بعد سبع ايام حكايات زهرة الربيع

لمحة نيوز

ياسين ماكانش مجرد صاحب نصيب في الأرض، ده كان ليه حق في ميراث والده كمان.
بصيت لمنصور وقلت طب هو فين دلوقتي؟ عايش ولا مات؟
منصور رفع عينه ليا وقال عايش... وآخر مرة شفته كان من حوالي عشرين سنة.
قلبي اتقبض.
وإنتوا سبتوه كل السنين دي من غير ما تدوروا عليه؟!
رد أنا حاولت أوصله، لكن أبويا منعني، وبعدها سافر ومحدش عرف عنوانه. عبد القادر فضل يدور عليه لحد ما تعب، وكان بيبعت ناس تسأل عنه في كل مكان.
المحامي فتح ملف تاني وطلع ورقة عليها عنوان قديم.
وقال عبد القادر قبل وفاته بشهرين وصل لمعلومة مهمة. عرف إن ياسين ممكن يكون موجود في قرية قريبة من المنصورة، وكتب العنوان ده بنفسه.
مسكت الورقة بسرعة وقرأت الاسم.
لكن قبل ما أقدر أتكلم، بنتي الكبيرة لاحظت حاجة غريبة في الخريطة.
قالت ماما، بصي هنا! فيه علامة صغيرة جنب السور الخلفي للبيت، وإحنا لما حفرنا ماوصلناش للمكان ده!
المحامي قرب الخريطة من عينه، وبعدها قال استنوا... دي مش علامة مكان صندوق تاني، دي علامة على بئر قديم كان موجود في الأرض قبل ما البيت يتبني.
منصور وقف فجأة وقال لأ! محدش يقرب من المكان ده!
بصيتله باستغراب ليه؟ إيه اللي موجود هناك؟
اتردد شوية، وبعدها قال لأن أبويا قبل ما يموت، دفن هناك حاجة كان بيقول إنها لو ظهرت هتفتح قضية عمرها أكتر من تلاتين سنة.
المحامي سأله تقصد الدفتر الأسود؟
منصور بصله بصدمة وقال إنت عرفت منين؟!
المحامي رد لأن عبد القادر سلّمني مفتاحه قبل ما يموت.
طلع المحامي مفتاح صغير من جيبه، وكان عليه رقم محفور.
وفي اللحظة دي، فهمت إن الصندوق اللي لقيناه ماكانش هو السر كله... ده كان مجرد بداية.
لكن اللي ماكنتش أعرفه إن الدفتر الأسود ده هيكشف إن فيه شخص قريب جداً مننا كان بيزور أوراق الأرض من سنين طويلة، وإن عبد القادر كان عارف الحقيقة وساكت.
وفجأة، المحامي بصلي وقال
جميلة، قبل ما نفتح المكان ده، لازم أسألك سؤال مهم... هل حماتك لسه عايشة؟
قلتله أيوه، ليه؟
رد وهو بيبص لمنصور
لأنها الوحيدة اللي تقدر تفسر ليه عبد القادر كتب كل أملاكه لأولاد سعاد، وفي نفس الوقت ساب لمراته وبناته البيت اللي مدفون فيه الدليل!
وفي اللحظة دي، تليفوني رن... كانت حماتي، وأول ما رديت قالتلي بصوت مرتعش يا جميلة، إوعي تفتحي البير... أنا جاية أحكيلك كل حاجة قبل ما يفوت الأوان!
فضلت ماسكة الكارت وببص للاسم، وقلبي بيدق بسرعة. طلعت موبايلي واتصلت بالرقم المكتوب عليه.
رد راجل بصوت هادي ألو، مين معايا؟
قلتله أنا جميلة، مرات عبد القادر الله يرحمه.
سكت شوية، وبعدها سمعت صوته بيتغير عبد القادر مات؟!
قلتله والدموع في عيني أيوه، من أسبوعين تقريباً.
