رواية وسيطرت المشاعر مكتملة حتى الفصل السادس والعشرون 26 بقلم زهرة الربيع
بيبص لها باعجاب وحب ما يتوصفش
رحمه كمان كانت بتحاول تشغل نفسها عنه بس برضو كانت معجبه بيه جدا ومش مصدقه ان في راجل بالانسانيه والهدوء ده وكانت بتقضي افضل وقت في حياتها معاه
واستمرت الاحداث على هذا الحال ....وادهم اشترى خط جديد بعد نصيحة سليم ورمى خطه القديم علشان يخلص من زن ميرا
وبعد مجهود جبار قدر ياخد رقم رحمه ومن فرط سعادته بالرقم مخدش باله ابدا انو نفس الرقم اللي كان على خطه القديم واللي رحمه كلمت بيه سليم
وبدأ يكلمها يوميا و يتحجج ويروح يقابلها ويخرج معاها لدرجه انها بقت تستناه وتستغرب لو اتاخر شويه...وبقى فيه بينهم اعجاب متبادل وصريح
اما سليم حاله ما اختلفش كتير رغم الخبر السيء اللي قالوا له حازم بانه قدم موعد جوازهم لكن هو ما قالش لمشاعر وفضل معاها الاسبوعين دول هو وهي وابنهم ورمى كل حاجه ورى ضهره وبقى كل اولوياته انه يحاول يخليها تطمن له وترجع تثق فيه
مشاعر كانت مبسوطه جدا باهتمامه بس برضو اوقات تحس بحبه وحنانه و اوقات تحسه غامض ومتقدرش ترتاح لتصرفاته
بعد مرور اسبوعين ادهم خرج من البيت وركب عربيته وهو معاه علبه قطيفه جميله فيها خاتم غالي جدا
اخد نفس عميق و هو متحمس جدا انه يصارح رحمه بحبه ليها ويعرض عليها الجواز
طلع تليفونه واتصل عليها وقال..... انت فين يا قمر ....لازم اقابلك ضروري.... موضوع حياه او موت
رحمه ضحكت و قالت....هو انت كل مواضيعك طارئه كده...بس للاسف النهارده بجد مش هقدر اقابلك ....اصلي رايحه اقابل واحده صاحبتي معاها موضوع مهم جدا
ادهم قفل العلبه باحباط وقال... انا كنت متحمس جدا اقابلك دلوقت ...طيب خلاص تمام ناجلها بالليل وخلاص
رحمه ابتسمت وقالت ...خلاص متزعلش بقى وتكشر
...ما انا الليله هشوفك مش هلحق اوحشك يعني
ادهم ضحك وقال ...انتي وحشاني من امبارح اصلا ...بس خلاص مش زعلان هستنى والامر لله
وودعها وقفل معاها
ولسه هيطلع بالعربيه ميرا فتحت الباب وركبت وقالت بغضب ...كل الوقت ده قافل تليفونك عشان ما تتكلمش معايا
ادهم نفخ بضيق شديد وقال...لا مكانش مقفول انا رميت الخط خالص و اشتريت واحد جديد ....واكيد مش هدي لك رقمه
ميرا قالت بدهشه....ماشاء الله على الصراحه...عموما انا مش قاتله نفسي علشان اكلمك...بس مضطره في موضوع مهم جدا لازم نتكلم فيه ...وبعد كده مش هتشوف وشي
ادهم قال بخنقه..... اتفضلي قولي وخلصيني .....انا مخنوق لوحدي ومش ناقص
ميرا قالت بضيق.... مش هينفع خالص ...الموضوع مهم بجد ....اطلع مش هعطلك... في كافيه قريب انا بقعد فيه دايما تعالى هنقعد ونتكلم
ادهم نفخ بزهق وقال ....يا رب ارحمني يارب
وطلع بالعربيه على الكافيه اللي هي قالت عليه
بعد دقايق كانو في الكافيه وكان ادهم قاعد بضيق شديد وهي قالت.... تشرب ايه
ادهم قال بغيظ ....ميرا....احنا مش جايبن نشرب ...قولتيلي في موضوع مهم قوي ممكن تتكلمي بقى
ميرا قالت بحزن ....انت بتكلمني كده ليه ....هو معقوله كل الوقت اللي عدى بيننا ده وما وحشتكش ولا مره يا ادهم
ادهم قطع عليها اي كلام وقال .....ميرا انا بحب واحده تانيه وهتجوزها..... ممكن بقى تنسي موضوعنا خالص ولو فعلا عايزه تقولي حاجه اتفضلي
ميرا اصتنعت المفاجاه وقالت..بجد...مبروك ...عموما تتهنى... انا كنت عايزه اقولك انا الفيلا اللي كنت اشترتهالي واحنا متجوزين فيه واحد عايز يشتريها
ادهم قال بضيق....هو ده الموضوع المهم...وانا مالي بكده
ميرا قالت ....مالك ازاي ...يمكن انت مش حابب تبيع ..او حابب نبيعها لشخص معين
ادهم قال ...ميرا انا اشترتهالك ووثقتها باسمك...وقبل كده قولتلك اي حاجه جبتهالك في جوازنا خلاص بقت بتاعتك..يعني تبيعيها تولعي فيها مليش دخل
ميرا قالت ...بس برضو من الزوق اخد رأيك ...خصوصا انك وثقتها باسمي بعد الطلاق يعني كنت تقدر تستردها بس انت كتبتها باسمي وسبتهالي ...فقولت ممكن نتقاسم حقها او ...
