اخد ورثي
أخد ورثي و اتجوز عليا أخت مرات اخوه، مش بس كدا، دا كان عايزني هو و الست والدته انزل أقعد بولادي في البدروم و هو يجيب الهانم بتاعته في شقتي. بس أنا لعبتها صح و عرفت أخد حقي كويس
يا بابا حرام عليك.. أنا مش قولتلك ماتديش لسامح جوزي أي فلوس؟ أنت اللي اديتله الفلوس من نفسك، بتحاسبني أنا دلوقتي ليه؟ أجيبلك منين أنا ٢٥٠ ألف جنيه أسددهم لك؟ هو أنا كنت شفت منهم مليم!
الحاج جابر قام وقف بعصبية، ووشه بقى أحمر زي الدم، وخبط بإيده على الترابيزة خبطة هزت كوبايات الشاي
يعني إيه أجيبلك منين؟ وأنا لما أديت الفلوس لسامح ده، مش عشان هو جوز بنتي؟ مش عشان قعد يتمسكن ويقولي التجارة واقفة والبيت محتاج؟ كنت فاكر إني بستر بنتي وبسند جوزها، أتاريني آمنت لحيوان لا قدر وقفتي جنبه ولا شال المعروف!
بصتله هناء بكسرة وهي بتمسح دموعها بطرف طرحتها
يا بابا أنت عارف سامح وطبعه، وعارف إن إيده مخرومة ولسانه حلو في الكلام.. أنا حذرتك، قولتلك بلاش يدخل في تجارة هو مش قدها، قولتلك سيبه يعتمد على نفسه، قولتلي لا ده جوز بنتي الكبيرة وعايز أشوفه ناجح. دلوقتي أنا اللي بدفع الثمن؟
أيوه هتدفعي الثمن يا هناء!.. الحاج جابر صوته علي أكتر وبدأ يروح وييجي في الصالة بنرفزة نهجت صدره
أختك دنيا خلاص عريسها حدد ميعاد الفرح والناس داخلين على طمع، وعايزينا نجهز كل حاجة بالنص، وانا مش هضيع عريس مهندس و من عيلة زي دا من ايدي بسبب جوزك و عمايله! أجيب منين أنا؟ أنحت في الصخر عشان أجوز واحدة، والتانية تدي شقايا لجوزها يضيعه في الهوا؟ ٢٥٠ ألف جنيه يا هناء! دول مش فكة، دول حصاد عمري اللي
هناء بدأت تنهار وصوت شهقاتها علي
وأنا ذنبي إيه يا بابا؟ أروح أسرقه؟ أروح أقتله عشان أجيبلك الفلوس؟ ده حتى مابيدينيش مصاريف البيت، وعمال يتهرب مني ومنك، وكل ما أفتح بوقي معاه يقل أدبه ويقولي أبوكي أداني الفلوس جدعنة منه، لما يرزقني ربنا هبقى أردهم.. أعمل فيه إيه؟ أطلق منه وأخرب بيتي عشان ترتاح؟
الحاج جابر وقف قدامها وبصلها بجمود
لو ده الحل عشان الفلوس ترجع، اعمليه! أنا مش هضيع مستقبل دنيا عشان خاطر واحد فاشل زيه. اسمعي يا هناء، قدامك أسبوع واحد.. تروحي لسامح، تطلعي الفلوس دي من تحت الأرض، يبيع المحل، يبيع الهدوم اللي عليه، يتصرف! وإلا والله العظيم لا هعرفك ولا هعرفه، وهجرجره في المحاكم بوصلات الأمانة اللي معايا، وهحبسه، وساعتها ما تجيش تعيطي وتقولي جوزي وأبو عيالي.
هناء رمت نفسها على الكنبة وهي بتعيط بحرقة وتلطم على حظها
حرام والله اللي بيحصل فيا ده.. نار جوزي وطبعه الزفت من ناحية، وقسوتك عليا يا بابا من ناحية تانية.. دنيا هتتجوز وتفرح، وأنا اللي هشيل الشيلة وأعيش في سواد؟ ليه دايما أنا اللي بدفع تمن غلطات الكل؟حكايات نورهان العشري
الحاج جابر سابها ودخل أوضته ورزع الباب وراه، وسابها غرقانة في دموعها، مش عارفة تروح فين ولا تعمل إيه، وشريط حياتها مع سامح بيمر قدام عينيها؛ راجل ما بيعرفش غير الأخد، وأب ما بيعرفش غير الحساب، وهي في النص.. الحيطة المايلة اللي الكل بيسند عليها لحد ما قربت تتهد روحت بيتها وهي منهارة و أول ما دخلت اترمت في الكنبة و دموعها مبتنشفش و جابت تليفونها
سامح بضيق وهو بيبص للشاشة
يووه.. الست دي مابتفصلش! قولت مية مرة مية مرة مابحبش النكد وأنا بره البيت مش كفاية وانا جوا
ريهام بابتسامة خبيثة وهي بتقرب منه
ما ترد يا روحي، تلاقي أبوها كلمها عشان الفلوس تاني.. مش قولتلك بلاش تاخد من الراجل ده؟ أهو هيقرفونا بقى.