فضل ساكت فترة طويلة، لدرجة إني افتكرت إنه قفل الخط، لكن فجأة قال
أنا كنت مستنيه من أكتر من ثلاثين سنة... كنت مستني اليوم اللي أسمع فيه صوته وأعرف ليه عيلته سابته يضيع لوحده.
قلتله إنت ياسين؟
رد أيوه... أنا ياسين، أخو عبد القادر.
اتفقنا نتقابل تاني يوم في مكتب المحامي فؤاد.
طول الليل ماعرفتش أنام. كنت بفكر في الراجل اللي عاش عمره كله بعيد عن أهله، وفي جوزي اللي مات وهو بيحاول يصلح غلطة قديمة.
تاني يوم، وصل ياسين.
كان راجل كبير في السن، شعره أبيض، وملامحه فيها تعب السنين. أول ما دخل المكتب، عينه وقعت على صورة عبد القادر المعلقة على الحيطة.
قرب منها وقال بصوت مبحوح كان نفسه يشوفني مرة أخيرة... وأنا كمان كنت نفسي أشوفه.
المحامي قدم له كرسي، وطلع الدفتر الأسود.
ياسين أول ما شافه، اتغيرت ملامحه وقال الدفتر ده! أنا كنت فاكر إنه ضاع للأبد!
سألته إنت تعرف إيه عن الدفتر ده؟
فتح صفحة معينة، وأشار لتوقيع قديم وقال
ده توقيع أبويا. هو كتب فيه إن الأرض دي متقسمة بين أولاده الأربعة بالتساوي، وإن فيه جزء مستقل محفوظ ليا.
منصور حاول يقاطعه الكلام ده قديم ومش معناه إنك ليك حق دلوقتي!
ياسين بصله بهدوء وقال أنا مش جاي أطلب من حد حاجة مش من حقي، أنا جاي أعرف ليه اتقال لي طول عمري إن أبويا مات وسايبني من غير أي حق.
أم عبد القادر بدأت تعيط، وقالت سامحنا يا ياسين... إحنا غلطنا في حقك.
لكن ياسين ما ردش عليها.
المحامي فؤاد بدأ يراجع المستندات، وبعد ساعات من الفحص، اكتشف إن فيه عقد ملكية أصلي لازم يتقدم للشهر العقاري علشان تتحدد الحقوق بشكل قانوني.
وفجأة، ياسين طلب يشوف الورقة اللي عبد القادر كتبها ليا.
قراها أكتر من مرة، وبعدها بصلي وقال
جميلة، إنتِ عارفة إن أخويا كان بيعتبرك أكتر واحدة أمينة على البيت ده؟
هزيت راسي وأنا مش فاهمة.
كمل عبد القادر اتصل بيا قبل وفاته، وقاللي إنه سابلك البيت ده مخصوص، لأنه عايزك تكتشفي الحقيقة بنفسك، وتكوني إنتِ اللي بتوصلي الحق لأصحابه.
سألته طب ليه ماقالش لي كل ده؟ ليه سابني أواجه كل الظلم ده لوحدي؟
رد ياسين لأنه كان عايز يحميكي من ناس كانت مستعدة تعمل أي حاجة علشان الأرض تفضل في إيديها.
بصيت ناحية منصور، لقيته ساكت ومش قادر يرفع عينه.
وفجأة المحامي طلع مستند أخير من الملف وقال
استنوا، فيه حاجة مهمة إحنا لسه ماخدناش بالنا منها.
كانت ورقة مرفقة بالعقد، عليها توقيع عبد القادر، وتاريخ قبل وفاته بأيام.
قرأ المحامي أول سطر، وبعدها رفع عينه ليا وقال
جميلة، جوزك ماكانش سايبلك البيت القديم بس... هو كمان كان عامل وصية منفصلة بخصوص بناتك الأربع.
قلبي اتقبض وسألته وصية إيه؟
رد وهو بيقلب الورقة
عبد القادر خصص لكل بنت من بناته نصيباً مستقلاً من الأرض، لكن بشرط واحد...