بس قطعت كلامها لما دخلت رحمه جري من غير ما تبص لادهم وقالت..... اتاخرت عليك.... انا اسفه والله الطريق
والتفتت لادهم بغضب شديد
ادهم وقف بصدمه شديده وهي اتحول غضبها لذهول رهيب وقالت.....اد... ادهم... انت بتعمل ايه هنا
ادهم قال باستغراب .... انتي اللي بتعملي ايه هنا
ميرا اصطنعت عدم الفهم وقالت...ايه ده هو انتوا تعرفوا بعض ولا ايه ....انتي تعرفي ادهم طليقي يا رحمه
رحمه حرفيا اتجمدت كل اعصابها من شده الصدمه ووووو
وسيطرت_المشاعر
الثاني_والعشرون
رويات_زهرة_الربيع
سليم_ومشاعر
بوووووووم
مش هنتكلم على اللي جاي لكم ان تتخيلو
بارت طوييييل اهوه زي ما بتحبو والاحداث نااار واللي جاي ميتوصفش وروني التفاعل الجامد اللي بحبو لو حابين نستمر لان الصفحه فيها مشكله وحرفيا بحاجه لتفاعلكم علشان اقدر انزل بشكل يومي انطلقووووو
انتي تعرفي طليقي ادهم يا رحمه
رحمه اتسعت عيونها بشده وقلبها كان هيقف حرفيا وقالت بصدمه ...ادهم مين...ده..ده طليقك..طليقك ازاي ....طليقها ازاي
وبصت لادهم وهيه هتتجنن وقالت.... انت طليقها ...هيه اكيد بتهزر صح ..انتو بتهزرو معايا ..اكيد صح ...ما تتكلم يا ادهم رد عليا
ادهم استغرب حالتها كانت في اشد حالات الصدمه والذهول وبقت ترتعش ودموعها بتنزل قال باستغراب...ايوه يارحمه فيه ايه ما انا قايلك قبل كده اني كنت متجوز... وميرا هيه طليقتي في حاجه ولا ايه
رحمه كانت هتقع من طولها لما قال كده ورجعت لورا بذهول وهيه مصدومه جدا لدرجة انها بقت تضحك وسط دموعها بطريقه خوفته عليها جدا ورجع قال بتوتر...طبيب اهدي... اهدي تمام ...اهدي واقعدي هنتكلم و
بس رحمه صرخت فيه وقالت بغضب وجنون .....نتكلم في ايه ..نتكلم في ايه تاني ما خلاص ...خلاص ...الحق مش عليك الحق عليا اللي امنت لكم تاني ...كلكم صنف ذباله... كلكم اوسخ خلق الله
قالت كده وطلعت جري وادهم بقى ينادي عليها وهو مش فاهم اي حاجه ..هو زيها اتصدم بانها تعرف ميرا بس معندهوش علم باللي خوفها وصدمها للدرجه دي... بص لميرا وقال بغضب..انتي قيلالها حاجه عني ...ها ...قيلالها ايه اتكلمي
ميرا قالت باصتناع ...هقولها ايه يعني ...صدقني معرفش مالها اصلا و
بس قبل ما تكمل سابها وطلع جري ورا رحمه وهو بينادي عليها وبيقول...رحمه...رحمه استني...رحمه اقفي هنتكلم ..هنتكلم استني ارجوكي
بس رحمه موقفتش وبقت تبكي بشده وتجري بقوه وسط العربيات وادهم فضل مكمل وراها
بس مكانش قادر يلحقها من الزحمه وسرعتها وفجأه طلعو قدام عربيه جايه بسرعه ورحمه صرخت بفزع واتخطتها بالعافيه ....بس للاسف خبطت ادهم بقوه ووقع على الارض
رحمه اتجمدت مكانها لما شافتو غرقان في دمه والناس اتلفت حواليه وميرا جريت عليه وهيه بتلطم وتصرخ وبتقول..ادهم...ادهم حبيبتي قوم ..قوم يا ادهم حقك عليا...اسعاف..اسعاف بسرعه
رحمه بقت تبكي بشده وجريت دفعت الناس وقعدت جمبه على الارض ومسكت ايده وهيه بترتعش وبتقول...اد..ادهم...ادهم رد عليا ...انت سامعني ..اتكلم...قول حاجه ارجوك
ادهم بصلها بدموع ونطق بالعافيه وقال..كد...كدابه ..معملتش ....انا ...معملتش حا.....حاجه ....معمل....
بس مقدرش يكمل واغمى عليه وهما بقم يصرخو برعب والناس بقت تتصل بالاسعاف
عند سليم كان بينيم ابنه في سريره بس الطفل كان بيبكي ومش راضي يسكت قال بزهق ..يا ابني ياحبيبي عيب كده انت لو امك موصياك مش هتتصرف معايا التصرفات دي..نام في سريرك حلو السرير اهوه
مشاعر كانت قاعده على السرير وعايزه تضحك عليه وقالت.....انت مبتملش ...
سليم قال بغضب...لا مهو كده مش هينفع خالص ...انا صبرت عليكو كتير ....اكتر من كده هعلقهولك في السقف انا عقلي اصغر من عقله على فكره
الولد بقى يبكي اكتر من عصبيته ومشاعر شدته منو وقالت بذهول...فيه ايه خضيته ...اساسا حبيب امه عارف ان ماما مش عايزه غيره وهيه قاصده تغيظه
سليم اتنهد ورجع قعد على كنبه في الاوضه وقال...عموما هيجيلو يوم ويكبر وساعتها هيبقالو حساب معايا وهعرفو البكا اللي بحق وحقيقي..انما انتي بقى...الصبر طيب....د بس انا مش طيب وانتي عارفه
مشاعر ضحكت وقالت...لما بقى ...خليك عندك لحد لما يكبر
سليم اتنهد بغيظ ورجع بصلها وقل بابتسامه...شوشو ..انتي لو ليكي المزاج هتنيميه
مشاعر قالت ببرود...اديك قولت لو ليا المزاج
سليم داس على شفته بغيظ وقال ...كده براحتك بس خليكي فاكره.....بكره تيجي ندمان ...واقولك كان زمان
مشاعر ضحكت جامد وباست الولد وقالت ...نام يا قلبي شكل بباك بيحلم وهو صاحي
سليم ضحك بخفه ولسه هيرد جاله اتصال من ادهم رد وقال بابتسامه....ايه يا باشا سبع ولا ضبع
جالو صوت واحد بيقول...حضرتك صاحب التليفون ده عمل حادث ولقينا رقمك في المكالمات الاخيره ..هو في المستشفى و كنا عايزين حد من اهله
بقلم...زهرة الربيع
سليم اختفت ابتسامته او يمكن ملامحه كها اختفت من شده الصدمه وقف بالعافيه وقال بصوت مبحوح...في اي مستشفى
مشاعر وقفت بسرعه وقلق وسليم اخد العنوان وهو بيلبس قميصه بسرعه وبياخد حاجته
اول ما قفل معاه ولسه هيمشي مشاعر مسكت ايده وقالت... فيه ايه ياسليم
سليم نطق بالعافيه وقال بدموع...اخويا...ادهم ..ادهم عمل حادث ...انا لازم امشي دلوقت
مشاعر قالت بسرعه وذهول ...يامصيبتي
بعد شويه وصل سليم المستشفى ومشاعر معاه لانها اصرت تروح تشوف ادهم وسليم ما كانش فيه دماغ اصلا يناقشها
اول ما دخل المستشفى والدته جريت عليه وهي بتبكي وبتقول بخوف.... ادهم يا سليم...ادهم ...الحقنا يا ابني
سليم حاول يهديها وهو مرعوب وقال ...تمام... تمام اهدي ....هو هيبقى بخير ما تخافيش ....ان شاء الله هيبقى بخير
هدى كانت بتبكي جامد ومشاعر
سليم جري على ابوه وقال برعب .. ايه اللي حصل.... حالتو عامله ازاي
ابوه قال بدموع.... مش عارفين حاجه ...بيقولو جابوه مغمى عليه.... واخذوه على الجراجه ومش عارفين ايه اللي حصل
