سلفتي حكايات احمد عمار

لمحة نيوز

سلفتي صورتني وأنا بغسل حمام حماتي ونشرت صورتي على جروب العيلة وكتبت كل واحدة ومقامها في البيت، ولما جوزي طلب مني أسكت، حماتي بعتت تسجيل صوتي خلّى أخو جوزي يواجه مراته قدام العيلة كلها!
أنا اسمي ندى، عندي 27 سنة، ومتجوزة من 4 سنين من واحد اسمه أحمد، وعندنا بنت عندها 3 سنين. أحمد عنده أخ أكبر منه اسمه سامح، متجوز من واحدة اسمها ريهام، ودي سلفتي اللي طول عمرها شايفة نفسها أحسن مني في كل حاجة.
من أول ما دخلت العيلة وأنا بحاول أكسب محبتهم، وكنت دايمًا بحترم حماتي وبعاملها زي أمي، خصوصًا إنها ست كبيرة وعندها مشاكل في ضهرها ومبتقدرش تتحرك بسهولة. عمري ما اتأخرت عنها في زيارة ولا رفضت لها طلب، ولو احتاجت حاجة كنت بسيب بيتي وبنتي وأروح لها.
لكن ريهام كانت دايمًا بتتعامل معايا بطريقة مختلفة. هي متجوزة سامح من 8 سنين، وبتحب تظهر قدام العيلة إنها ست البيت اللي مفيش زيها، وإنها صاحبة الكلمة في كل حاجة تخص حماتي.
كانت كل ما تشوفني أعمل حاجة تقول تعليق يضايقني، مرة على أكلي، ومرة على لبسي، ومرة على طريقة تربيتي لبنتي. وكنت بعدّي الكلام عشان أحمد مبيحبش المشاكل بينه وبين أخوه.
في مرة كنا قاعدين عند حماتي يوم الجمعة، وريهام كانت بتحكي عن سفرها وخروجاتها، وفجأة بصتلي وقالت
إنتِ يا ندى مش بتخرجي خالص؟ ولا أحمد مخليكي طول الوقت قاعدة في البيت؟
ضحكت وقلتلها
بنخرج عادي، بس كل حاجة بوقتها.
قالت وهي بتضحك
أصل أنا لو مكانك مكنتش هقبل إن حياتي كلها تبقى شغل بيت وعيال.
حماتي بصتلها وقالت
يا ريهام كل واحدة وظروفها، وبعدين ندى عمرها ما قصرت معانا.
ريهام مردتش، لكن بصتلّي بصّة فهمت منها إن الكلام لسه مخلصش.
عدّى حوالي أسبوع، وحماتي اتصلت بيا وقالتلي إنها تعبانة ومش قادرة ترتب البيت، وإنها محتاجة حد يساعدها شوية. أحمد كان في الشغل، وسامح مسافر يومين، وريهام قالت إنها مشغولة ومش هتعرف تيجي.
قلتلها
متقلقيش يا ماما، أنا جاية حالًا.
خدت بنتي ولبست ونزلت على بيت حماتي. أول ما وصلت لقيتها قاعدة على الكنبة وبتحاول تقوم بالعافية. ساعدتها تدخل الحمام، وبعدها بدأت أرتب الصالة والمطبخ.
وأنا بخلص، لقيت حماتي بتقولي
يا ندى معلش، الحمام محتاج يتغسل كويس، وأنا مش قادرة أقف على رجلي.
قلتلها
ده بيتي يا ماما، متقوليش معلش.
جبت أدوات التنظيف وبدأت أغسل الحمام، وكنت لابسة هدوم بيت قديمة، وشعري ملموم، وإيدي كلها مبلولة من الميه والصابون.
في اللحظة دي سمعت صوت باب الشقة بيتفتح، وبعدها صوت ريهام وهي بتقول
إيه ده؟ هو أنا دخلت في الوقت الغلط ولا إيه؟
بصيت لقيتها واقفة عند باب الحمام، وماسكة موبايلها وبتضحك.