وقبل ما يكمل، منصور وقف فجأة وقال
محدش ينفذ الوصية دي قبل ما أقول الحقيقة اللي عبد القادر نفسه كان مخبيها عن جميلة!
بصيتله وقلت حقيقة إيه تاني؟!
نزل عينه للأرض وقال
البيت القديم ده... أبويا ما بناهوش علشان يسكن فيه حد. هو بناه علشان يحفظ فيه أمانة تخص أم جميلة نفسها!
اتجمدت مكاني.
أمي أنا؟! إنت بتقول إيه؟ أمي ماتت وأنا صغيرة، ومالهاش أي علاقة بعيلة عبد القادر!
منصور رد بصوت منخفض
وده بالضبط السر اللي أخويا كان مستنيكي تكتشفيه... لأن أمك كان ليها حكاية قديمة مع والد عبد القادر، والحكاية دي هي اللي هتفسر كل اللي حصل من أول يوم دخلتي فيه البيت!
حسيت إن الأرض بتلف بيا، وبصيت لمنصور وقلتله بصوت عالي
إنت بتقول إيه؟ أمي مالها ومال أبو عبد القادر؟ إنتوا تعرفوا أمي منين؟!
منصور قعد على الكرسي، وحط إيده على وشه، وقال
أمك يا جميلة كانت يتيمة، وأبو عبد القادر هو اللي ساعدها وهي صغيرة. أبويا كان عنده أرض زراعية كبيرة، وفي يوم لقى أمك واقفة قدام البيت وبتعيط، لأنها كانت فقدت أهلها ومش لاقية مكان تعيش فيه.
أم عبد القادر كملت الكلام وهي بتبصلي
أبو عبد القادر كان راجل طيب، وساعدها، وخصص لها جزء من الأرض علشان يبقى ليها مصدر رزق تعيش منه. لكن أمك رفضت تاخد الأرض لنفسها، وقالتله إنها عايزة تحفظ حقها لولادها في المستقبل.
بصيتلها باستغراب طب وإيه علاقة ده بيا؟!
ردت أبو عبد القادر كان عارف إن أمك خلفتك، وإنك بنتها الوحيدة، لكنه مات قبل ما يقدر يسلمها الأوراق بنفسه.
المحامي فؤاد فتح الملف وقال
وده سبب وجود المستندات القديمة في البيت. الأرض دي ليها عقد مستقل، وحق والدتك فيها ثابت بمستندات لازم نراجعها ونتأكد من صحتها وتسجيلها.
مسكت الورقة وفضلت أقرا الاسم المكتوب عليها.
كان اسم أمي بالكامل!
حسيت إن دموعي نزلت من غير ما أحس.
أمي اللي ماتت وأنا لسه صغيرة، واللي عمري ما عرفت إنها سابتلي أي حاجة، كان ليها حق في الأرض دي من سنين طويلة!
لكن لسه فيه سؤال كان محيرني.
بصيت للمحامي وقلت طب ليه عبد القادر استنى كل السنين دي؟ وليه ماقاليش إن الأرض دي تخص أمي؟
المحامي رد عبد القادر حاول يوصل للمستندات الأصلية من زمان، لكن كان فيه نزاع قديم على حدود الأرض، ومكانش عايز يسلمك حاجة غير لما يتأكد إن حقك محفوظ بشكل قانوني.
ياسين اتكلم لأول مرة وقال
أخويا كان بيدور على حق أمي وحقك في نفس الوقت. كان شايف إن اللي حصل زمان ظلم كبير، وكان نفسه يصلحه قبل ما يموت.
في اللحظة دي، سعاد ضرتي اتصلت بيا.
رديت، وسمعت صوتها متوتر
جميلة، أنا عرفت إن ياسين رجع، وعايزة أقابلك فوراً. فيه حاجة لازم تعرفيها عن عبد القادر.
قلت قولي من غير لف ودوران.
قالت أنا لقيت بين أوراقه قبل ما يموت خطاب قديم، وكان مكتوب فيه إن البيت القديم مش هو آخر حاجة سابهالك... فيه حاجة تانية كان مخبيها عنك.