سليم لسه هيتكلم شاف رحمه وميرا واقفين على جنب و كانوا بيبكوا بشده وهدومهم عليها دم قرب منهم بسرعه وقال لميرا بغضب.... انتي كنت معاه وقت الحادث
ميرا هزت راسها بالموافقه وهي بتبكي وقالت .....ايوه هو كان معايا في الكافيه... هو ورحمه
سليم بص لرحمه بطرف عينه وقال ...وبعدين
ميرا اتوترت قوي وخافت من سليم وقالت بانهيار.... مش وقته يا سليم.... مش وقته ..خلينا نتطمن عليه الاول
سليم بص لها بقرف شديد وقال...هنتطمن باذن الله ..بس انتي متتطمنيش قوي
وسابها ووقف عند الاوضه وهيه بلعت ريقها بخوف شديد منو
كان الوقت صعب جدا على الجميع والكل متوتر والدموع مفارقتش حد لحد ما طلع الدكتور من الاوضه
كلهم جريوا عليه بخوف و الدكتور سبقهم وقال بسرعه.... اهدوا يا جماعه ....اهدوا ما تخافوش ما فيش اي حاجه احنا لقينا نزيف ووقفناه الحمد لله ....كنا متخوفين ان يكون فيه نزيف داخلي بس الحمد لله كل اموره تمام ...وكلها دقايق ويفوق ان شاء الله ....هم شوية كدمات وللاسف في كسر في الساق بس الحمد لله قدر ولطف
الدكتور قال كده ومشي وسليم ابتسم بسعاده متتوصفش
ونادر مكانش مصدق نفسه
بس سليم بعد بسرعه
نادر ابتسم وقال ....الله يسلمكم ويخليكم ليا
مشاعر كمان هدى اللي بقت تبكي وتقول.... الحمد لله يا رب الحمد لله
وميرا ورحمه بقوا يحمدو ربهم
بعد شويه خرجوا ادهم واخدوه على اوضه تانيه وسليم راح معاه وفضل جمبه
مرو ساعتين وادهم استعاد وعيه ووالده ووالدته ومشاعر دخلوا يطمنوا عليه
وميرا كانت واقفه عند الباب
رحمه بصت من الشباك عليه كان يا دوب مفتح عيونه بس مش
قادر يتكلم واول ما اطمنت انه فاق بصت لميرا بدموع وسابت المستشفى ومشيت بهدوء من غير ما حد يعرف وهيه منهاره حرفيا كل احلامها ضاعت في الحادث ده
اول ما عملت كده ميرا ابتسمت بسعاده واخيرا قدرت تاخد نفسها من كميه التوتر اللي حصلت
عند ادهم بص لسليم وقال بتعب ....رحمه.... رحمه فين
سليم ابتسم وقال.... موجوده يا حبيبي بره ما تقلقش.... انت بس حاول ما تتكلمش دلوقت الدكتور قال الافضل ما تتكلمش
هدى قالت بدموع.... هو ايه اللي حصل يا ابني... انا كنت هموت يا ادهم ازاي ده حصل
ادهم مسك ايدها وقال بالعافيه.... يا ماما انا كويس والله
سليم قال بسرعه ...وبعدين يا ست الكل مش لسه بقول له الدكتور قال يرتاح ....معلش نهدى عليه دلوقت
هدى هزت راسها بتفهم وكانت مش قادره تبطل عياط
مشاعر اطمنت عليه واخذتها وطلعتها بره وطلعت معاها تهديها
نادر بص لادهم بدموع وقال .....طيب اخوك معاك انا هستنى بره افضل ليك...اصلا الدكتور قال ان شاء الله مش هتطول هنا
قال كده وخرج وسليم قرب من ادهم وقال بحزن.....حاول ما تتكلمش كتير.... بس لو عايز حاجه انا موجود
ادهم قال بسرعه ووجع... رحمه.... نادي لي رحمه يا سليم ..لازم...لازم اشوفها
سليم استغرب وقال.... يا ابني ما انا قلت لك انها بره هي والزفت التانيه
ادهم غمض عينيه بالم وقال.... مش هتكون بره.... اكيد مش بره
سليم استغرب جدا وقال.... تمام.... حتى لو ما كانتش بره اجيبها لك ...خليك هادي ماشي
قال كده وخرج يشوفهم وبالفعل ما لقاش رحمه بره اتنهد بغضب رهيب وبص لميرا وقال....صاحبتك فين
ميرا قالت بتوتر...قصدك رحمه...مشيت
سليم قال بحده ...مشيت اه.... ايه اللي حصل هتتكلمي ولا اطربق ام المستشفى دي على دماغك ودماغ اللي خلفوكي
ميرا اترعبت من صوته وقالت.... ما اعرفش ايه اللي حصل...هو انا وادهم كنا قاعدين في الكافيه...ورحمه جات بالصدفه واتصدمت لما شافت ادهم....و اتضح انهم يعرفوا بعض تقريبا واول ما عرفت ان هو طليقي جريت في الشارع زي المجنونه..... انا وادهم ما فهمناش وطلعنا جري وراها وادهم خبطته العربيه
سليم رفع حاجبه وقال بهدوء مخيف ....رحمه صاحبتك هي اللي كلمتني في التليفون من اسبوعين مش كده... لما اتصلت على تليفون ادهم وانا رديت
ميرا بلعت ريقها بتوتر وقالت.... ما اعرفش انها كلمتك..... رحمه هتكلمك ليه يعني
سليم بص لها بغضب شديد وقال بانفعال ...انتي هتستهبلي يابت ...متخلنيش احجز لك طوارئ هنا ..انطقي
ميرا انتفضت بخوف ولسه هترد سمعو ادهم بينادي و بيقول بغضب ...ميرا .....ميرا تعالي عايزك
ميرا دخلت جري وسليم وراها وسليم لقاه بيحاول يقعد جري عليه بذهول ساعده وقال.... انت مجنون يا ابني.... الدكتور قال ترتاح يلا نام دلوقتي وبعدين قول اللي تحبه
سليم كان بيحاول ينيمه بس ادهم دفعه وقال بغضب.... اطلع يا سليم.... اطلع واقفل الباب ... عايز اكلمها شويه
سليم خاف جدا عليه وقال.... تمام.... هتتكلم معاها اكيد ...بس دلوقتي ارتاح ....تمام ....اهدى ارجوك
بس ادهم قال باصرار ...لا لا اطلع دلوقت ....عايزه اتكلم معاها... سيبنا لوحدنا.... بقول لك اطلع
سليم شاف انه مصر وما كانش عايزه يتكلم كتير قال بسرعه ....طيب.... طيب تمام ...اهدى هخرج ....حاضر هخرج
وبص لميرا بتحذير وطلع بتوتر شديد
بره كان نادر بيحاول يسكت هدى ومشاعر كمان قالت.... خلاص بقى ياماما... ادهم انسان كويس وربنا هيقف معاه.... وكلها شويه وهناخده معانا واحنا مروحين..... ولو على الكسر ده مش مشكله ياما ناس اتكسرت
هدى هزت راسها بحزن وطبطبت عليها وقالت..... انتي كنتي فين يا بنتي
نادر قال ....مش وقته يا هدى....في البيت نتكلم في كل حاجه .....حمد لله على سلامتها على اي حال
مشاعر ابتسمت وشافت سليم طالع من الاوضه قالت بتوتر... عن اذنكم
و راحت له وقالت ....ايه اللي حصل بالظبط ....هو عايز ميرا ليه...و مين البنت التانيه دي.... وليه مشيت كده
سليم قال بتعب..... البنت التانيه دي واحده ادهم بيحبها ...و مش عارف مشيت ليه .....ربنا يستر حالة ادم ما تطمنش ابدا
مشاعر قالت بقلق.... ليه .....هو مش الدكتور طمنا ولا قال لك حاجه جديده
