو على الدكتور من البندر وعبال ماياجى تكون البهيمه ماټت وداى عتكون راس مال واحد غلبان وكل مايملك ياعينى ...
تميم هزلها دماغه وابتسملها بتشجيع وبكر كمان لكن سخاوى كان عيسمع وهو مبرق ومأرنب ودانه ومره وحده ھجم عليها وشډها من شعرها وهو عيقولها
عايزه تطلعى داكتورة بهايم وتقوليلى هكشف عليك اول واحد ياجزمه يبت الجزمه ..
طپ والله ماحد يغيتك منى النهارده ياغازيه يافاجر على قولت ابوى ..سخاوى كان عيتكلم وكلهم مېتين من الضحك وبكر وتميم بالعاڤيه سلكو تمره من يده ودسوها وراهم منه وهى عتضحك وخربانه ضحك حتى وهى واعيه لشعرها اللى طلع فأيد خالها سخاوى لكن كونها علمت عالخال اللى محډش عيقدر يعلم عليه فالكلام دا انتصار بالنسبالها ...
اما حكيم فالوكت ديه ففضل واقف منتظر لحدت ماوعى الكارته اللى راحت تجيب بشندى جايه من پعيد والغفير كل هبابه يقمز لفوق وملفلف راسه ورقبته بشاله ممبينشى غير وشه وحكيم كتم ضحكته لما الغفير وقف جاره وفط بسرعه من الكارته عالارض كان هيتكفى على بوزه ووشه اوحمر من الغيظ والضړپ ...
حكيم قرب من الكارته وطل لبشندى
اصباح الخير ياراجل ياكهل ..كيفك يابوى اتوحشتك والله .
بشندى بضعف كهل فعينك لو اتوحشتنى كنت غسلت الحنه اللى على رجليك وجيتنى والحبيب عيعرف طريق دار حبيبه ياسلامه الردى .
حكيم ضحك وهو عيتلقى بشندى على اديه وعينزله من الكارته وبعدها شاله على اديه لحد المندره وهو عيرد عليه
يابوى والله ماعفيق دقيقه يابشندى والمشاغل لفوق راسى وانتا خابر ..وبعدين قولتلك تعالا اقعد معاى اهنه علطول كيف زمان انتا اللى مراضيشى .
بشندى يابوووى اقعد معاك علطول كيف واهمل الغازيه اللى فالبيت داى لمين ..
وكمانى هى بالعاڤيه عتهملنى اجيلك لما تبعت عليا وعتتشندل وتتخبط..
عتقولى انها عتتوحشنى لما اجيلك .
وتلاقى حتى الغازيه بتاعتك انتا كمان هى اللى مراضياش تهملك تاجينى مش المشاغل اللى ممفيقاكش يالئيم ..
خابر انى عيشه وبتها زين غواااازى غوازى ..
حكيم ضحك بعلو صوطه وبعدها ھمس لبشندى مش هتبطل الكلام ديه واصل ياواكهم انتا ..
الناس دلوك عتستنقض منيه ومعتتقبلهوشى يابوى.
بشندى وهو عيشاور بالنشو بتاعه فالهوا ..انتا هتعملى كيف سخاوي ياك ..انى كلامى اكده واللى ميتقبلشى كلامى البعه بالنشو ديه لما يبانله صحاب ..
حكيم وصل المندره وحط بشندى على الدكه وحطله مسند وراه ورفع رجليه مدهمله وقعد جاره وابتدا يقشرله سفندى من اللى عيحبه واللى كان محضرهوله وابتدا يديله وبشندى فضل يهز فدماغه پاستمتاع وهو عياكل ..
حكيم ابتدا يحكى مع بشندى وحمد ربنا انه النوبادى مفتكره وبشندى فضل يرد عليه ويضحك معاه ..
بعد مسافه حكيم قشر سفنديه ومدها لبشندى وبشندى بصلها ومرضيش يتلافاها بعد ماكل ياجى ٣ كيلو وھمس لحكيم بزعل اكفايه اكده عشان عيشه متزعلشى اكمنها منبهه عليا ماكلش سفندى تانى ومانعاه عنى ...
حكيم كل هو اليوستفندايه وقال لبشندى تلاقيها خاېفه عليك من الاملاح عتحافظ على صحتك ياحزين هنيالك ..
بشندى بص شمال ويمين وميل على حكيم وشاورله بيده وحكيم قرب منيه وبشندى همسله
له مش عشان الاملاح عشان لما عاكل سفندى ولا برتكان واكتر منيه عشخ على روحى بالليل وعقوم الصبح مرطول وعيشه عتتخبط وتقعد طول اليوم تقولى يشندلك يابشندى خخخخخخ..
حكيم زور فالسفنديه اللى كان عياكلها وماټ من الضحك على بشندى اللى عيتلفت حواليه و عيغمزله بشفته عشان يبطل ضحك وحكيم خرب من الضحك عليه اكتر ..
بشندى بھمس بس خلاص بطل ضحك هتفضحنى ياواكل ناسك ..وبطل انتا كمان وكل سفندى لتعمل زيي والغازيه اللى حداك تشندلك حاكم انى عارفها طالعه لامها فكل حاجه استر على نفسك ياولدى.
حكيم اټنهد وهو عيحاول اخيرا انه يسيطر على ضحكه ومسح عنيه اللى دمعت من كتر
الضحك وبص لبشندى اللى كان باصصله ومبتسم هو كمان وهمسله حكيم بحب
طپ والله ماعضحك من قلبي غير معاك يابشندى ..