قلتلها
إنتِ جيتي إمتى؟
قالت
لسه داخلة، بس واضح إنك مشغولة جدًا.
ورفعت الموبايل ناحية وشي، فقلتلها
بتصوري إيه؟
ردت بمنتهى البرود
ولا حاجة، صورة كده للذكرى.
قلتلها
يا ريهام بلاش هزار سخيف، امسحي الصورة.
ضحكت وقالت
هو أنا صورتك وإنتِ بتعملي جريمة؟ إنتِ بتغسلي حمام أم جوزك، في إيه؟
اتضايقت من طريقتها، لكن ما حبيتش أعمل مشكلة عند حماتي. كملت اللي في إيدي، وبعد شوية خلصت وخرجت أطمن على حماتي.
ريهام فضلت قاعدة معاها شوية، وأنا مشيت بعد ما رتبت المطبخ وحضرت لها الأكل وحطيت لها الدوا جنبها.
لكن وأنا في الطريق لقيت الموبايل بيرن بإشعارات كتير ورا بعض.
فتحت جروب العيلة، ولقيت ريهام منزلة الصورة اللي صورتها ليا وأنا راكعة على الأرض وبغسل الحمام، وكاتبة تحتها
كل واحدة ومقامها في البيت! 
وفي أقل من عشر دقايق، الصورة بقت حديث الجروب.
واحدة من قرايب جوزي بعتت ضحكة، وواحد كتب تعليق ساخر، وواحدة تانية قالت
ربنا يقويكي يا ندى، واضح إنك واخدة شغل البيت كله على كتافك.
حسيت إن وشي سخن من الإحراج، وخصوصًا إن الصورة كانت من غير ما أعرف، ومن غير إذني، وفي وضع مكنتش أتمنى حد يشوفني فيه.
اتصلت بأحمد فورًا.
أول ما رد قلتله
إنت شوفت اللي ريهام عملته؟
قال
شوفت إيه؟
قلتله وأنا متضايقة
مرات أخوك صورتني وأنا بغسل حمام أمك ونزلت صورتي على جروب العيلة، وكتبت كل واحدة ومقامها في البيت!
سكت شوية، وبعدها قال
يا ندى، هي أكيد بتهزر، متكبريش الموضوع.
قلتله
بتهزر؟ يعني إيه تصورني من غير إذني وتعرضني للسخرية قدام عيلتك كلها؟
قال بنبرة ضيق
طب أعملها إيه يعني؟ أروح أضربها؟ دي مرات أخويا، ومش عايز مشاكل بيني وبين سامح.
رديت عليه
وأنا مراتك، ولا أنت فاكر إن كرامتي ملهاش حساب؟
قال
خلاص يا ندى، عدي الموضوع، وامسحي الصورة من دماغك، ومش كل حاجة تستاهل خناقة.
قفلت المكالمة وأنا مش مصدقة إنه بدل ما يدافع عني، بيطلب مني أنا اللي أسكت.
رجعت البيت، ولما دخل أحمد بالليل لقيته بيتصرف عادي جدًا، كأن مفيش حاجة حصلت.
قلتله
أنا مستنية منك موقف.
قال وهو بيغير هدومه
موقف إيه تاني؟ أنا قلتلك هكلم سامح.
قلتله
وأنا مش عايزة سامح، أنا عايزاك تكلم ريهام وتخليها تمسح الصورة وتعتذر.
اتعصب وقال
إنتِ ليه عايزة تعملي مشكلة كبيرة؟ هي قالت كل واحدة ومقامها، وإنتِ كنتِ بتساعدي أمي، فين الإهانة؟
بصيتله وقلت
الإهانة مش في إني بغسل الحمام، الإهانة إنها صورتني في لحظة خاصة ونشرت صورتي عشان تضحك الناس عليا.
لكنه أصر إن الموضوع تافه، وإنه مش هيعمل مشكلة مع أخوه بسبب صورة.
تاني يوم صحيت لقيت ريهام باعتالي رسالة خاصة، بتقولي فيها
متزعليش يا ندى، أنا مكنتش أقصد أضايقك، بس الصورة كانت مضحكة أوي، وكل العيلة ضحكت.