سليم قال بسرعه ...لا ما اقصدش كده ....قصدي ان في بينه وبينهم مشكله كبيره.... في حاجه مش فاهمينها ....انا اول مره اشوف ادهم بالحاله دي تقريبا الزفت طلقته عامله بلوه ...والظاهر اني عرفت عملت ايه ... لو مخابش ظني تبقى لعبت بينا كلنا ....وابقى انا اغبى بخلق الله ....ويمكن اكون السبب في كل ده
مشاعر ما كانتش فاهمه حاجه ابدا ولسه هتساله اتصدموا بدخول حازم اللي قرب على نادر وهدى وقال....حمد الله على سلامته يا نادر .....انا لسه حالا عرفت والله
بقلم...زهرة الربيع
نادر قال بضيق..... الله يسلمك يا حازم
حازم التفت لسليم ومشاعر وقرب منهم وقال بسخريه .....اها اخيرا شفنا الجميله الهربانه.... لا بصراحه معاك حق يا سليم حاجه تستاهل
سليم نفخ بغضب وضيق وحازم بص له وقال.... هي مش مراتك كانت هربانه.... ولا انا بتهيا لي
سليم قال بخنقه.... مش وقته خالص دلوقت.... انا على اخري هنبقى نتكلم في الموضوع ده بس نطمن على اخويا الاول
حازم بصله بغضب وتحدي وقال.... احنا هنطمن على اخوك الاول ...بس مش هنتكلم في حاجه تاني.... انت خلاص المره دي اتخطيت كل حدودك...و ملكش اي حق تتكلم... القرار بقى في ايدي ومبقاش عندك فرصه للاعتراض
سليم اتوتر من كلامه ولسه هيرد مشاعر قالت بغضب شديد وانفعال....فيه ايه.... ما قال لك مش وقته... الراجل اخوه تعبان جوه ولا هو اي رغي وخلاص .....صحيح حرامي وعينه بجحه
حازم اتصدم بكلامها وسليم حاول يسكتها وقال.... مشاعر
بس مشاعر قالت بغضب ..... مشاعر مش هتسكت... استنى انت
و بصت لحازم وقالت بغضب اشد.... انت مش مكسوف من نفسك.... واخد حق مش ليك بالدراع وبتساوم عليه ببنتك يعني مش كفايه انت رخيص كمان بترخصها زيك....بتقدملو شركته مهر لما يتجوز بنتك يا ابو العروسه ....اهي دي الجوازات ولا بلاش ....شوف لنا عروسه تانيه عندك وكده تبقى جبرت
حازم اتسعت عينيه بذهول شديد وووووو
مش مكسوف من نفسك بتصطاد واحد متجوز علشان يتجوز بنتك وبتدفع له مهر كمان
حازم كان مصدوم من كلامها وبيبص لها بنظرات مش مفهومه بسبب قوتها وجراتها وقال بمغازله.... اهدي يا قمر ليطق لك عرق ما تتحمقيش قوي كده.... اللي زيك ما تقلقش على نفسها لو واحد باع في 1000 يشتري
مشاعر لسه هترد سليم وقف قدامها وبص له بحده وقال.... كلامك يبقى معايا انا...وقولتلك لما نرجع البيت مش عايزه اعمل مشاكل هنا ....وما لكش دعوه بيها خالص مفهوم
حازم ضحك بسخريه وقال.... ماشي...نتكلم لما نرجع
وبص لمشاعر وقال ...باي باي يا شرس
قال كده ومشي ومشاعر كانت هتنفجر من الغضب وبتبص له بحقد وقالت...ايه الراجل القلقاسه ده....شبه القلقاس قوي لا شكل ولا طعم
سليم بص لمشاعر بغضب و قال...لما هو قلقاسه بتتكلمي معاه ليه ....مش انا موجود.... ولا مش مالي عينك
مشاعر كتفت ايديها بضيق وقالت...موجود بس ساكتلو...وبعدين دول كلمتين كانوا طابقين على نفسي وكنت هفرقع لو ما قلتهمش
سليم قال بغضب ....وانا دلوقتي اللي هفرقع لما قلتيهم ... قاعده تاخدي وتدي معاه عاجبك كده لما عاكسك قدامي
مشاعر قالت بدهشه ....عاكسني ... ده الراجل قد ابويا ده بغيظك مش اكتر
سليم قال بغيظ... قد ابوكي اه ...ده ريل عليكي وانا واقف .....نطلع من هنا بس وهعرف ابلعه كل كلمه قالها
مشاعر ابتسمت بخبث وقالت....والله انا شايفه انه ما قالش حاجه غلط..... قال لو هو باع في 1000 يشتري ودي حقيقه الراجل ما كدبش يعني
قالت كده وسابته يتحرق وراحت قعدت جنب هدى
سليم داس على شفته بغيظ شديد وهو هيولع مكانه ونادى لوالده وقال....نادر بيه ....دقيقه لو سمحت
نادر قرب منه وقال...نعم يا ابني
سليم حاول يبقى هادي وقال...انت كلمت البيت علشان يوضبو الاوضه اللي تحت لادهم زي ما قولتلك
نادر قال...اه كلمتهم وجهزوها وكلو تمام
سليم قال بهدوء...كلمت مين من الخدم
نادر قال باستغراب ..كلمت خالد...ليه يعني
سليم غمض عنيه بغضب مكبوت وقال...وقولتلو طبعا ان مشاعر جات معايا
نادر قال بسرعه...لا والله ...هو انا وبكلمها سمع صوتها وهيه بتسكت هدى...وكمان سمع صوت ابنك وسأل واضطريت اقوله
سليم داس على اسنانه بغيظ وقال بخنقه...لا كده فرقت تمام...شكرا ...برافو عليك انت وهدى ومشاعر وابني كمان
قال كده ومشي من قدامه ونادر قال باستغراب ..ماله ده ...هو احنا عملنا ايه يعني
جوه عند ادهم كانت ميرا واقفه بتبصلو بقلق شديد بسبب نظراته الحاده وقالت بتوتر .....حمد لله على السلامه يا ادهم... يا ريتني كنت مكانك
ادهم بص لها وعيونه احمرت من شده الغضب والوجع وقال بهدوء يخوف..... قلتي لها ايه عني
ميرا بلعت ريقها بتوتر وقالت..... قصدك مين ...رحمه ...ما قلت لهاش حاجه...هقولها ايه يعني
ادهم بصلها بطريقه تخوف وقال .....ما تكدبيش لان من غير حاجه مش طايقك... انا اقولك قولتي ايه ...انا طليق صاحبتها السافل اللي بيضربها ويهينها واعتدى عليها مش كده
ميرا قالت بتوتر.... مش فاهمه قصدك
ادهم ابتسم بوجع وقال..... تعرفي رغم اني عارف انك اوسخ خلق الله ...لكن اتصدمت فيك تخيلي.... ما توقعتش اني بعد ما صنت العشره اللي كانت بينا وما رضيتش اقول عنك اي حرف حتى لاهلي تكون دي الصوره اللي بتديها عني للناس ....طيب بلاش انا ...طب البنت الغلبانه اللي وجعتيها كده ذنبها ايه...دي لما حكتلي كانت بتعيط من الزعل عليك كانك اختها ...معقوله انتي حجر للدرجه دي ...تستأمنك وتكشف لك جرحها وتكوني اول واحده تضغط عليه
ميرا اتأثرت جدا بكلامه بس حاولت ما تبينش وقالت بدموع ....انا فهمتك...اه فهمت دلوقتي انت تقصد ايه.... تلاقي رحمه قايله لك الكلام ده.... يا ادهم رحمه مريضه نفسيه الكلام اللي انت بتقوله ده هيه بتقوله لاي حد لان حصل معاها موقف زمان و مش قادره تتخطاه ....يعني انا ما قلت لهاش حاجه هيه بتتخيل ان ده حصل.... مش عايزه اقول لك علشان هي صاحبتي بس هي للاسف رحمه مجنونه ...فهمتني