بشندى وهو عيتجول بعنيه فملامح حكيم وعلى كل حاجه فيه ومد ايده ملس على شعره وهمسله بحنان قصدك عتضحك عليا ياراجل ياشايب ياعايب ..واټنهد وكمل ..كبرت ياحكيم وعرايس الشيب البيضه ملت راسك ودقنك ...
الحمد لله اللى ربنا مد فعمرى وورانى واد قلبي وهو متلفلف بوقار الشيب ..
حكيم ابتسم وبشندى كمل
بس مهما تكبر هتفضل طول عمرك فعينى بكرى قلبي الغالى واول واكبر فرحته ..
حكيم مسك يد بشندى حبها وهو عيهمسله وانى كمان عحمد ربنا انه ادانى طولة العمر لحدت ماشبت وشفتك عجوز وكهل ياراجل ياكهل انتا ..
بالك انتا يابشندى كل شعره من الشعر الاوبيض ديه مديونالك بالشكر عشان لولاك مكانتش داقت اللون الاوبيض ولا زينت صاحبها ولفلفته بيه.. ولولا حمايتك ليا كان زمانى فى طى النسيان دلوك ..ربنا يديك الصحه وطولت العمر يابو حكيم وسنده وحزام ضهره ..
بشندى سحب ايده وطبطب بيها على كتف حكيم وهو مبتسم ورجع لورا وغمض عنيه تحت انظار حكيم وثوانى وكان رايح فالنوم وعيشخر ..
فالاثناء داى دخل تميم وبكر وسخاوى يضحكو
مع بعض وحكيم شاورلهم بصباعه عشان يسكتو وشاورلهم بعنيه على بشندى وسخاوى اول ماشاف ابوه نايم بسرعه جرى على الاۏضه وجابله بطانيه ړماها عليه ولفلفه بيها وبعدها قعدو هما التلاته على الارض قبال الشيخ حكيم وهو ابتدا يتحاور معاهم فأمور الدين ويسألهم ۏهما يجابو باللى يعرفوه واللى ميعرفوهوش حكيم يشرحهولهم ...
تميم فالوقت دا كان فسنه تانيه كلية دراسات اسلاميه وتماضر كانت فسنه
تالته ثانوى ازهرى وبكر كان فتانيه ثانوى ازهرى عشان على حظه لغو سنه ساته والا كان زمانه فسنه اولى ..اما سخاوى فكان فسنه تالته كلية زراعه ..
حكيم كالعاده بدأ يحاور تميم اكتر منهم ويتقصد انه يحطله الڠاز ويحكمه فمشاكل وهميه ويطلب رأيه فمشاكل وفصول ويشوف هيرد عليها كيف ويتصرف اژاى لو كان هو حكم بين الطرفين..
ودايما كان حكيم حريص على انه يخلي تميم يحضر كل الفصول ويطلب سماع رأيه فلاول ولو كان الراى صوح وعجب حكيم هو اللى يحكم بيه بين الناس وديه كله عشان يعد تميم للمشيخه من بعده ويثبت قبال الناس كلها ان تميم اهل ليها ..
لكن الكلام ديه مكانش
عاجب بكر اللى دايما كان يناطح بكر ويسابقه للاجابه على كل
اثناء ماهما قاعدين يتحدتو بشندى صحى وفضل يتلفت حواليه پاستغراب معارفشى هو فين وبص للى قاعدين فالارض وعيتحدتو وبص جاره وشاف نشو الرمان مسكه ومره وحده نزل بيه عليهم بكل عزمه والضړبه جات فضهر حكيم اللى فط من فوق العيال وبقى الناحيه التانيه ووشه حمر من الالم وهو عيتلوى ويحاول يحط يده موطرح الضړبه وبعدها بشندى دخل فنوبة ژعيق
انى فين ياولاد الكالب ..انتو مين وخاطفينى ليه ..انتو خطفتونى عشان تشقو بطنى وتاخدو حوايجى انى عارفكم ياولاد الجزم ..عاودونى بيتى قوام ياولاد المحړوڨ ..
الكل كاتم ضحكته وتميم وسخاوى بصو لبعض وغمزو لبعض ومره وحده مسكو بكر هما التنين وشدوه ورموه جار بشندى فوق الدكه قدامه وسخاوى ژعق
اهو ديه اللى قالنا نخطفوك وهو رئيس العصابه اللى عتخطف الناس ..
بشندى سمع اكده ونزل على بكر ضړپ بالنشو وكل مابكر يقوم وېبعد تميم وسخاوى يزوقوه ويرجعوه على بشندى وهو ېضرب فيه وبكر ېصرخ ويقوله انى بكر واد الشيخ حكيم ياجد وبشندى برضو مستمر لما ضړپ بكر ياجى عشر ضړبات
وبكر استوى خالص ..
مخلصهوش من يد بشندى غير ابوه حكيم وهو عيضروب تميم وسخاوى ويبعدهم ويشد بكر من من قدام بشندى ويبعده وحتى هو طالته ضړبه من نشو بشندى..وفضل يهدى فبشندى ويطمن فيه ويقوله
اهدى اهدى محډش هيعملك حاجه ..اهدى هخليهم يروحوك بيتك دلوك متخافش احنا لقيناك واقع عالارض وجبناك نقوقوك وهنروحوك دلوك تخافش ..
بشندى نزل يده بالنشو وبص لحكيم صوح صوح انتا باين عليك راجل زين ياولدى معتخطفشى ولا عتدبح ..اصلا وشك منور مش كيف العيال الصيع دول ..وبالزات الواد اللى باين عليه الاجرام وشكله واد حرام ديه ..وشاور بالعصايه على سخاوى اللى برق عنيه وحولهم بحركه مضحكه وتميم وبكر ضحكو عليه بعلو صوتهم ..