رديت عليها
امسحي الصورة من الجروب، ومش عايزة أشوفك بتصوريلي حاجة تاني من غير إذني.
ردت بسرعة
إنتِ مكبرة الموضوع ليه؟ هو إنتِ محرجة إن الناس تشوفك وإنتِ بتخدمي حماتك؟
الكلام استفزني جدًا، وكتبتلها
أنا مش محرجة من خدمة أم جوزي، أنا محرجة إن فيه واحدة من العيلة معندهاش احترام للناس.
عملتلي علامة إعجاب على الرسالة، وبعدها خرجت من المحادثة.
بالليل أحمد عرف بالرسائل، واتعصب عليا وقال إني كده بصعّد الخلاف، وإنه مش عايزني أتكلم مع ريهام تاني.
قولتله
أنا مش هتكلم معاها، بس كمان مش هروح بيت أمك تاني طول ما هي موجودة.
قال
إنتِ كده بتمنعيني عن أمي؟
قلتله
أمك على راسي، وأنا مستعدة أروح لها وأخدمها، لكن مش هقبل إن مرات أخوك تهيني وأنا ساكتة.
فضلنا نتخانق لحد ما أحمد قاللي جملة وجعتني أكتر من الصورة نفسها
بصراحة يا ندى، إنتِ لو كنتِ مش عايزة حد يتكلم عليكي، مكنتيش عملتي من نفسك خدامة في بيت أمي.
ساعتها سكت.
مش عشان معنديش رد، لكن عشان حسيت إن الشخص اللي كنت مستنياه يدافع عن كرامتي، هو نفسه شايف إن خدمتي لأمه حاجة تقلل مني.
عدّى يومين، وأنا مقاطعة الزيارات تمامًا. لكن يوم الجمعة حماتي اتصلت بيا، وصوتها كان متغير.
قالتلي
يا ندى، إنتِ زعلانة مني؟
قلتلها
لا يا ماما، أنا عمري ما أزعل منك.
قالت
طب ليه مبقتيش تيجي؟
قلتلها
إنتِ عارفة اللي حصل، وأنا مش عايزة أعمل مشاكل.
سكتت شوية، وبعدها قالت
أنا عايزاكي تعرفي إن اللي حصل ده أنا مش راضية عنه، بس فيه حاجة حصلت وأنا لازم أتكلم.
قبل ما أسألها، سمعت صوت ريهام في الخلفية بتقول
يا ماما، هو إنتِ لسه بتكلميها؟ سيبيها، ما هي مش طايقة تيجي عندنا.
حماتي ردت عليها بصوت عالي
اسكتي يا ريهام، أنا بتكلم مع ندى.
وبعدين رجعت تكلمني وقالت
خليكي معايا على التليفون، أنا هبعتلك حاجة.
بعد ثواني لقيت إشعار على الموبايل. فتحت لقيت حماتي باعتالي تسجيل صوتي مدته حوالي أربع دقايق.
استغربت، وقلت لها
إيه ده يا ماما؟
قالتلي
اسمعيه كويس، وبعدها ابقي احكمي بنفسك.
شغلت التسجيل، وفي أول ثواني سمعت صوت ريهام وهي بتتكلم مع واحدة من قرايبنا، وبتضحك بصوت عالي.
لكن أول جملة قالتها خلت إيدي تتجمد على الموبايل.
وقفت التسجيل ورجعت شغلته من الأول، وبعدها اتصلت بحماتي وقلت لها
إنتِ جبتي التسجيل ده منين؟ وإمتى حصل الكلام ده؟
قالتلي
أنا كنت ساكتة من يوم ما شفت الصورة، لكن بعد اللي حصل امبارح قررت إن كل العيلة لازم تسمع التسجيل ده.
وبالفعل، بعد أقل من ساعة، دخلت حماتي جروب العيلة اللي ريهام كانت نشرت فيه صورتي، وبعتت نفس التسجيل الصوتي للجميع.
