كنت حامل انا واخت جوزي في نفس الوقت
أنا كنت حامل أنا وأخت جوزي في نفس الوقت، وربنا رزقني ببنت، ورزقها هي بولد. ومن يوم ما ولدنا، وحياتي اتحولت لجحيم بسبب المقارنة اللي مابتخلصش بين بنتي وابنها!
أخت جوزي اسمها ريهام، وجوزي اسمه أحمد، وحماتي اسمها أم أحمد. إحنا ساكنين في بيت عيلة، أنا وجوزي في شقة فوق، وحماتي وحمايا في الدور الأرضي، وريهام كانت قاعدة عند أهلها بعد الولادة، يعني في بيت جوزي برضه، وكأنها صاحبة البيت وأنا الغريبة اللي داخلاه بالغلط.
من أول يوم ولدت فيه بنتي، وحماتي وهي شايلة ابن بنتها، كانت تبصلي وتقول
أهي دي الحريم اللي تجيب الرجالة وتفرح قلب أهل جوزها، مش اللي تجيب بنات وتخلينا نستنى الواد اللي يشيل اسم العيلة!
كنت بسمع الكلام وأسكت، وأبص لبنتي اللي لسه مكملتش أيام، وأحاول أمنع دموعي من النزول. بنتي اسمها ملك، وكانت ملاك صغير نايم في حضني، مالهاش ذنب في أي حاجة، لكنهم كانوا بيعاقبوها على إنها اتولدت بنت!
أما ريهام، فكانت قاعدة تحت عند أمها، وكل طلباتها مجابة. لو ابنها عيط، حماتي تجري تشيله. لو جعان، تسيب كل حاجة وتعمله الأكل. لو محتاج يتغير، تنده على أي حد يخدمه.
إنما أنا، كنت قاعدة في شقتي لوحدي، تعبانة من الولادة، وبنتي بتعيط من المغص، ومحدش حتى كان بيطلع يسألني محتاجة إيه.
والأصعب من كده، إن كل ما أحمد ينزل يقعد مع أهله، يرجع يلومني ويقولي
إنتِ ليه مش بتنزلِي تساعدي أمي؟ إنتِ فاكرة نفسك أحسن من أختي؟ دي لسه والدة زيك، ومع ذلك بتساعد في البيت!
كنت أبصله بصدمة وأقوله
أساعد في إيه يا أحمد؟ أنا لسه والدة، وبنتك بتعيط طول الليل، وأنا مش لاقية وقت حتى أنام!
يرد عليا ببرود
ما هي ريهام والدة برضه، وشايلة ابنها وبتقعد مع أمي!
كنت نفسي أقوله إن ريهام مش بتعمل حاجة، وإن أمها هي اللي بتخدمها، لكن كنت بخاف المشاكل تكبر، وأسكت علشان بيتي وبنتي.
عدت خمسة شهور على الحال ده، وكل يوم نفس الإهانة، ونفس الجملة اللي بتقطع قلبي. لحد ما جه اليوم اللي عمري ما هنساه.
اليوم ده حمايا قرر يجيب دكر بط كبير علشان نتعشى كلنا تحت. حماتي طلعت تنادي عليا وقالت
انزلي يا مرات ابني، سخني لنا شوية ميه علشان ندبح البط وننضفه، بدل ما إنتِ قاعدة فوق مش بتعملي حاجة!
نزلت وأنا شايلة بنتي، وحطيتها في سرير صغير في المطبخ، وبدأت أسخن الميه. كنت تعبانة، لكن قلت أخلص اللي ورايا علشان محدش يمسك عليا غلطة.
في اللحظة دي، ريهام دخلت وهي شايلة ابنها، ولما حمايا جاب البط وحطه في الحوش، البط بدأ يجري ويخبط بجناحاته.
ريهام ضحكت وقالت
بص يا حبيبي، البط بيجري منك!
لكن فجأة، الدكر الكبير فلت من إيد حمايا، وطار بجناحاته ناحية ريهام وابنها.
ريهام صرخت، وحاولت تحمي ابنها، لكن البط خبط فيه بمخالبه ومنقاره، والولد وقع على الأرض وهو بيصرخ صرخة هزت البيت كله!
جريت ريهام عليه، ولما شافت الدم مغرق وشه، صرخت بجنون
ابني! ابني يا ناس!
حمايا شاله بسرعة، وحماتي فضلت تخبط على صدرها وتصرخ، وأنا خرجت من المطبخ على صوتهم، مش فاهمة إيه اللي حصل.
لكن أول ما قربت وشفت وش الطفل، حسيت إن رجلي مش شايلاني. الإصابة كانت خطيرة جدًا، والدم نازل بغزارة من ناحية عينه.
أحمد نزل يجري من فوق، وأول ما شاف المنظر، شال ابن أخته من إيد أبوه، وطلع بيه على المستشفى، وريهام جريت وراه وهي بتصرخ.