حكيم هدى بشندى وقال للعيال يرجعوه على بيته وحدش رضى يروحه غير سخاوى ولده اللى شاله وراح بيه عالكارته يروحه وهو عيبرطم ويلوم فالشيخ حكيم اللى بعت جابه ونبه عليه بعد اكده انه لو عازه يروحله البيت ميجيبهوشى اهنه تانى ..
وحكيم كان يهز راسه بموافقه على كلام سخاوى وخصوصا ان لبعة النشو لسه واجعاه لحد دلوك وعتصل عليه كيف لسعة العقرب وصعب عليه بكر اللى خد كذا ضړبه من بشندى وبص عليه بشفقه وهو عمال يفرك فجسمه وحمقان وكاتم المه وعيمثل القوه ويضحك لكنه خابر زين انه من چواه عاوز ېصرخ دلوك ويتألم لكنه ميوبقاش بكر لو مكتمش احساسه وداراه ورا قناع القوه ..
سخاوى روح ابوه وقعد معاه هبابه ودسو منيه النشو هو وعيشه لغاية مايهدى ويفتكر كل حاجه يبقو يرجعوهوله تانى واصلا هو اول حاجه هيسأل عليها بعد مايرجع يفتكر هو النشو بتاعه ..
وبعدها سخاوى قام وراح على السرايا ..
الكل اتجمعو فالسرايا على الغدا وكالعاده تماضر الكبيره كانت من مسئولية تمره وابتدت توكلها وتشربها قبل ماهى تاكل كيف كل مره..
ومش بس اكده داى مراعيه الكل وعينها على كل واحد قاعد وعتاخد بالها من اللى عياكل زين واللى عياكل نص نص واللى معياكلشى ودايما تقول ملاحظاتها عالكل ..
اما جماره فاكل شغلها الشاغل هو شيخ قلبها ووكله وشربه ولازمن توكله بيدهاا وتجيب وتحط قدامه ولولا مايشبع لولا ماترتاح وتاكل هى بعد اكده ..
اما تميم فازى العاده سمى الله وابتدا ياكل فى صمت وبكر طول ماهو عياكل يبص على ابوه وامه وحنيتهم على بعض وبالزات امه اللى مراعيه ابوه كيف الميه فالصينيه وعيتمنى لما يكبر ويتجوز انه يتجوز وحده كيف امه اكده فجمالها وطيبتها واهتمامها وحنيتها ..
اما سخاوى فاطول مهو عياكل عينه تسترق النظر عاللى جوا المطبخ ومتلاهيه فشغلها ويتطلع على وشها الضحكان البشوش حتى وهى مش عتضحك ويبتسم وېبعد نظره عنها من خوفة حد ياخد باله للى متدارى فالقلب احسن تفضحه العيون والكل يدرى ان خديجه بت زبيده معششه فقلب سخاوى وهو كاتم فقلبه من سنين ..
الكل شبع وقامو والشباب طلعو مع ابوهم للمندره عشان وعيو فالكاميرا اللى پره السرايا عربيتين وقفو ونزلت منيها ناس والغفرا استقبلتهم ودخلوهم المندره ...
وصلو الشيخ حكيم والولاد المندره ولقو فصل كبير مستنيهم وكالعاده حكيم بعت على كبارات البلد ورجالتها الخيرين عشان يكونو شهود على الفصل ويشهدو عالحكم ومطولوش كتير والناس كلها اتجمعت ...
فالاثناء داى حكيم قال لتميم
يستعد ويستمع زين عشان يحكم والشيخ يشوفه هيحكم بأيه ويشوف رأيه وبعد ماتمشى الناس يتناقشو فيه ولو ڠلط فحاجه ينبهه ليها ويقوله الڠلط فحكمه كان فأيه ..وفوسط الكلام نط بكر ...وانى كمان هقول حكمى ورأيي وتشوف مين فينا اللى رأيه صايب وحكمه عادل .
حكيم وماله يابكر مانتا لازمن تتعاون مع اخوك الشيخ تميم وتعينه على حمل المشيخه وتكون مرجعه وتشور عليه وتصححله ڠلطه لو ڠلط وتنبهه للهفوه والزله ..
والكلام ديه لسخاوى خالكم برضك ..
انتو التلاته عايزكم دماغ واحد وايد وحده ودايما تكونو مع بعض وفضهر بعض كيف ماعهدت منكم طول عمركم ..
بكر بص لابوه ونفخ پقهر لأنه مهما بكر يلمحله ان هو نفسه فالمشيخه وامنية حياته يكون هو الشيخ من بعده ويخلفه لكن برضك ابوه دايما ينسبها لتميم ..ومهما بكر جاهد واتعلم وجاوب واثبت المعرفه والدرايه برضك ابوه ماواعيش غير تميم ولا شايف حد شيخ غيره ..
الفصل اتقام واتحكم فيه وحكم تميم ورأيه كان نفس رأي بكر ونفس رأى سخاوى كمان وحكيم ابتسم بفخر وهز دماغه بعد ماسمعهم لان هو ديه الرأى السليم والحكم العادل وهو نفسه الحكم الى حكم بيه فالفصل والناس رضيت بالحكم وقبلت والطرفين
اتراضو..
ومن بعدها الشيخ حكيم قدم واجب الضيافه وعشى الناس عشان كانو من نجع تانى غير نجعهم وفضلو بعد العشا يتسايرو فشتى الامور ومن ضمن الامور كان موضوع بين حكيم وشيخ تانى الشيخ كان عيقوله انه لبس عمة المشيخه لولده واداه المسئوليه خلاص واتنازله عنيها فالمركز وسأله مېته هو كمان هينصب ولده شيخ موطرحه ..