ادهم بصلها بطريقه مش مفهومه وقال ....قلتي لي اه مجنونه...طب مش كنتي تقولي ...بقولك ايه ممكن تقربي تعدلي لي المخده مش مريحاني
بقلم.....زهرة الربيع
ميرا فرحت جدا وجريت عليه وقالت ....اه طبعا ....وهفضل جنبك واللي تحتاجه كله انا موجوده
ولسه هتعدل المخده اتفاجئت بشده لما مسكها من رقبتها بقوه وبقى يخنقها وهو بيقول بغضب شديد .....مش هي اللي مجنونه ....انت
ميرا بقت تحاول تفلت ايديه وهي بتكح وبتصرخ وبتقول بالعافيه ....ادهم ...ادهم سيبني..... سيبني بتخنق يا ادهم ..الحقوني
بس ادهم ما كانش بيسيبها وميرا بقت تصرخ وخلاص بتتخنق وفي الوقت ده دخل سليم جري على صوتها واتصدم باللي بيحصل ومسك ادهم هو بيقول بذهول.... ادهم سيبها ...انت بتعمل ايه اتجننت... في ايه.... اهدى سيبها بقولك ..يا ادهم ايدك بتنزف سيبهااااا
وكان بيحاول يبعده عنها بس ادهم ما كانش بيرد عليه وبيقول بغضب شديد وزعيق..... اوعى يا سليم.... اوعى سيبني ....ابعدوا محدش يتدخل
بس سليم لما شاف ميرا خلاص بتتخنق دفعها بقوه بعيد عن سريره ووقعت على الارض وبقت تكح بشده وهي بترتعش وبتبكي
مشاعر جريت عليها وقفتها بذهول و ادهم كان لسه بيزعق بانفعال وبيقول...سليم سبني..ابعد عني بقولك اوعى
سليم بص لميرا وقال بزعيق .. ايه اللي حصل ....قولتي له ايه ......في ايه ..انطقي
ميرا قالت ببكا.... ما اعرفش ماله
....ما اعرفش
هنا ادهم دفع كبايه قزاز على طاوله جمبه كسرها وهو بيقول بزعيق.... انت لسه بتكدبي.... اخرسي خلاص ...طلعوها بره مش عايزه اسمع صوتك.. مش عايز اشوفك قدامي تاني لو شفتك تاني ولو صدفه هقتلك فاهمه ....ما حدش هيعتقك من ايدي المره الجايه
ميرا سابته بيزعق وطلعت جري ومشاعر نادت للدكتور جه الداله حقنه مهدئه بسرعه و ركبوا له الاجهزه اللي كانت كلها فلتت
والكل كانو واقفين حواليه بخوف وذهول
عند رحمه من اول ما رجعت البيت طلعت على اوضتها وقفلت الباب وبقت تبكي بشده
والدتها كانت بتخبط عليها كتير علشان تفتح او تفهم منها اي حاجه بس مكانتش بترد ...بقت تتصل على ادهم بس هو كمان ما كانش بيرد رجعت تاني تخبط على اوضه بنتها وهي بتقول بقلق....يا رحمه يا حبيبتي طب فهميني في ايه ...اتخانقتي انتي وادهم طيب.... يا رحمه انا قلقانه عليك يا حببتي طمنيني
رحمه كانت نايمه على السرير وضمت رجليها لصدرها وكانت سامعه كل كلمه من والدتها بس مش قادره ترد ولا قادره حتى تقف على رجليها و بتفتكر كل لحظه عدت بينها وبين ادهم..و قد ايه كان بيهتم بيها ويفهمها قبل ما تتكلم قد ايه كان انسان طيب وبيخدم كل الناس.... وبقت كمان تفتكر كلام ميرا عنه عقلها رافض يصدق وقلبها بيتحرق حرفيا
عدى باقي اليوم بليله والكل في المستشفى رفضو يرجعو البيت من غير ادهم
وفي اليوم التاني وافق الدكتور على خروجه من المستشفى ورجع ادهم على البيت وكان بيستخدم كرسي بعجل علشان كسر رجله وكان سليم بيساعده ودخلوا البيت بس كانت حالتو النفسيه سيئه جدا
اول ما دخل البيت سليم قال بابتسامه ....نورت بيتك يا قمر ....تحب نقعد هنا ولا تروح اوضتك
ادهم قال بحزن ...لو مش هتعبك طلعني الاوضه عايزه اقعد لوحدي
ابوه وامه بصله بحزن عمرهم ما شافوه بالانكسار ده
وسليم حاول يهون عليه وابتسم وقال.... تمام عموما علشان رجلك كلمنا الخدم يجهزولك الاوضه اللي هنا علشان لو حبيت تقعد معانا متنزلش وتطلع على السلم ووضبناهالك من امبارح...ولا انت حابب ترجع اوضتك
ادهم هز راسه بلا مبالاه وقال..... ما تفرقش
سليم اتنهد بحزن عليه واخده على الاوضه واول ما مشي بيه هدى قعدت على الكنبه بحزن وقالت ....ايه اللي حصل بس يا ربي..... ده لسه من يومين كانوا زي الفل
نادر اتنهد وقال.... الظاهر كده على حسب اللي حصل في مستشفى ان اللي اسمها ميرا دي هي السبب ....تقريبا قايله حاجه لرحمه.... البنت ما شفناهاش من وقت ما كان في الجراحه
مشاعر حاولت تهون عليهم وقالت.... معلش انتو حاولوا تهدوا وتقفو معاه الفتره دي....وبس يفوق من اللي هو فيه وصدمة الحادث ويقدر يتكلم ...اكيد هنفهم منه اللي حصل و كلنا اهو موجودين معاه وهنساعده
نادر اتنهد بتعب وقال.... ان شاء الله ..ربنا كبير ...ها بقى...وانت كنت فين انتي كمان
مشاعر بصت حواليها بتهرب ونادر قال .... مشاعر ما تعمليش فيها هبله ...كنت فين
عند ادهم جوه سليم نيمه على السرير وقعد جنبه وقال ...لو احتجت اي حاجه التليفون معاك اتصل عليا بس ولا نادي على اي حد من الخدم هنا قريب تمام
ادهم هز راسه بالموافقه وسليم حمحم بتردد وطلع علبة الخاتم من جيبه وقال ....العلبه دي لقوها جنبك وقت الحادث
ادهم بص للعلبه شويه ونزلت دمعه من عيونه وقال ...خلاص ما بقالهاش لازمه
سليم ابتسم بحزن وقال..... عارف ابوك من فتره قال لي كلمه غريبه... قال لي عمري ما حسيت ان انت وادهم اخوات توام... طول عمري بحس ان انت ابني الكبير...انا ما فهمتش معنى كلمته غير دلوقتي وابتديت اعذره في اللي عمله زمان يمكن لو كنت مكانه كنت عملت نفس اللي عمله
ادهم بصله باستغراب وقال.... مش فاهم
سليم ابتسم وقال.... يعني بحس روحك روح طفل كده محتاج اللي يعتني بيه واللي يقف جنبه ....انا كمان عمري ما حسيت انك اخويا توام كنت دايما احس انك اخويا الصغير او ابني اللي المفروض اخلي بالي عليه من جمال قلبه اللي مبقاش ينفع مع خبث الناس
و لمعه عيونه بالدموع وقال...بس المره دي كنت انا السبب في وجعك ..كتر المشاكل خلتني مش مركذ .... انا اسف سامحني كان لازم اهتم اكتر من كده كان لازم احسبها وافهم