بعدها كتبت رسالة قصيرة
أنا عايزة كل واحد فيكم يسمع التسجيل للآخر، وبعدها يقول رأيه. لأن فيه حاجات كتير بتحصل في بيتي وأنا ساكتة عنها، لكن مش هسمح إن حد يهين مرات ابني بالطريقة دي تاني.
بعد دقايق، جالي اتصال من أحمد، وكان صوته متوتر جدًا.
قاللي
ندى، إنتِ سمعتي التسجيل؟
قلتلُه
أيوه.
قال
إنتِ عارفة إن سامح عرف اللي فيه؟
قلتله
لأ، أنا مش عارفة غير إن أمك بعتته للعيلة كلها.
سكت لحظة، وبعدها قال
أنا رايح لأمي دلوقتي، وإنتِ لازم تيجي معايا، لأن الموضوع طلع أكبر من الصورة بكتير.
وقبل ما أقفل معاه، لقيت رسالة من حماتي وصلتلي على الخاص، مكتوب فيها
يا ندى، أنا آسفة إني سبتك تتعرضي للإهانة دي، بس أوعي تتكلمي مع أحمد قبل ما أقولك أنا سمعت إيه بنفسي.
وساعتها فهمت إن التسجيل اللي اتبعت على الجروب مش مجرد كلام سخيف اتقال عني، وإن فيه حكاية حماتي كانت مخبياها عن ولادها نفسهم.
روايات_احمد_عمار
يتبع...
لو عايزين الجزء التاني اكتبوا لي في الكومنتات! 
ارفعوا البوست ب لايك و كومنتات، واعملوا حفظ للمنشور، وتابعوا باقي القصة للنهاية. 
الجزء الثاني التسجيل اللي قلب العيلة كلها
فضلت ماسكة الموبايل بعد ما أحمد قفل معايا، ومش قادرة أستوعب إن تسجيل مدته أربع دقايق ممكن يعمل كل التوتر ده.
رجعت شغلت التسجيل من أوله، وركزت في كل كلمة.
كان صوت ريهام واضح جدًا، وكانت بتتكلم مع واحدة اسمها منى، بنت خالة حماتي.
ريهام قالت وهي بتضحك
أنا بقولك يا منى، ندى دي محتاجة حد يفوقها لحجمها الحقيقي. متخيلة نفسها واحدة من العيلة، وكل شوية داخلة طالعة على ماما، وعاملة فيها البنت البارة اللي محدش زيها.
منى سألتها
طب وإنتِ مضايقة منها ليه؟ ما تسيبيها تساعد أم جوزك، إنتِ كده كده مش فاضية.
ريهام ردت
أنا مش مضايقاني إنها بتساعدها، أنا مضايقاني إن ماما بقت تعتمد عليها في كل حاجة. كل ما أكلمها تقوللي ندى عملت وندى جابت وندى ساعدت. طب وأنا فين؟ أنا مرات ابنها الكبير، مش المفروض أكون أنا صاحبة المكانة؟
منى قالت
يا بنتي ما يمكن ندى بتعمل كده من نفسها.
ريهام ردت بنبرة ساخرة
ما هي دي المشكلة! عاملة نفسها ملاك. وأنا عايزة أفهمها إن وجودها في البيت ده مش معناه إنها أعلى مني.
وبعدين سمعت الجملة اللي خلتني أحس إن الأرض بتتحرك من تحتي.
ريهام قالت
أنا صورتها وهي بتغسل الحمام مخصوص. كنت عارفة إنها هتتعصب، بس كنت عايزة أخلي الناس تشوف هي بتعمل إيه. وبعد كده هخلي سامح يفهم إن مراته بقت بتفرض نفسها على أمه، وإنها بتحاول تاخد مكاني.
منى اتفاجئت وقالت
إنتِ بتقولي إيه؟ دي ست بتساعد حماتها، إيه المشكلة؟
ريهام ضحكت وقالت
استني بس، دي لسه البداية. أنا عندي خطة تانية. ماما عندها ورق مهم في درج المكتب، وأنا لازم أخليها تمضيلي عليه قبل ما

تم نسخ الرابط