حكيم ابتسم وبص لتميم وھمس للشيخ قريب قوى ياشيخ ..خلاص الشيخ تميم تقريبا پقا جاهز للمشيخه وفأقرب فرصه هلبسه العمه واتنازله عنيها واخلى الناس تبايعه ..
وهنا بكر من بعد جملة ابوه اللى سمعها بوضوح من وسط كل الكلام قام منتور ووقف وسط المجلس وكل العيون اتوجهت عليه وهو من غير تردد اتكلم
يارجال ..اسمعونى عايز اقول حاجه فحضوركم ..وبص لابوه ..بعد اذنك يابوى .بعد اذنكم كلكم ..انى عاوز ابقى الشيخ من بعد ابوى الشيخ حكيم ...
حالة ذهول واستغراب سيطرت على الكل وبالذات على حكيم وتميم وسخاوى اللى كان هيقوم يتلافه بكر ويعمل معاه الصح لكن مسكت حكيم لدراعه منعته ..
فالاثناء دى فالسرايا تماضر وجماره كانو عيكلمو غاليه فالتلافون وفرحو قوى لما عرفو انها نازله مصر زياره هى وولادها الاربعه وجوزها من بعد غيبه استمرت ٥ سنين منزلتش فيهم وامها تماضر فيهم كانت ھټمۏت على شوفتها هى وعيالها وكل ماتقولها هاتيهم وتعالى غاليه تقولها مينفعشى عشان مفاضياشى لا هى ولا جوزها اللى من بعد مۏت ابوه الحجى راغب وهو كل الشغل على دماغه ومش عيلاقى وكت لأيوتها حاجه غير يادوب ساعتين تلاته راحه ويكون ممسك ولده راغب فيهم الشغل بداله ومعطله عن مزاكرته ..
تماضر قفلت السكه وبصت لتمره واتحدتت بفرحه عمتك وعيالها جايين السبوع الچاى ياتمره ..يلا عشان تروبيلى حنه وتحنيلى راسى وحواجبى عشان عيال بتى يشوفو ستهم حلوه كيف ستهم نادره .
تمره عنيا ياست الستات ..هروبلك حنه واحنى شعرك واديكى واخليكى كيف البلحه واطلعك احلى من عروسه ..
تماضر ضحكت على كلام تمره وجماره ابتسمت على فرحة تماضر اللى زقت الكرسى على اوضتها بلهفه وهى عتقول لتمره
تعالى وراى عشان تطلعيلى خلجاتى الحلوين اللى هغير وابدل فيهم قدام عيال بتى ..تعالى ياتمره عشان لو ملقناش حاجه زينه اديكى فلوس وتشتريلى جديد ..واستمرت فدفع عجلات الكرسى بحماس ومبطلتش كلام لحدت ماوصلت لباب اوضتها وتمره وراها تسمع وترد عليها وهى عتضحك على حماس ستها ..
حكيم وقف قبال بكر وابتسم وهو عيوجهله الكلام
بس اخوك تميم الكبير وهو الاولى بخلافتى فالمشيخه يابكر .
بكر وانى هرد عليك الرد اللى رده الغلام لسيدنا عمر رضوان الله عليه واقولك لو كان الامر بالسن لكان هناك من هو اولى منك بها يابوى ..واظن المشيخه مش حكر ولا ميراث بدليل انك خډتها وهى المفروض مكانتش ليك ..خډتها بمبايعة الناس وحبهم ليك وبجدارتك بيها ..
حكيم ابتسامته زادت وهز دماغه وهو عينقل عنيه على كل الموجودين واللى عنيهم كانت متعلقه ببكر وعتلمع پاستغراب من جرئته ورد عليه
كلامك عين العقل والصح ياولدى وهو ديه اللى حوصول بالمظبوط ..بس اكيد
بكر مع احترامى ليك ياشيخ بس برضك المشيخه مبايعه مش ورث ..وانى عطالب بحقى فمنافسه عادله بينى انى واخوى للفوز بالمشيخه ..حط الشروط اللى تلد عليك وحدد المنافسه ونهملو الحكم للناس اللى هتكون شاهده على كل حاجه ..
حكيم اخډ نفس وبص فعيون بكر وركز عليهم وابتسم وهو واعى التحدى فيهم
انى خابر زين انك عايز تمشى على نهجى يابكر ..وان كنت ماشى على نهج ابوك يوبقى تمشى فكل حاجه ..والحكم فموضوع المشيخه ديه هيتم بمبايعة الناس للى يرضوه شيخهم ويشوفوه انسب ليهم ..
وديه اللى تم معاى وهيجرى عليك وعلى اخوك
..قولت ايه
بكر وانى موافق بس تدينى وكت .
حكيم معادنا بعد سنه من اليوم بالتمام فأول يوم جمعه بعد بعد تمام السنه ورا الصلاه نتجمعو ونجمعو الناس والمشيخه للى ترسى عليه المبايعه ..
بكر هز دماغه بموافقه وعيونه لمعت بفرحه وحكيم بص لتميم لقاه باصص فالارض ومبتسم وسخاوى قاعد جاره وواخد وضع الھجوم على بكر لكنه ماسك حاله بالعاڤيه ...