بعد دقائق، البيت كله اتقلب، وحماتي كانت بتلف في الحوش زي المجنونة، لحد ما فجأة بصت ناحيتي، وعينيها مليانة شر، وقالت بصوت عالي
إنتِ اللي عملتي كده! إنتِ اللي طيرتي عين حفيدي علشان بنتك مش ولد! قسماً بالله ما هسيبك غير لما أخلي جوزك يطلقك وأحبسك كمان!
الجزء التاني اتهام قلب حياتي
وقفت مكاني وأنا مش مستوعبة الكلام اللي حماتي قالته. كنت لسه خارجة من المطبخ على صوت الصريخ، ومش فاهمة إيه اللي حصل بالظبط، وفجأة لقيتها بتتهمني إني السبب في إصابة حفيدها، وبتقول إنها هتخلّي أحمد يطلقني!
بصيتلها والدموع اتجمعت في عيني، وقلت بصوت بيترعش أنا عملت إيه يا أمي؟! أنا كنت في المطبخ بسخن الميه، والله ما قربت من البط ولا حتى كنت جنب ريهام!
صرخت في وشي اخرسي! إنتِ اللي كنتِ واقفة في المطبخ، وإنتِ اللي نزلتينا علشان ننضف البط! أكيد عملتي حاجة خلتِه يفلت ويجري على حفيدي!
حاولت أشرح لها إن حمايا هو اللي كان ماسك البط، وإنه فلت منه فجأة، لكن هي ما كانتش عايزة تسمعني أصلًا.
كانت بتلف في الحوش، وتخبط بإيديها على صدرها، وتصرخ يا مصيبتي! يا ضنايا! الواد راح مني! دي عملت فيه كده علشان غيرانة من ريهام!
الكلمة دي وجعتني أكتر من أي حاجة.
غيرانة من ريهام؟!
أنا اللي كنت قاعدة فوق لوحدي، بشيل بنتي وأرضعها وأغير لها، وأقوم أعمل الأكل وأنضف البيت على قد ما أقدر، وفي نفس الوقت بسمع كلام يهينني كل يوم علشان ربنا رزقني ببنت.
كنت فين أنا من كل ده؟!
هو أنا لما زعلت من معاملتهم لبنتي، بقيت إنسانة ممكن تأذي طفل مالوش ذنب؟!
نزل حمايا من على السلم وهو بيحاول يهدي حماتي، وقال يا أم أحمد، اهدي شوية، إحنا لسه مش عارفين حالة الولد إيه. وبعدين البط فلت من إيدي، وأنا اللي كنت ماسكه.
لكن حماتي بصتله بغضب وقالت إنت كمان هتدافع عنها؟! يعني إنت شايف إن مرات ابنك بريئة وحفيدنا هو اللي غلطان؟!
حمايا اتنهد وقال أنا ما قلتش كده. أنا بقول اللي حصل قدامي. البط فلت مني، وكلنا كنا واقفين في الحوش.
لكنها ما سكتتش، وفضلت تكرر نفس الاتهام.
في اللحظة دي، كنت حاسة إن الدنيا بتلف بيا. بنتي ملك كانت لسه في السرير الصغير جوه المطبخ، وأنا مش عارفة أروح أشيلها ولا أفضل أدافع عن نفسي.
دخلت المطبخ بسرعة، وشلت ملك من سريرها، وضميتها لصدري وأنا بحاول أهدّي نفسي.
بصيت في وشها الصغير، ولقيتها بتبصلي بعينيها الواسعتين من غير ما تفهم أي حاجة من اللي بيحصل حواليها.
همست لها مالكيش ذنب يا حبيبتي. والله مالكيش ذنب في أي حاجة.
وفجأة، سمعت صوت حماتي من ورايا حتى بنتك دي، لو كانت ولد، كان زمان الناس كلها فرحانة بيها. لكن إنتِ جيتي لنا ببنت، وفوق ده كله عايزة تخربي فرحتنا بالولد!
لفيت لها وأنا مش مصدقة اللي بسمعه.
قلت يا أمي، دي طفلة! ملك لسه خمس شهور، وابن ريهام لسه صغير برضه. إزاي تقولي الكلام ده قدام الأطفال؟!
ردت عليا بحدة أنا أقول اللي أنا عايزاه في بيتي!
الكلمة دي خلتني أسكت.
بيتها؟!
هو البيت اللي أنا عايشة فيه مع جوزي وبنتي بقى مجرد مكان أعيش فيه بإذنهم؟!
وقبل ما أقدر أتكلم، سمعت صوت عربية أحمد وهي بتتحرك من قدام البيت. كان أخد ابن أخته للمستشفى، وريهام معاه، وسابوني لوحدي في وسط كل الاتهامات دي.
طلعت شقتي وأنا شايلة ملك، وقفلت الباب ورايا.
قعدت على طرف السرير، وحاولت أتصل بأحمد.
مرة.
واتنين.
وتلاتة.
لكن ما ردش.
فضلت قاعدة مستنية أي خبر عن الطفل، رغم إن حماتي كانت بتتهمني، ورغم كل اللي عملوه فيا. كنت خايفة عليه فعلًا، لأنه طفل صغير، ومهما كانت علاقتي بأمه، هو مالوش ذنب في أي خلاف بين الكبار.
