رواية حين تبكي الجدران (كاملة جميع الفصول) بقلم عادل عبدالله
كده يا جمعة ! يعني الناس تاكل العيش بالشكل ده !!!
جمعة معلش يا معلم انا كلمت العجان يخلي العجين يخمر كويس .
ربيع هات كام رغيف من عندك علشان اوزنهم .
ينهض شريكه رجب من مكانه في غضب ايه يا معلم ربيع انت مش عامل حساب لوجودي ولا ايه
ربيع لا ازاي يا معلم رجب انت اد الدنيا .
رجب ازاي بقي !! انت داخل تعيب علي شغل الصنايعية و انا قاعد وسطهم ولا كأنك شايفني موجود !!!
ربيع ما انت شايف يا معلم رجب العيش صغير و مش خمران صح !!!
رجب قصدك ايه يعني انا قاعد زي قلتي والصنايعية مش عاملين حساب لوجودي !!!!!
ربيع لا يا معلم انا قصدي ان كل واحد يشوف شغله صح .
رجب طيب كل الصنايعية النهاردة عندهم نص يوم خصم .
ربيع ملوش لزوم تخصم من اجرتهم ده كل واحد بيشقي طول اليوم علشان يروح لعياله بجنيهين يصرفهم عليهم .
رجب يعني ولا عجبك كده ولا عجبك كده !!! و مادام
ربيع ده مالي زي ماهو مالك واكل عيشنا ولازم نراعيه بما يرضي الله .
رجب يبقي من بكره الصبح تنزل معانا كل يوم من بعد الفجر علطول .
ربيع حاضر يا معلم رجب انا هنزل بعد كده افتح الفرن بنفسي .
في المقهي
يعود جاسر للجلوس علي مقعده ويمسك بالشيشة ويمني نفسه قائلا اااه لو البت دي تكون من نصيبك ياض يا جاسر !! بت زي القشطة !! .
ثم يري والده المعلم دياب يخرج من المنزل فيضع الشيشة جانبا حتي يصل اليه .
دياب مطلعتش تنام ليه يا جاسر وانت سهران في القهوة طول الليل
جاسر لقيت الجو حلو ومش جايلي نوم قولت اقعد استناك علي ما تنزل .
دياب الواد فتحي جه ولا لسه
جاسر جه يابا شغال جوه .
دياب طيب قوله يجيب الشيشة بتاعتي واطلع انت نام علشان امك
جاسر حاضر يابا يلتفت ويقول ياض يا فتحي هات الشيشة بتاعت المعلم الكبير .
ثم يعود الي والده كنت عايز اكلمك في موضوع يابا .
دياب ارغي ما انت سهران طول الليل وفايق وهطلع فوقانك عليا .
جاسر لا يابا ده انا كنت بفكر طول الليل في الموضوع اللي عايز اكلمك فيه .
دياب طيب قول .
جاسر انا عايز اتجوز يابا .
دياب وماله !! اجوزك يا جاسر ده انت ابني الكبير ودراعي اليمين .
جاسر يضحك ربنا يخليك ليا يابا .
دياب وعايز تتجوز وخلاص ولا فيه واحدة في دماغك
جاسر ايوه يابا عايز اتجوز شروق بنت المعلم رجب .
يضع دياب الشيشة جانبا في غضب مين وملقتش الا بنت رجب !!
جاسر القلب ومايريد يابا .
دياب اوعي تجيب سيرة الموضوع ده تاني !! لو بنت رجب اخر بنت في الدنيا مش هجوزهالك واسيبك قاعد كده من غير جواز .
جاسر ليه يابا انا بحب البت دي !!
دياب من غير ليه
في منزل المعلم دياب
يدخل جاسر وعلي وجهه غضب جم !!
الام نجوي مالك يا جاسر ايه اللي حصل
جاسر مفيش يامه انا داخل انام .
الام نجوي لا مش هسيبك تنام الا لما تقولي مالك ايه اللي حصل
جاسر ابويا .
الام ماله ابوك ماهو لسه نازل زي الفل .
جاسر بكلمه وبقوله عايز اتجوز طلع فيا و رمي الشيشة من ايده وقالي لو اخر بنت في الدنيا مش هجوزهالك .
الام تضحك مين دي ياض اللي عايز تتجوزها وابوك رافض
جاسر شروق يامه بنت المعلم رجب .
الام شروق بنت رجب !!! وملقتش الا بنت رجب اللي عايز تتجوزها
جاسر مالها شروق يامه
الام ابوك وابوها مش بيطيقوا بعض ومستحيل ابوك يوافق بجوزهالك و ابوها كمان مستحيل يوافق علي جوازكم .
جاسر ليه يامه !!
الام من غير ليه هو كده .
جاسر طيب اعملوا حسابكم انا هتجوزها يعني هتجوزها وافقوا
صب عنكم هتجوزها .