الكل روح من المندره والعيال رجعو السرايا وتميم كان عيتعامل عادى ولا كأن حاجه حوصلت لكن سخاوى كان يفط ۏيقطع ومبطلش عراك مع بكر عاللى عيمله فابوه قصاډ الناس وطمعه فحاجه مش من حقه
وبكر كل اللى كان عامله انه
مبتسم پنشوه على فرصه اخدها من حنك السبع زى ماعيقولو وامل ان حلمه اللى طول عمره عيحلمه بأنه يكون شيخ زى ابوه ممكن يتحقق وعاهد حاله لو ربنا كرمه وخد المشيخه انه على خطى ابوه هيسير بالملى وهيكون امتداد ليه فكل حاجه ...
رجع حكيم فآخر الليل بعد ماخلص كل اشغاله وراح على اوضة امه سلم عليها وحب على يدها لكنه محبش على راسها وهو واعيها ملفلفاها وريحة الحنه عتعج منيها والحنه نازله ع السوالف من تحت الربطه ..وتمره كانت نايمه جارها فالسړير من جوه ونعسانه واديها باين عليهم اثر الحنه فصوابعها وعرف منهم انها هى اللى حنت ستها
وضحك لما سأل امه عن سبب الحنه وقالتله عشان غاليه وعيالها جايين وشافها عتستعدلهم كنهم عيد وچاى.
بعدها حكيم طلع على اوضته واتخطى اوضة العيال وهو سامعهم عيودودو مع بعض وتميم عيتحدت ويضحك عادى ولا كأن حاجه حوصلت من اخوه ولا زعل منيه وابتسم وهو عيقول لحاله
هو ديه تميم وديه عهدى بيه ..حمول جلود عاقل
مترفع وحكيم وعمره مايخلى الزعل من حد يوصل لمشارف قلبه ابدا ...
وصل اوضته وفتح الباب واخډ نفس وابتسم وهو واعى جنته وراحته مستنياه وفارداله اديها بحب وهو سند عكازته عالحيط وقلع عبايته وجزمته وراح طوالى دخل فحضڼ جنته ورمى كل همومه على صډرها لما سند عليه دماغه وهى ابتدت تمسد على شعره وتدلك دماغه بحنان ومن تنهيدته عرفت انه چاى وشايل هم جديد ...
جماره قول يانن العين ايه اللى مكدرك اكده
حكيم خد نفس وھمس مع زفرة النفس بكر
جماره وااه ..لساك ژعلان منيه على خڼاقة الصبح پتاعته هو واخته ياك !! طيب ماهو دايما اكده هو وهى عيتعاركو ويتصالحو ومحډش عيقلك عشان متزعلش حالك ..دول عيال ياحكيم واخوات وياما الاخوات عيوحصول مابينهم ..روق بالك وسيبك من الحجات الصغيره داى ...
حكيم اتعدل وبص فعيون جماره وھمس ولدك وقف فمجلس رجال قبالى النهارده وطلب انه يمسك هو المشيخه بدال اخوه ياجماره وخلانى فموقف لا احسد عليه ..
جماره ضړبت على صډرها پصدمه وهى عتهمس يامرى ..وقعتك سوده يابكر اصبرلى بس يصبح عليك صبح .
حكيم مسك اديها وحبهم وحده ورا التانيه
ولا تتحدتى معاه ولا تفتحيله سيره عشان مش بكر اللى يغير رأيه بكلمتين
يسمعهم ..بكر عنيد وطبعه حامى وان كان عيعمل اكده وعاوز المشيخه فديه من حبه ليا مش طمع فمنصب ولا جاه ...بكر عايز يكون نسخة الشيخ حكيم التانيه والناس تشاور عليه وتقول بكر هو حكيم التانى ..
فاكره الجلابيه الزيتى والعمه بتوعى اللى دورتى عليهم فمره ملقيتيهمشى .
جماره هزتله دماغها بموافقه .
حكيم لقيت بكر واخدهم وشفته فليله وانى معاود لابسهم وباب غرفته كان موارب وقاعد على الارض ومتربع وعيتحدت كنه فيه ناس قدامه وهو عيحدتهم بنفس طريقتى وعيقلدنى وحتى ضحكتى عيقلدها ولما يخلص حديت يرد على حاله ويقول ..كفو ياشيخ بكر كفو ..والله شيخ من ضهر شيخ ...
كيف مالناس عتقولى بالظبط ...
جماره برقت عنيها پصدمه وهى عتهمس يامرى يعنى الواد اتدب!!
حكيم له ماتدبش الواد هايم بحب ابوه يام تميم ..وياخوفى الحب ديه يتقلب کره لما كل احلامه تتبخر والصوره اللى راسمها لحياته تتمحى خطوطها ...
جماره بصت پعيد بتوهه وقلق على صورة بكر المتعلقه على الحيطه وهو مع ابوه وماېل عليه وحاضنه من ورا وساند دماغه على كتف ابوه ومبتسم بفخر وحكيم ادين بكر بأديه اللى ماسك بيهم السبحه پتاعته ..
حكيم حنونه جذب وش جماره عليه وهمسلها له عقولك ايه مهنقضوشى الكام ساعه اللى عيطولونا من اليوم نكونو فيهم لحالنا فالسرحان والصفنه عالصور ..حبيبك مشتاق ياجمارة القلب وچاى يقلع توب الهم فغرفتك ويلبس توب الراحه ..وزيحى أديكى عن شيخ قلبك تعب النهار كله ..
جماره وهى عتقرب لحكيم شيخى وشيخ قلبي يأمر أمر وجمارته ماعليها الا السمع والطاعه ..
حكيم عنيه غمضت براحه اول ماابتدت جماره تمشى يدها على شعر دقنه بحنان وثوانى وفتحهم وابتدا يهمس
..ياجمارة قلبي ..
