رواية اين ملجأي الفصل الثاني 2 بقلم زينب محروس
مسحت دموعها و قالت: مش هكمل مع خالد يا مريم
مريم شهقت ب صدمة و قالت:
- بتهزري يا يارا؟
يارا بإصرار:
- لاء مش بهزر، انا فعلاً مش هقدر اكمل معاه، مش هقدر اثق فيه تاني.
مريم حاولت تغير رأيها فقالت:
- يارا يا حبيبتي فكري كويس، مش فاضل غير شهرين على فرحكم.
يارا بحزن:
- لو فاضل ثانية ع الفرح بردو مش هكمل، خلاص خالد نزل من نظري و مبقتش أشوفه غير واحد خاين، لو آخر راجل في الدنيا مستحيل اكمل معاه.
مريم بحزن:
- طب وحبك ليه يا يارا؟ هتقدري تتخطيه؟؟
اتحركت يارا خطوتين بعيد عن صاحبتها و قالت:
- و مش هقدر ليه؟ إذا كان هو مفكرش فيا و هو بيعمل كدا و لا فكر في مشاعري، يبقى انا هفكر فيه تاني ليه!
مريم اتنهدت و قالت باقتناع:
- خلاص اعملي اللي تشوفيه صح.
يارا بسرعة:
- بس خلي بالك يا مريم اوعى حد يعرف الكلام اللي انا قولته ده، و لا حتى اي حد من اهلي، انا اتكلمت معاكي بس عشان كنت محتاجة اتكلم مع حد و افضفض.
مريم باستغراب:
- يعني مش هتقولي لأهلك ع السبب الحقيقي ؟
- لاء
مريم باعتراض:
- يعني ايه لاء؟ ما لازم يكون في سبب للانفصال و خصوصًا إن مبقاش فاضل ع الفرح غير شهرين.
يارا رجعت قعدت جنبها تاني و قالت:
- لو اهلي عرفوا السبب الحقيقي احترامهم ل خالد و صورته الحلوة في عيونهم هتتغير و أنا مش عايزة كدا.
مريم ضيقت عيونها
- متأكدة يا يارا انك هتقدري تعيشي من غيره؟ دا بالرغم من إنه خائن بس لسه مهتمة بصورته في عيون اهلك.
يارا بتبرير:
- انا مش قليلة الأصل عشان انسى حبي ليه أو إنه كان كويس معايا في الفترة اللي عرفته فيها، و في نفس الوقت مش هقدر اسامح و أتقبل اللي حصل دا عادي لانه معملش حساب ل ربنا و لا حساب مشاعري.
خلصت كلامها و استخدمت فونها بسرعة و رنت عليه، ف مريم سألتها:
- بتعملي ايه؟
- برن عليه عشان اعرفه اني مش هكمل.
- طب مش تصبري لحد ما تكلمي والدك الأول و هو بقى ينهي الموضوع.
- ما هو بابا و ماما عند خالتي لما يرجعوا بقى هتكلم معاهم و اعرفهم إن خلاص انا و هو اتفقنا ع الانفصال، عشان محدش فيهم يحاول يرجعني في قراري.
قبل ما مريم تتكلم تاني، كان خالد رد ع المكالمة، ف يارا بعدت عنها عشان تتكلم، فهو قال:
- صباح الخير يا حبيبتي، عاملة ايه؟
يارا بحزن: كويسة الحمدلله، انت عامل ايه؟
خالد بمرح:
- انا الحمدلله زي الفل يا حبيبتي، بس انتي وحشتيني على فكرة.
يارا بصوت مكتوم:
- شكرًا
خالد بضحك:
- ماشي يا ستي شكرًا، اكلتي؟
- ايوه
- طيب بتعملي ايه كدا ؟
يارا بعدت الفون شوية و أخدت نفس طويل عشان تمنع نفسها من العياط، و بعدين ردت:
- قاعدة مع مريم صحبتي بنتكلم.
خالد بمشاكسة:
- يادي مريم اللي كل مكالمة موجودة فيها.