قفلت معاها واتصلت بالمحامي، وطلبت منه نرجع البيت ونراجع كل المستندات.
وبالفعل، رجعنا البيت القديم، وبدأنا نفتش في كل ركن فيه.
لحد ما بنتي الصغيرة نادت علينا من الأوضة اللي كانت زمان أوضة عبد القادر
ماما! تعالي شوفي الحيطة دي!
قربنا منها، ولقينا جزء من المحارة واقع، ووراه تجويف صغير.
المحامي مد إيده وطلع منه ظرف أبيض، مكتوب عليه
إلى جميلة... آخر أمانة.
فتحت الظرف، ولقيت جواه خطاب طويل، ومعاه مفتاح نحاسي صغير.
بدأت أقرأ
يا جميلة، لو وصلتي للمفتاح ده، يبقى عرفتي جزء كبير من الحقيقة. لكن فيه سر أخير لازم تعرفيه، وهو السبب اللي خلاني أطلب منك تتمسكي بالبيت ده مهما حصل.
المفتاح ده هيفتح باب مكان عمرك ما تخيلتي إنه موجود... والمكان ده فيه الدليل اللي هيحسم كل حاجة.
رفعت عيني للمحامي وسألته
هو يقصد إيه؟ فين المكان ده؟
المحامي بص للمفتاح، وبعدها بص ناحية أرضية الأوضة وقال
يا نهار أبيض... ده مفتاح المخزن القديم اللي تحت السلم!
نزلنا كلنا ناحية السلم، وبدأنا ندور لحد ما لقينا باب صغير مستخبي ورا دولاب خشب قديم.
دخلت المفتاح في القفل...
ولما الباب اتفتح، ظهر قدامنا مكان مليان صناديق وملفات وصور قديمة.
لكن عيني وقعت على صندوق واحد بس، مكتوب عليه بخط عبد القادر
الحقيقة اللي لازم جميلة تعرفها عن جوزها قبل ما تحكم عليه.
مديت إيدي ناحية الصندوق، لكن المحامي فؤاد منعني وقال
استني يا جميلة... أنا لازم أقولك حاجة الأول. الورق اللي جوه الصندوق ده ممكن يغير فهمك لسبب كتابة أملاك عبد القادر لأولاد سعاد.
وبصلي في عيني وقال
لأن اللي حصل يوم ما جه المحامي يكتب الأملاك... ماكانش بالبساطة اللي إنتِ متخيلاها!
بصيت للمحامي وقلتله بلهفة
يعني إيه يا أستاذ فؤاد؟ هو عبد القادر كان مجبر يكتب أملاكه لأولاد سعاد؟!
المحامي سكت شوية، وبعدها قال
مش مجبر بالمعنى الحرفي، لكن كان فيه ضغط كبير عليه، وكان عارف إن أي قرار هياخده وقتها ممكن يعرّض مستقبل بناته للخطر.
منصور اتحرك في مكانه وقال خلاص يا فؤاد، كفاية! الراجل مات، ومش من حقنا نفتّح كل الملفات القديمة.
ياسين بصله بغضب إنت لسه خايف من إيه يا منصور؟ بعد كل السنين دي لسه مصمم تخبي الحقيقة؟
المحامي فتح الصندوق، وبدأ يطلع منه ملفات متقسمة حسب التواريخ.
كان فيه صور قديمة، وعقود، وإيصالات، وخطابات متبادلة بين عبد القادر ووالده.
لكن وسط الأوراق دي، لقيت ظرف صغير مكتوب عليه
يُفتح أمام جميلة وبناتها فقط.
مسكت الظرف وفتحته، ولقيت أربع ورقات، كل ورقة عليها اسم واحدة من بناتي.
الأولى مكتوب فيها
إلى ابنتي الكبرى... سامحيني لو في يوم حسّيتي إن جدك أو أبوكي فرّطوا في حقك.
والتانية
إلى ابنتي الثانية... حقك محفوظ، حتى
تم نسخ الرابط