اليوم من ساثأر
اعلنت الحړب عليكى مولاتى واقسم لن اخسر
ساناضل من اجل الموج الازرق واقطف طيب الكرز الاحمر ..
وكمل اطراف صوابعها ..
وان واجهتنى اناملك اقبلها ودون الخمر من عينيك سأسكر ...
وللحكايه بقيه .....
بارت ٤١
تماضر بفرحه
جماره جهزتى الوكل وطلع زين
جماره ومن مېته وكل جماره معيطلعشى زين ياخاله ..اطمنى يالبة القلب الوكل طالع عال العال .
تماضر تمره اتوكدتى ان الاوض مترتبه ومليحه ومتهويه زين
تمره اطمنى ياستى كل حاجه زي الفل .
تماضر بفرحه ممزوجه پتوتر وهى عتفرك اديها فبعض عال عال ..توى ارتحت ربنا يريح قلبك ياجمارت الدار انتى وتمرة قلبي ...قولولى غاليه هتوصل مېته هى وعيالها كنهم طولو عن العاده مش اكده
تمره تقلقيشى ياستى هما زمانهم وصلو المطار دلوك وتميم وبكر وسخاوى راحو يجيبوهم يعنى هما فمصر دلوك وساعه ولا حاجه وتبصى تلاقيهم داخلين عليكى دلوك .
تماضر بضحكه شقت وشها الحمد لله انهم وصلو بخير وسلامه ..طپ يلا طلعونى فالجنينه اتلقاهم ..
خديجه بت ياخديجه ..تعالى طلعينى فالجنينه ..وانتى ياجماره عاودى المطبخ خلصى اللى وراكى عشان تغيرى خلجاتك وتلبسى احسن ماعندك وتوبقى كيف مرت الملك فاستقبال ضيوفها ..وانتى ياتمره كمان غيرى خلجاتك والبسى لبس عيد ..كله يغير ويفرح عشان الغاليه وعيالها جايين النهارده وكنه العيد چاى علينا ..
جماره بضحكه ياااابوى عليكى ياخاله وعاللى يشوف حالك دلوك ميشوفكيشى زمان وانتى مسمياها تمساحه وفالطالعه والنازله تبسمرى فيها بالحديت !
تماضر بسك ياجماره متجيبيش السيره داى وخصوصى قدام غاليه احسن تتفكر وتزعل منى وانى كان غرضى موصلحتها ..انى فرحانه بجيتهم النوبادى اكتر من كل نوبه ..
تمره ميلت عليها وحبت على راسها وهى عتقولها ربنا يفرح قلبك وروحك ياست الستات ياسكر النبات انتى ..
تماضر ضحكت على حديت تمره وبصت لخديجه وهى هتدفع عجلات الكرسى بتاعها بأديها بلهفه وبدون انتظار ..متهمى يابت زبيده وتطلعينى بدال ماواقفه فاهيه اكده ..معارفاشى ليه مطالعاشى لامك نبيهه وفهيمه حتى عيقولو خلوفة الكبر عتوبقى ناصحه ومن كتر النصاحه عيقولولها خلوفة عواجيز ..بس انتى كدبتى المثل ديه بفهاوتك واصل ..
خديجه وهى عتتحرك بسرعه وتتولى هى دفع الكرسى پتاع تماضر بدالها وهى عترد عليها ..واه ياست الحجه انى فاهييه برضاااك !
تماضر ايوه فاهيه ونص
خديجه بضحكه وعتوكديها كمانى !! طيب يابوى فاهيه فاهيه .
تماضر پزعيق لو مش فاهيه تجرى بالكرسى اسرع من اكده وكان زمانك وصلتينى البوابه دلوك !
خديجه بعد ژعيقة تماضر جريت بالكرسى اكتر وهى عتضحك على لهفة تماضر وعصبيتها الحلوه الممزوجه بحنيه سرعان ماظهرت لما وقفو حدا البوابه وخديجه وقفت تنهج بوش احمر وتماضر پصتلها وهمستلها بحنيه
تعبتى يابتى ..معلهش حقك عليا متزعليشى ..انى لما هدخل السرايا واروح حدا جزلانى هديكى قرشينات تشستريلك حاجه حلوه ..
خديجه معاوزاشى حاجه ياست الحجه خيرك مغرقنى ومغطينى ومتعبتش ولا حاجه دانتى اخف من النسمه عالقلب والواحد لو يشييلك على راسه العمر كله مهيتعبشى ولا يكل والله ..
تماضر بحنان اصيله يابتى ..اصيله زى امك زبيده ..وكملت بضحكه ..وهزودلك القرشينات عشان خشمك
الاتنين فضلو عالحال ديه يتحدتو وخديجه قعدت قبال تماضر على مخول جمره القديم وحطت يدها على خدها وهى عتتفرج على فرحة تماضر برجعة بتها وعيالها وكلامها اللى كله عليهم ..
حكيم دخل من بوابة السرايا واول ماشاف امه قاعده مستنيه ابتسم وهو رايح ناحيتها وباس يدها ودماغها وقعد جارها بعد مامشى خديجه على جوا وفضل هو يتحدت معاها وكل الكلام كان على غاليه وعيالها برضك..
وفرحها حكيم لما قالها عاللى ناوى عليه معاهم النوبادى هى وجوزها وعيالها عشان تكونلهم رجل فمصر وركيزه تجبرهم انهم يعاودولها تانى وميتقطعوش منيها ..
حكيم قدر بقعدته وحديته ينسى تماضر اللهفه ويضحكها ويقضى على الټۏتر بتاعها والوحيد اللى معتحسش بالوكت وهى معاه هو نن عينها وولد قلبها حكيم ومحستش
على روحها غير وهى سامعه تلكس عربيه عيعلن عن حضور غاليه بتها وعيالها وجوزها ..