ادهم بصلو بعدم فهم وسليم اتنهد وقال....الصراحه يوم ما نسيت التليفون معايا اتصلت واحده وكانت بتزعق وقالت انها صاحبه ميرا و انك ....ولما جات عندنا رحمه في البيت حسيت ان صوتها متشابه بس قلت مستحيل تصدف كده وتكون هيه نفسها اللي كلمتني ....و شكيت ان اللي اسمها ميرا ممكن تخلي حد تاني من اصحابها يكلمك علشان تستفزك وعلشان كده قلت لك تغير رقم التليفون.....بس من اللي حصل امبارح فهمت ان اللي كانت بتكلمني دي هي رحمه
ادهم غمض عنيه بوجع شديد وقال ...ما قلتليش ليه يا سليم ...كان لازم تقول لي ....رحمه عندها عقده نفسيه وفقدت الثقه في كل الناس ...وكنت يا دوب بحاول اكسب ثقتها ولما حسيت اني نجحت ...اتطربقت الدنيا على دماغي ... اتضح ان اللي اسمها ميرا عارفه بعلاقتنا من الاول وبتلعب بيها ....قيلالها كلام زي الزفت عن طليقها عشان يوم ما تشوفني وتعرف اني انا
طليقها تكرهني من غير ما تفكر ...مش قادر انسى نظراتها امبارح لما عرفت اني انا طليق صاحبتها ..كانها شافت شيطان ودلوقتي خلاص ما فيش فايده من الكلام... اللي زرعته في دماغها مستحيل اقدر امحيه .... كل حاجه باظت خلاص
سليم قال بسرعه ....ما فيش حاجه باظت... امال احنا قاعدين بنعمل ايه ....احنا هنحاول معاها.... انا عايزك بس تبقى هادي وتخلي بالك من صحتك وبس وكل حاجه لها حل
ادهم هز راسه بحزن وقال....اللي عايزه ربنا هيكون.... ممكن معلش تسيبني بس ارتاح شويه ...دماغي هتنفجر وعايز انام
سليم اتنهد بحزن وسابه وطلع وادهم بقى يبص لعلبه الخاتم بحسره و سخريه وهو بيفتكر كل الوقت اللي قضوه سوا وفضل وسط افكاره لحد ما نام بتعب
بره عنده مشاعر كانت واقفه ساكته بتوتر ونادر قال ...يا بنتي مبترديش ليه ...بسالك كنتي فين.... وازاي جيتي مع سليم
مشاعر قالت بتوتر...معرفش بقى اسالو ابنكم هو اللي كان خاطفني
بصولها بذهول وهدى قالت ... نعم ...خاطفك ازاي
مشاعر بلعت ريقها بارتباك ولسه هتتكلم شافت سليم طلع من اوضة ادهم قالت بسرعه وارتياح.... اهو سليم جه لوحده اهو ....اهلك بيسالوا انا كنت فين .....اتفضل جاوب بقى
سليم اتنهد بتعب شديد وقعد على الكنبه وقال بهدوء....مشاعر يا قلبي عندك علم ان تلتين مشاكلي بالظبط بسببك
مشاعر بصتلو بدهشه وهو قال ....استمري على كده هتدخلي موسوعة جينس قريب كأسرع زوجه جابت اجل جوزها
مشاعر قالت بغيظ.... يا سلام ...وانت بقى العاقل الراسي اللي مبيجيش من وراك مشاكل...وحياتي معاك بمبا مش كده
سليم لسه هيرد دخل خالد وجري عليها وهو بيقول بسعاده... مشاعر حبيبتي ....وحشتيني اوي يا قلبي
ولسه مشاعر رجعت لورا وقالت بسرعه ....خليك عندك
خالد اتصدم بشده وحتى نادر وهدى اتفاجئوا جدا
خالد بلع ريقه بتوتر وقال .... في ايه يا مشاعر انت زعلانه مني في حاجه
مشاعر قالت بتوتر.....انا بس تعبانه يا خالد ....هطلع انيم نادر عن اذنكم
قالت كده وهيه بتحاول تخبي دموعها وخالد اتاكد ان سليم قلها وبصلو بحقد وهزلو دماغو بتوعد
سليم اتنهد ومسح على وشو بخنقه وهو مش عارف يلاقيها منين ولا منين
بس مجاتش على كده وبس
مشاعر سابتهم ومشيت و كانت هتطلع على السلم بس وقفها صوت حازم وهو بيقول ...بعد اذن الجميله الهربانه ...ممكن تستني شويه محتاجينك معانا
سليم وقف باستغراب ومشاعر التفت له باستفهام
حازم قال بسخريه...اسف جدا اني جاي بدون معاد بس بما ان جوازك من بنتي خلاص اخر الشهر وفاضل عليه ايام معدوده كان فيه خطوه مستعجله وضروري تتم
بقلم....زهرة الربيع
مشاعر اتسعت عيونها بصدمه لما قال ان جوازه اخر الشهر والولد كان هيقع من ايدها وهدى جريت عليها سندته واخدته منها
سليم بلع ريقه بتوتر ولعن حازم في نفسه ومبقاش عارف يبصلها حتى
حازم صفر وقال باستفزاز...هيه الجميله الهربانه مكانتش تعرف ولا ايه...عموما ...اهو خبر حصري ليكي.... خلينا بقى في اللي جيت علشانه
و طلع ورقه حطها على الطاوله قدام سليم وقال.... دي الورق اللي انت بتتمناها ومستنيها بقالك سنين...ده تنازل عن الشركه والتكفل بكل مصاريف خسارتها في الفتره اللي فاتت...و ناقص بس على امضتك وامضتي .....طبعا امضتك جاهزه وامضتي كمان جاهزه .... واقفه بس على كلمه واحده منك
سليم غمض عنيه بتعب لما فهم قصده و ما كانش عارف يعمل ايه
بس مشاعر واهله ما كانوش فاهمين وحازم كمل وقال..... انما بقى لو انا خرجت النهارده وانت ما مضتش على الورقه دي يبقى خلصت كده ...وفي ظرف اسبوع او اقل الشركه هتعلن افلاسها
نادر قال بخنقه..... انت بتتكلم بالالغاز ليه ..ما تقول المطلوب وتخلص
حازم ضحك وقال..... بس الظاهر ان ابنك فاهم المطلوب...ومع ذلك هقول
و كمل بغضب قاطع وقال..... طلقها حالا..... مش هقعد استناك كل يوم تقول لي هطلق هطلق وفي الاخر طلعت معاك ومخبيها
....ارمي عليها اليمين دلوقت وهمضي فورا
مشاعر نزلت دموعها وبصت لسليم بسخريه
وسليم بصلها بحزن ورجع بص للعقد وكان في موقف لا يحسد عليه وووووو
اختار يا اما تطلقها حالا وترجعلك شركتك ..يا اما في ظرف اسبوع الشركه هتعلن افلاسها
سليم بص للعقد ورجع بص لمشاعر وكان في موقف لا يحسد عليه كان لازم يختار بين الشركه اللي بناها على كتافه وبين مراته وحب عمره بلع ريقه بتوتر وقال... حازم بيه ملوش لزوم الكلام ده ..احنا بينا اتفاق
حازم قاطعه وقال..... اتفاقنا انت اول واحد خليت بيه وانا مش هجوز بنتي على ضره
وبص لمشاعر وقال بمعاكسه.... خصوصا لما تبقى ضرتها جامده كده .....الصراحه ما اضمنش ان بنتي هترتاح ابدا
سليم بصلو بحده وغضب وقال..... لم نفسك وتكلم كويس..... انا مش عايزه اهينك علشان انت راجل قد ابويا فما تخلينيش اعملها معاك
حازم ضحك وقال .....انا بهزر معاك بنكشك يا سولو...ها بقى نرجع لموضوعنا.... هتمضي ولا هتقول على شركتك
سليم بص لمشاعر بقلة حيله ولمعت الدموع في عيونه
ومشاعر وقعت دمعه على خدها وابتسمت بسخريه وقالت.... انا مش مضطره اشوف المسرحيه دي اكتر من كده ....اصلا اختيارك واضح .....وانا هطلع الم حاجتي
سليم قال بحزن ....مشاعر انا....