يارا سكتت مردتش فهو
- ايه يا حبيبتي روحتي فين؟
ردت يارا بهدوء عكس البركان اللي جواها:
- موجودة اهو..
اتنهد خالد بحزن و قال:
- اتخانقت النهاردة مع المدير و مضايق اوي.
- ليه؟
- مفيش عمل اجتماع مفاجئ و أنا مكنتش اعرف و كنت في الموقع ساعتها بتابع العمال ف لما رجعت الشركة شدينا مع بعض.
- اها، يلا خير متزعلش نفسك.
- يلا الحمدلله، هقفل دلوقت يا حبيبتي عشان اشوف شغلي و هكلمك كمان شوية، خلي بالك من نفسك.
يارا قفلت المكالمة و رجعت ل مريم تاني اللي كانت بتبصلها بفضول و قالت:
- ها قالك ايه؟
يارا دموعها نزلت و قالت:
- مقدرتش أقوله، مقدرتش انطق و أقوله عايزة ننفصل، مقدرتش، انا قلبي واجعني اوي يا مريم.
مريم فضلت معاها طول اليوم بتحاول تهون عليها و تخرجها من اللي هي فيه، و تاني يوم كان أول يوم ليهم في شغلهم ك مهندسات معمار.
دخلوا الاتنين الشركة كانت مريم لابسة ادناء، أما يارا ف كانت لابسة فورمال و سايبة شعرها منسدل على كتفها و حاطة مكياچ خفيف عشان تداري الهالات السودا اللي تحت عيونها و آثار الشحوب اللي على وشها.
في حين إن مريم كانت ماشية بتتكلم بحماس و مفكرة إن يارا ماشية جنبها، كانت يارا واقفة و عيونها متعلقة ب شيء فى ديكور الشركة كانت متفقة هي و خالد إنهم يعملوا زيه في شقتهم، و فجأة نست هي فين و شردت بتفكيرها في الذكريات و بدأت دموعها تنزل بدون وعي منها.
ثواني معدودة
- حضرتك كويسة؟ دموعك دي ليه؟ اقدر اساعدك في حاجة؟؟
لفت نظرها دبلة في ايده الشمال، ف بسرعة اتغيرت ملامحها للغضب و قالت:
- و انت مالك؟ احترم مراتك اللي قاعدة في البيت و متعرفش حاجة عن قلة ادبك و وقحتك دي.
بصلها عمر بصدمة و قال:
- انا قليل الادب؟ انا وقح؟؟
يارا بتأكيد:
- ايوه انت.
عمر اتكلم ب حاجب مرفوع:
- لاء دا انتي كدا عبيطة بقى! انا الغلطان إني حبيت اساعدك لو عندك مشكلة.
يارا بنفور:
- كلكم شبه بعض، كلكم خاينين.
عمر بضيق:
- جرا ايه يا آنسة ما تحترمي نفسك، اقولك أنا مش هتكلم معاكي ثانية زيادة.
و بالفعل نطق كلمته الأخيرة و سابها و مشي
فى الوقت دا رجعتلها مريم و هي بتقول:
- بقى أنا مفكرة اني بكلمك طلعت بكلم نفسي.... ايه دا انتي بتعيطي؟ مالك يا يارا؟
يارا ابتسمت بخفة و قالت:
- انا كويسة، خلينا نطلع للمدير قبل ما نتأخر و دا اول يوم لينا.
على الطرف التاني، دخل عمر المكتب و هو بيحاول يهدي أعصابه، فكان علاء صاحبه مستنيه و اول ما شافه ضحك و قال:
- نفسي مرة تيجي الشركة و انت رايق، مش عارف ايه اللي دايمًا معصبك كدا.
عمر بضيق:
- حظي الزفت كالعادة.
علاء بفضول:
- ايه اللي حصل معاك النهاردة؟
عمر بجدية:
- مش وقته، بعدين
- في واحد منهم وصل و لسه اتنين.
قبل ما عمر يتكلم سمعوا صوت بنت بتطلب الدخول.
يتبع.......
#