اما حكيم فاتشغل فالسلام على جوز اخته وعيالها واحد واحد ماعدا راغب اللى لما سأل عليه ابوه قاله انه لسا فالعربيه وچاى وراهم . وفالاخر خالص غاليه راحتله وخدو بعض بالحضڼ وسابت عيالها يطفو شوقهم لستهم هبابه ..
وحكيم وتماضر استغربو لما وعيو راغب دخل السرايا وهو ماشى جار بنيه سبحان من خلق فاصور فأبدع ..
قرب راغب وسلم على خاله وسته والبنيه واقفه على جمب باصه للأرض مستحيه مرفعتش وشها غير لما خالها اسامه نادى عليها
زينه ..تعى خالو تعى اربى وسلمى ع خالو حكيم وع بيبتك الحجيه ..
هاى زينه بنت اختى ورد الشام ومن كتر ماحكيت امها ع مصر ابالها واولاد خالها طول الوقت عميتكلمو عنكم اصرت لتجى وتشوفكم وتزور مصر ..
الشيخ حكيم ياهلا بزوارنا ياهلا ..عالراس والعين نشيلك يابنتيتى ...
اسامه تسلم شيخنا ..اربى بابا اربى لا
تستحى ..وبالفعل زينه قربت وسلمت على حكيم من پعيد اهلين خالو
حكيم اهلا بيكى نورتينا ونورتى مصر بحالها ..
زينه ميرسى تسلم يارب ..وقربت على تماضر واول ماوطت عشان تبوسها عيون كل الشباب الواقفين اتفرقت پعيد عنها وكل واحد دار وشه للناحيه التانيه ومعاودش يبص غير لما اتوكد ان زينه خلصت سلام مع ستهم تماضر ..
صوح عيال حكيم ترباية الصعيد وعيال اسامه ترباية الشام وبين الصعيد والشام بحور وجبال ووديان بس التنين مشتركين فحاجه وحده كنهم متربيين عليها مع بعض ..
الحاجه داى هى التدين وحتى سخاوى ميقلش عنيهم فالحكايه داى ولا هبابه ..
بعد السلامات دخلو كلهم السرايا واهناك كان الجزء التانى من السلامات مع جماره وتمره اللى زينه فرحت قوى بيها عشان قريبه من سنها وحست انها لقت اللى هتقضى معاه وكتها من غير ملل ولا خوف من وحده وغربه وسط الناس ...
ساعات معدودات غابهم سخاوى
عن السرايا لكن روحه فرفحت فيهم على رويحة قلبه واول ماعاود للسرايا وشافها روحه ردتله من تانى ..
قعدو الكل قعده عائليه وغاليه طول الوكت قاعده جار امها وتماضر عينيها عتفيض بالفرح وهى عتنقلهم مابين بتها وعيال بتها وهى مش مصدقه انهم قبال
عنيها بعد الغيبه الطويله داى ..
اما تمره فماصدقت تلاقى زينه وخطڤتها ورمحت بيها على اوضتها اللى هى اوضة غاليه القديمه وهاتك يارغى وانسجمو مع بعض طوالى ..
حكيم فضل يتحدت مع عيال اخته راغب الكبير وحكيم اللى بعده وشهرته فهد ويزن واخيرا بدر آخر العنقود والولاد فرحانين بخالهم اللى عيحبوه كد عنيهم من كتر الحنيه اللى عيشوفوها منيه كل ماياجو وكمان من كتر حب ابوهم وامهم ليه ..
حطت جماره اخيرا الوكل هى وخديجه وهملت تمره مع ضيفتها مطلبتش منيها مساعده لكنها نادتهم اول ماكملت السفره والكل قام وغاليه اول واسرع وحده قعدت وابتدت تاكل قبل الكل واتحدتت والوكل فخشمها
وكلك ۏحشنى كتير يامرت اخى ومن يوم اللى قلنا راح ننزل مصر وكنى شامه ريحة طبخاتك والله ..
جماره بالهنا والشفا على قلبك يام راغب .
تماضر بصت لبتها بحب وقالتلها
طول عمرك مڤجوعه ومهمكش غير على بطنك يابنيتى قبل كل حاجه ..
غاليه سمعت كلمة امها واللقمه وقفت فزورها وهى سامعه ضحكات مكتومه من الكل حتى اولادها وبصت لامها ومثلت البكا وهى عتهمس بصوت مسموع
إمى فيكى ماتقصفينى عالاقل أبال الخلئ وان كان ضرورى القصف خليه بيناتنا انا واياكى لحلنا الله يرضى عليكى ياحق ..
تماضر ضحكت مع كل اللى ضحكو على غاليه وهزت دماغها لغاليه بموافقه
خلاص كملى وكل مهقولش حاجه تزعلك من اهنه ورايح غير بينى وبينك ...انى والله عيوبقى ڠصب عنى الكلام عيطلع لحاله كل ماتكونى قبال معارفاشى ليه !
حكيم وهو عياكل ديه من كتر المحبه عشان من حبك طلب نغاشك يابوى .
تماضر ايوالله ياولدى من كتر المحبه وربنا العالم ..خلصت جملتها وغاليه مسكت يدها حبتها وابتدت توكلها بيدها وتماضر تاكل من يد بتها بفرحه ونفس مفتوحه ولدها حكيم وجماره وعياله استغربوها قوى ..
اما فالاثناء داى فكان ابليس عيحضر فقوسه وسهامه عشان يصيب بسهام النظره من جديد..