مشاعر قاطعته وقالت بدموع .....ولا كلمه يا سليم... تمام مش عايزه اسمع حاجه
سليم قعد على الكنبه بحزن وتعب
وخالد ابتسم بسعاده واخيرا اللي اتمناه اتحقق ...وكمان مشاعر عرفت انه مش اخوها وهيبقى لي فرصه يتكلم معاها
مشاعر مثلت القوه قدامهم ومشيت بس ما كانتش قادره تقف على رجليها و لسه هتطلع على السلم اتفاجئت بسليم بيقول ...مشاعر معاها حق ...اختياري واضح جدا ....طبعا هاختار مراتي
حازم ومشاعر وخالد اتصدموا وهدى ونادر بصوا لبعض وكانوا في قمه السعاده والفخر
سليم وقف وقرب على مشاعر ومسك ايدها وقال بابتسامه ....انتي عبيطه يا بت .....من كل عقلك فاكره اني هطلقك علشان حته شركه .....يروح يهدها طوبه طوبه ويساويها بالارض.... وتبقى ولا يوم كانت ولا ليها وجود اهون من اني اعيش يوم واحد تاني من غيرك
مشاعر ما كانتش مصدقه نفسها وابتسمت وسط دموعها وقالت ....انت...انت بتتكلم جد
سليم باس جبينها بحنيه وقال.... انا لو كنت عايزه احافظ على الشركه متمسك بيها من الاول فده علشانكم ....عشان ما اصغرش في نظرك..و عشان اعيشكم العيشه اللي تتمنوها ...انما لازمتها ايه لو رجعتها وانت مش معايا .....ما فيش اي حاجه ليها قيمه لو هخسرك
مشاعر فرحت جدا من قلبها
انما حازم كان هيتجنن وقال بغضب شديد..... يبقى انت اللي جنيت على نفسك وعلى شركتك ..وانت قلت اللي هيحصل بالحرف هسويها لك بالارض
سليم بص له بسخريه وقال.... عموما كل حاجه اتكشفت خلاص ما بقاش في داعي للتمثيل اكثر من كده ....فخليني اقول لك كلمتين محشورين في زوري..شوف ياسيد قلقاسه انا....
معلش اصل مشاعر شيفاك شبه القلقاسه
حازم اندهش ومشاعر ضحكت و سليم كمل وقال.... هو انت من الاول شايف
ان انا فعلا كنت هتجوز بنتك .....حبيبي اصحى لنفسك انت بتتكلم مع سليم النمس يعني حد ما يتلوش دراعه ....انا بس كنت بنيمك على اساس اخد وقت ...وقت مش اكتر ...انما لو وصلت للجواز عمري ما كنت هتجوزها .....انا متجوز وعيني مليانه قوي... ولو على الشركه خلاص انت فزت روح بلها واشرب ميتها....انا فكرت الصراحه انيمك تاني واطلقها على قد عقلك وارجع اردها بردو
وبص لمشاعر وقال بحب ....بس لساني مطاوعنيش ....مقدرتش اكسرها بسببك اكتر من كده ...كفايه اللي عاشته
مشاعر بصتلو بحب شديد وهو ابتسم وقال لحازم ....ودلوقتي بقى مش هقول لك اتفضل من غير مطرود .... لا انت مطرود يلا وريني عرض اكتافك ...و مش حابب اشوف وشك تاني ابدا
بقلم...زهرة الربيع
حازم بصله بنظرات غضب ما تتوصفش وقال ....تمام يا ابن النمس..... ابقى افتكر اللي عملته ده....و خلي الحلوه تنفعك...و استنى مني اخبار جميله هتفرحك قوي
قال كده ومشي وسليم كان بيبص لطيفه بغضب شديد انما نادر حس بقلق شديد على ابنه وحتى مشاعر كمان قالت بقلق...شكله ما يطمنش ابدا
سليم قال بضحك .... شكله قلقاسه فعلا
مشاعره ضحكت وقالت...طيب انا هطلع انيم الولد ...عن اذنكم
قالت كده وطلعت وسليم لسه هيطلع وراها خالد بصله بنظره غريبه وابتسم بخبث وسابه ومشي
سليم بلع ريقه بتوتر ومرتاحش ابدا لنظرته و طلع على اوضته وهو قلقان جدا
نادر قعد وقال بحزن..... كده خلاص كل اللي تعب عليه الفتره اللي فاتت راح.... و تعب السنين راح والشركه راحت ..والله اعلم ايه اللي هيحصل كمان
هدى طبطبت على ايده وقالت بابتسامه.....باذن الله ما فيش حاجه هتروح .... احنا موجودين مع بعض وابنك لاول مره يتصرف برحمه وميكسرش مراته...و الباقي بالنسبه لي مش مهم
عند ادهم فاق من النوم على صوت تليفونه بص فيه بضيق واتفاجأ لما لقاها لبنى ورد بسرعه وقال.... الو ...مدام لبنى ازيك
لبنى قالت بسرعه..... في ايه يا ادهم من امبارح بتصل عليك.... رحمه مالها يا ابني ده انا هتجنن عليها ....من امبارح قافله عليها اوضتها ومش بتطلع ولا بتاكل ولا بتشرب انا خايفه تعمل في نفسها حاجه ...ممكن تيجي على البيت وتفهمني في ايه
ادهم لمعت الدموع في عيونه وقال بحزن..انا عملت حادث ورجلي اتكسرت....و للاسف مش هقدر اجي
لبنى شهقت وقالت.... يا خبر ....وانت عامل ايه دلوقت
ادهم قال بحزن شديد.... مش كويس ابدا
لبنى قالت بتوتر.... طب انا مش فاهمه هو ايه اللي حصل.... هو انت اتخانقتوا يعني
ادهم قال بحزن....حاجه اسوء من كده.... انا لازم اقابلها ....لازم نتكلم ممكن تساعديني
لبنى قالت ..... طب فهمني حتى الموضوع يا ابني عشان اعرف اساعدك و
بس قطعت كلامها لما اتفاجئت برحمه طلعت من الاوضه بغضب شديد واتقدمت عليها اخدت التليفون فورا وقالت بغضب..... حمد لله على
سلامتك يا باشمهندس
ادهم غمض عنيه واخذ نفس عميق لما سمع صوتها وقال بتعب..... وحشتيني يا رحمه ....عايز اشوفك لو سمحتي لازم اقابلك ضروري.... اديني فرصه اتكلم حتى
رحمه نزلت دموعها بغزاره لما سمعت صوته وقالت بغضب شديد .....وانا مش عايزه اقابلك ..مش عايزه اسمع كدبك تاني.... كفايه قوي كده ارحمني وشوف لك لعبه غيري تمام ....وما اتكلمش ماما تاني ...كفايه خسرتني صاحبتي ما تخلينيش اخسر امي كمان بسببك
ادهم حس برعشت صوتها وسمع صوت شهقاتها و صعبت عليه جدا وقال بدموع .....طيب ممكن تهدي.... انا بس عايز فرصه اتكلم واقول لك ايه اللي حصل انا ..
بس قاطعته وقالت بانفعال شديد ....مستحيل اقدر اسمعك تاني....