بعد حوالي ساعتين، أخيرًا أحمد رد.
أول ما سمعت صوته، سألته بسرعة طمني، الولد عامل إيه؟!
لكن بدل ما يطمني، صوته جه غاضب إنتِ عملتي إيه يا نادية؟!
حسيت إن قلبي وقع مني.
قلت أنا؟! عملت إيه يا أحمد؟ أنا كنت في المطبخ!
قال أمي بتقول إنك كنتِ السبب في اللي حصل، وإنك كنتِ متضايقة من ريهام ومن ابنها.
رديت عليه وأنا بحاول أسيطر على دموعي وإنت مصدق الكلام ده؟! إنت عارف إني ما أذيتش حد. أنا كنت بسخن الميه، وأبوك هو اللي كان ماسك البط.
سكت لحظة، وبعدها قال أنا مش عارف أصدق مين. المهم دلوقتي إن الولد في المستشفى، والدكاترة بيكشفوا عليه.
قلت ربنا يشفيه ويطمنكم عليه. بس يا أحمد، بالله عليك، ما تظلمنيش. أنا مش ممكن أأذي طفل، حتى لو أمه بتضايقني.
رد ببرود لما أرجع هنتكلم.
وقفل المكالمة.
فضلت ماسكة الموبايل في إيدي، وببص للشاشة، وأنا حاسة إن جوزي اللي كنت فاكرة إنه سندي، بقى أول واحد يشك فيا.
عدت ساعات طويلة، وكل شوية أبص من الشباك يمكن أشوف أحمد راجع.
لحد ما الساعة قربت من نص الليل، وسمعت صوت الباب بيتفتح.
خرجت من الأوضة بسرعة، ولقيته داخل ووشه متغير.
سألته طمني، الولد بقى كويس؟
قال الحمد لله، الدكاترة وقفوا النزيف، بس لسه محتاج فحوصات، ومش عارفين إذا كانت عينه اتأثرت ولا لأ.
حطيت إيدي على قلبي وقلت يا رب يشفيه.
لكن أحمد ما ردش على دعائي، وبدل ما يقعد يحكيلي اللي حصل، قال أمي مصممة إنك السبب.
بصيتله وقلت وإنت رأيك إيه؟
ما ردش.
كررت السؤال يا أحمد، أنا بسألك إنت. إنت عارفني من سنين. عمري عملت حاجة زي دي؟!
قال بعد تردد أنا عايز أفهم اللي حصل.
قلت مفيش حاجة محتاجة تفسير. البط فلت من إيد أبوك، وجرى ناحية ريهام وابنها. أنا كنت في المطبخ، وكل اللي شوفته إني خرجت على صوت الصريخ.
هز راسه، وبعدها قال بكرة هتنزلي تعتذري لأمي وريهام.
اتصدمت.
أعتذر عن إيه؟! أنا ما عملتش حاجة!
رد بعصبية اعتذري علشان الدنيا تهدى، والموضوع يعدي.
قلت يعني أقول إني غلطانة وأنا بريئة؟! وأفضل طول عمري متهمة بحاجة ما عملتهاش؟!
قال إنتِ مكبرة الموضوع ليه؟ اعتذار وخلاص!
بصيتله بوجع وقلت لأن الموضوع مش مجرد اعتذار يا أحمد. أمك قالت إنها هتخلّيك تطلقني، واتهمتني إني حاولت أأذي طفل. لو اعتذرت عن حاجة ما عملتهاش، بكرة هيعتبروا الاعتذار اعتراف.
أحمد سكت شوية، وبعدها دخل الأوضة من غير ما يرد.
أما أنا، ففضلت قاعدة جنب بنتي لحد الفجر.
وفي الصبح، وأنا بغير هدوم ملك، سمعت صوت خبط عنيف على الباب.
فتحت، لقيت حماتي واقفة، ووراها ريهام.
كانت ريهام باين عليها التعب، وعينيها وارمة من العياط، لكن أول ما شافتني قالت إنتِ مبسوطة دلوقتي؟!
بصيتلها باستغراب مبسوطة بإيه؟!
صرخت ابني في المستشفى، ومش عارفة إذا كان هيشوف بعينه كويس ولا لأ، وإنتِ قاعدة هنا مع بنتك كأن مفيش حاجة حصلت!
قلت والله أنا زعلانة عليه، وبدعي ربنا يشفيه. لكن أنا ما عملتش حاجة.
ريهام قربت مني وقالت أنا شفتك وإنتِ واقفة في المطبخ، وإنتِ كنتِ عارفة إن البط موجود في الحوش!
قلت بذهول أيوه، كنت عارفة، لأننا كلنا كنا عارفين إن أبوك جاب البط علشان العشا. إيه علاقة ده باللي حصل؟!
ردت أنا مش هسيب حق ابني!
حماتي تدخلت وقالت ولا أنا. ومن النهارده، إنتِ مش هتعيشي