بعد سبع ايام حكايات زهرة الربيع

لمحة نيوز

رممنا البيت القديم، وحولنا جزءًا منه لمكتبة ومركز تعليم للأطفال، وخصصنا جزءًا من أرباح ممتلكات عبد القادر لمساعدة الأسر المحتاجة، استمرارًا للعمل الخيري اللي بدأه.
أما بناتي، فكل واحدة بدأت تبني مستقبلها.
الكبيرة دخلت الجامعة، والتانية بدأت تتعلم المحاسبة، والتالتة اهتمت بإدارة المؤسسة، والصغيرة كانت دايمًا تقول إنها لما تكبر هتبقى دكتورة وتعالج الأطفال مجانًا.
وفي يوم افتتاح المركز، علقت صورة عبد القادر في المدخل، وتحتها كتبت
هنا عاش رجل أخطأ في بعض قراراته، لكنه ترك وراءه درسًا لن ننساه لا يجوز أن يُؤخذ حق إنسان بسبب كونه بنتًا.
وقفت قدام الصورة وقلت في سري
سامحتك يا عبد القادر، لكن كان نفسي تكون موجود وتشوف بناتك وهما بيستردوا حقهم.
بعد الافتتاح، رجعت البيت وفتحت الصندوق الحديد للمرة الأخيرة.
لقيت في قاعه ورقة صغيرة ماكنتش لاحظتها قبل كده.
كانت رسالة أخيرة بخط عبد القادر
يا جميلة، عارف إنك هتتعبي، وعارف إني سبتلك مسؤولية كبيرة، لكن كنت واثق إنك هتعرفي تحافظي على بناتنا.
افتكري دايمًا إن البيت مش حيطان، وإن الأرض مش تراب، وإن أغلى ميراث ممكن يسيبه الأب لأولاده هو العدل والخوف على بعض.
سامحيني على كل لحظة حسيتِ فيها إنك لوحدك.
قريت الرسالة، وقفلت الصندوق.
ومن اليوم ده، مبقتش أشوف البيت القديم على إنه خرابة زي ما ضرتي كانت بتسميه.
بقيت أشوفه المكان اللي رجع فيه الحق لأصحابه، والمكان اللي عرفت فيه قيمة نفسي وبناتي.
أما ضرتي، فمع الوقت اتعلمت إن البنات مش أقل من الولاد، وإن المال اللي بيتاخد بالظلم عمره ما بيجيب راحة.
والسر اللي كنت بدور عليه تحت الأرض، ماكانش دهب ولا كنز مدفون... كان حقيقة ضاعت سنين طويلة، ولما ظهرت رجّعت لكل صاحب حق حقه.
تمت بحمد الله.

تم نسخ الرابط