مستحيل اقدر اصدقك اطلع من حياتي كفايه انك مسبتليش حياه اصلا ...حتى الوجع اللي كنت عايشه فيه استكترته عليا ...سيبني في حالي يا ريتني كنت مت قبل ما اشوفك يا ريتني مت قبل ما اكلمك يا ريت
وضربت التليفون في الارض كسرته وبقت تبكي بشده
والدتها اتصدمت من منظرها و قربت منها وهي بتقول بدموع..... اهدي يا حبيبتي بسم الله ايه اللي حصل لكل ده
رحمه دفعتها وقالت بانفعال .... ما تكلميهوش تاني سامعه يا ماما ما تكلميهوش ابدا.... لو لاقيتك بتكلميه تاني هتخسريني.... هتخسريني خالص
قالت كده وطلعت جري تاني على اوضتها وقفلت الباب وقعدت جنبه وبقت تبكي بقوه وهي مش قادره تتخطى صوته والالم اللي فيه.... بتتمنى تشوفوا وتطمن عليه بعد اللي حصل له ...وبتتمنى تسمعوا وتصدقوا حتى لو هيكدب عليها بس عقلها رافض كل ده تماما
في الوقت ده دخلت ميرا وقالت ....طنط هي رحمه فين
لبنى كانت بتبكي بشده على حالة بنتها وقالت بسرعه ....الحمد لله انك جيتي يا ميرا الحقيني يا بنتي الحقيني .....رحمه مش عارفه مالها
ميرا هدتها وقعدتها وقالت.... اهدي اهدي يا طنط ما تقلقيش خلاص انا هتكلم معاها
وراحت خبطت على باب اوضه رحمه بتوتر وقالت .....رحمه افتحي انا ميرا
رحمه اتجمدت مكانها ما بقتش قادره حتى تقوم تفتح لها مش وعارفه ازاي هتشوفها بعد اللي عرفته
عند ادهم اول ما قفلت معاه غمض عينيه ونزلت دموعه على خده بتعب شديد فلجا لملجاوا الوحيد ونادى اتنين من الحرس ساعدوه اتوضا وصلى وقعد شويه يقرا قران وهو بيرمي كل همومه على الله
عند سليم طلع ورا مشاعر واول ما فتح الباب اتفاجئ لما جريت عليه .كان قلبها هيقف افتكرت انها خسرته خلاص لما حازم قال انه هيتجوز اخر الشهر بس بعد ما اختارها واعترف قدام حازم انه عمره ما كان هيتجوز بنته وان ده كله تمثيل رجع لها ثقتها فيه من تاني وحست ان حياتها رجعت لها
سليم قلبه دق بسرعه من قربها اللي اشتاق له وقال .....وحشتيني يا مشاعري.... وحشني قربك قوي
مشاعر
ابتسمت وسط دموعها وقالت .....انت كمان وحشتني قوي يا قلب مشاعر
وبعدت شويه وبصت لعيونه وقالت....تعبنا كتير يا سليم....بس خلاص مش هنخلي حد يفرقنا تاني
سليم ا بايديه وهو طاير من السعاده وقال ....مش هيفرقنا غير الموت يا مشاعري
مشاعر قالت ....انا كنت خلاص بيني وبين الموت خطوه ....مش عارفه لو خسرتك كنت هعمل ايه ....كل الوقت اللي عدى في بعدك عايشه على امل اننا هنتلاقى تاني ...مش قادره اتخيل لو فقدت الامل ده كان هيحصل لي ايه...اوعى تسيبني ..اوعى تتخلى عني انا مليش غيرك ... انا بحبك قوي يا سليم
سليم كان قلبه بيدق زي الطبل من السعاده وقال بابتسامه...... انا مش مصدق نفسي...اقسم بالله ممصدق .... يا اخي يلعن ابو الشركات على اللي عايزها
مشاعر اتنهدت بكسوف وقالت.... حقك عليا.... انا السبب في انك خسرت كل شغلك
سليم قال بسرعه....اششش...متفكريش كده ....احنا هنرجع نقف من جديد...وزي ما عملنا شركه نعمل عشره
مشاعر قالت بحزن..... بس انت كنت عايز ترجع الشركه دي.... عشان ما يبقاش حازم علم عليك وقرطسك واخدها منك دراع وانت ما قدرتش تعمل حاجه ...بس انت خسرت قدامه
بقلم...زهرة الربيع
سليم بص لها بدهشه وقال .... انت كده بتواسيني ولا بتغظيني يا مشاعر
مشاعر ضحكت وقالت.... في ايه.... مش بقول لك اللي حصل
سليم قال بغيظ..... ما تقوليش اللي حصل.... ما تقوليش اللي حصل يا ستي ..اصلا ده وقت تقولي فيه اللي حصل و....
بس قطع كلامه لما لقى ابنه نايم على الكنبه ومحوطاه بمخادد علشان ما يقعش قال باستغراب....ايه ده
مشاعر قربت منو وقالت بدلال... اصل هنا ما جبنالهوش سرير ....فنيمتهولك على الكنبه النهارده
سليم صفر بسعاده وشالها ولف بيها وقال.... يحيى العدل ..ايوه كده يستاهل من اعمالكم سلط عليكم
مشاعر ضحكت جامد وقالت ...ده ابنك على فكره
سليم قال بغيظ...بس مطلع عيني...ده انا كنت بفكر اخدك ونسبلو البيت ونمشي
مشاعر ضحكت من قلبها وقالت ....طب يلا ادخل خد شاور علشان طلبت لنا عشاء هنا.... ولا انت رايك ايه
سليم قال...... انا عشايا جاهز وسخن.... خمس دقائق.... خمسه مش هتاخر
.. هدخل استحمى واطلع ....الاقيكي مكانك هنا ...ها ....ما تتحركيش خالص.....عشان الظاهر المكان ده الشبكه فيه قويه النهارده
مشاعر ضحكت وقالت ...طب يلا مش هتحرك اهوه ... مستنياك
سليم اخذ هدومه و راح على الحمام وهو بيقول... راجع لك ما تتحركيش..ها
و كان باصص عليها وبيكلمها وهي قالت بذهول... حاسب
بس ما لحقتش تحذره واصطدم في باب الحمام
مشاعر ضحكت جامد عليه وسليم اتنهد وضحك هو كمان ودخل الحمام وهو مش مصدق نفسه وهيتجنن من السعاده
مشاعر غيرت هدومها بسرعه وعطرت الاوضه بالمعطر اللي بيحبه وفضلت مستنياه بابتسامه جميله
بعد شويه خرج من الحمام وهو بينشف شعره
لقاها ماسكه التليفون وبتبصلو باستغراب و هدوء
قرب منها وقال بابتسامه.... في ايه ...ده وقت تليفونات
بالزمه
مشاعر ابتسمت والصدمه باينه على ملامحها والتفتتله وهيه مش قادره تنطق
سليم استغرب وقال...فيه ايه يا مشاعر مالك ...وشك اتخطف كده ليه
مشاعر حاولت تبتسم مقدرتش بلعت ريقها بصعوبه وقالت بعدم تصديق....ابدا ده خالد باعت لي رساله ....شكلو اتجنن بيقول كلام.... كلام اهبل ....بس انا مش هصدقه.
. اكيد بيكدب يعني ....هو تلاقيه بس زعل لاني ما سلمتش عليه ....قال بيقول ان انت.... انت اللي
سليم حس كأن ميه بتلج اتكبت عليه مكانش فاكر انو هيعمل كده بالسرعه دي ... قعد على السرير بياس وحس ان خلاص ما فيش فايده من الانكار اكتر من كده
مشاعر لما شافته كده عيونها اتملت بالدموع وقالت.... انت ما بتردش ليه.... هو كلامه صحيح.... انت اللي قتلت ابويا يا سليم وووو