سامح بيفتح الخط بزهق
ألو.. أيوه يا هناء! فيه إيه يا يا هانم داخلة فيا شمال ليه كده؟ أنا في الشغل، مش فاضي للهري بتاعك دا.
ريهام بتكتم ضحكتها وهي سامعة صوت شهقات هناء من السماعة، وبتبدأ تمشي صوابعها على كتف سامح بدلع، وسامح بيغمزلها بعينه وهو بيكمل كدب.
هناء بصوت منهار
شغل إيه يا سامح؟ بابا بعتلي النهاردة و بهدلني و كان هيطردني من البيت! بيقولي قدامك أسبوع والفلوس ترجع وإلا هيحبسك. ال ٢٥٠ ألف جنيه يا سامح، بابا عايزهم عشان يجهز دنيا.. أنت عملت إيه في الفلوس؟ رُد عليا بدل ما أنا بكلم نفسي كده!
سامح بيبلع ريقه وبيبص لريهام اللي بتشاورله على الساعة
يا حبيبتي. اهدي بس. أبوكي ده راجل طيب وعارف إني مش هاكل عليه ماله، بس السوق نايم. أنا والله ما بنام الليل عشان خاطرك أنتي وعشان أرفع راسك قدامهم.
ريهام بتقرب من ودنه وبتهس بصوت واطي جداً
قولها إنك في اجتماع و مش فاضي،
سامح بيكتم الضحكة وبيبعد التليفون شوية
هناء صراخ مكتوم
ترفع راسي؟
سامح بسرعة وانفعال مصطنع عشان يقلب الترابيزة عليهاحكايات نورهان العشري
أنتي اتجننتي يا هناء؟ نفس إيه وحركة إيه؟ بقولك في المكتب والناس عمالة تروح وتيجي والمراوح شغالة! أنتي بدل ما تسنديني، قاعدة تتهميني وتسمعي كلام أبوكي اللي عايز يخرب بيتنا؟ اسمعي يا بت الناس، أنا كام يوم وهفركش المصلحة دي وأجيبلك الفلوس، بس اصبري عليا.
ريهام بصوت مسموع قصداً وهي بتهمس ببرود
هتاكل إيه يا حبيبي؟
هناء سكتت فجأة وصوتها بيترعش
مين دي؟ سامح.. فيه صوت واحدة ست جنبك.. أنا سمعتها! مين اللي معاك يا سامح؟ رُد عليا!
سامح بينتفض من مكانه وبيبرق ل ريهام تسكت، وبيزعق في التليفون
واحدة مين؟ ده صوت الراديو يا هناء! أنتي شكلك أعصابك باظت خالص وهتخرفي. قفلي دلوقتي، قفلي عشان المدير بصلي بصة مش تمام، ولما أرجع نبقى نشوف حكاية الهلاوس اللي عندك دي.
سامح قفل سامح السكة بسرعة وهو بينهج وبيلتفت ل ريهام بعصبية مخلوطة بضحكة
يخرب بيتك يا ريهام! كنتي هتودينا في داهية.. البنت كانت هتقفشني!
ريهام ببرود وهي بتقوم تظبط لبسها
ماتعرف يا روحي، إيه المشكلة؟ ما هي كده كدة هتعرف إننا متجوزين، ولا أنت ناوي تفضل مخبيني في الشقة دي كتير؟ وال ٢٥٠ ألف بتوع أبوها دول أعمل حسابك انك مش هتاخدهم دلوقتي. دول دخلوا خلاص في الشغل، و الشغل دا على تقيل. مينفعش نطلع عيال قدام الناس اللي اتفقنا معاهم!
سامح بيسحبها لحضنه بضحكة ندالة
لا