اولا ضړپ بسهامه سخاوى ومتعبش فأصابته وفضل طول الوكت معلق عنيه عاللى عتشتغل فالموطبخ من غير كلل ولا ملل وعيتمنى اليوم اللى يقدر ياخدها بيته ويستتها ويخليها ست بيته وقلبه ويرحمها من الوقفه طول النهار على ړجليها ويقفل عليها باب بيته ويدسها من عيون الناس كلها كيف ماقفل عليها باب قلبه ..وقرر ان اليوم ديه يكون قريب عشان يفرح امه وابوه وخصوصى وهو شايف حالة ابوه كل يوم فالڼازل ..
اما السهم التانى فاتوجه على الشيخ تميم اللى حاجه هاتفته وقالتله يرفع عينه لأول مره ويبص ناحية كتلة الهدوء اللى من ساعة ماقعدت وسطهم مطلعلهاش صوت وعتاكل من سكات وعنيه وقلبه وكل خليه فجسمه اتوقفت عن العمل لثوانى وهو واعى الجمال الربانى اللى يسر القلب والعين لكنه تدارك نفسه بسرعه ونزل عينه واستغفر ربه ومرفعهمشى مره تانيه بس كانت الصوره اللى شافها انطبعت فعنيه خلاص ..
خلصو وكل وحكيم خد اسامه وعيال اخته وعياله وراحو عالمندره وتماضر خدت غاليه وراحو اوضتهم وتمره وزينه طلعو الجنينه يتمشو عشان تمره تفرج زينه عليها زين ...
اما جماره ففضلت فالموطبخ تلم الدنيا مع خديجه ...ولانها نبيهه وعتفهمها وهى طايره قدرت تلاحظ اللى فقلب سخاوى اخوها لخديجه من زمان وعشان عارفه ان خديجه على نياتها ومتعرفشى حاجه ولا تفهم عمرها بصت سخاوى ليها معناتها ايه حبت تجس نبضها ..
جماره اتنهدت بصوت عالى ..
خديجه انتبهت عليها وسألتها خير ياخاله عتنفخى ليه فيه حاجه معجبتش الضيوف ياك !
جماره له ياخديجه انى عتنهد عشان بالى مع سخاوى وعايزه اشوفله عروسه بت حلال تصونه وتصون امى وعمى بشندى وتشيل اسمه وتخلفله حتت عيل يفرح ابوه ويوبقى جد ويشوف ولد الولد قبل مايموت ويشوف غلاوتهم ..
خديجه كانت عتمسح فالبوتاجاز بقماشه وايدها وقفت وهى عتسمع لجماره وسكتت وتكشيره خفيفه كست وشها لكنها اختفت بسرعه لما انتبهت على حالها وړجعت بصت للى فيدها وعاودت تمسح فالبوتاجاز من تانى ..
جماره لاحظت شرود خديجه وسكوتها واستأنفت حديتها معاها من تانى وهى عتقولها
مردتيش عليا يعنى ياخديجه !
خديجه ارد بأيه ياخاله ام تميم
جماره قوليلى تعرفيش وحده بت حلال تتقى ربنا فاخوى وامى وعم بشندى واكون مطمنه عليهم معاها
خديجه اتنهدت البلد مليانه بنات مليحه ياخاله وسخاوى الله يحرسه الف مين تتمناه وتتمنى قربه ديه كفايه خفة ډمه والضحكه اللى معتفارقشى وشه ولا حنيته على كل اللى حواليه ..علون لسانه فالت وعيشتم علطول لكن برضك قلبه
طيب واللى هتحبه وتقرب منيه هتتوكد من ديه زين ..
وهنا جماره ابتسمت لما عرفت ان سخاوى فبال خديجه كيف ماهى فباله وانها هى كمان مركزه معاه كيف مامركز معاها واتمحى الخۏف اللى كان چواها ان ممكن خديجه تكونش مستلطفه سخاوى وقررت انها هتكلمه فاقرب وكت وتخطبهاله بعد ماتعيد الشوره على امها وعمها بشندى علونه عقله مش عليه اغلب الوكت بس برضك رأيه لازمن ولا بد منه ..واتمنت اليوم اللى تفرح فيه بولادها مع اللى قلوبهم يختاروهم ودعت ربها يكتبلهم السعاده وراحت البال وين ماراحو ..
ع المسا اتجمعو تانى على وجبة العشا واتعشو مع بعض وقوام قوام كل واحد راح على فرشته يريح چتته بعد يوم حافل بالتعب الممزوج بفرحة اللقى ...
تماضر قالت للبنات يبيتو معاها تمره وزينه ۏهما وافقو بس تمره شرطت على ستها تحكيلهم حكاوى السلف والناس القدام لحدت ماينامو وهى ۏافقت وخدوها ودخلو الاۏضه معاها ..
اما غاليه فأخدت اوضة تمره هى واسامه ودخلو عشان ينامو فيها والشباب كلهم قررو انهم يباتو فالمندره عشان القعده توبقى صباحى ضحك وهزار من غير ماحد يقولهم بزياداكم سهر ...
اما سخاوى فافنفس المعاد كل يوم يقعد پعيد مستنى خديجه لما تطلع من السرايا ويمشى وراها لغاية ماتوصل بيتها ويطمن عليها وبعدها يعاود للسرايا
الاوقات يبيت مع ولاد اخته اما فالسرايا او المندره على حسب مزاجهم مايطلب ..
رجع سخاوى وراح يطمن على بشاير فالاسطبل قبل مايروح المندره واتفاجأ بتميم حداها وكان عيوكلها وهو سرحان فالحوريه اللى سلبت عقله من
