رواية حدوتة زين كاملة جميع الفصول بقلم سمية عبدالسلام
عملت ايه في الامتحان
حليت.
الحمدلله طمنتيني.
بس طلع الحل غلط.
ليه! حليت غلط ليه!! انت مش قلت انك مذاكرة المادة دي كويس
حصل بس هما اغبية و جايبين أسئلة ساهلة طب يعرفوا منين بقا المذاكر من اللي معاه محو أمية قومت انا بقا عملت ايه...قولي ايه
هببتي ايه يا اخرة صبري
بغض النظر عن ان دي جملة امي و انت خدتها و كده انتم بتدخلوا على شغل بعض بس مش مشكلة نبقا نشوف جملة ليها غيرها.
عارفة ان ما بطلتي رغي انا هقتلك و اروح اسلم نفسي.
مش بحكي معاك يا فوزي مالك قفوش كد ليه بلاش تاخد كل حاجة على اعصابك هتموت مجلوط.
بدأ يتعصب و برقلي بعينه
خلاص هسكت بس ما تزغرليش كده اصل انا بخاف.
لا وانت يابت وش خوف.
اسمها وش كسوف و بلاش تخترع مصطلحات جديدة مش هنفتي احنا.
ده انا اللي نفسي اخترع إلة زمن ارجع بيها عشان ارمي نفسي قدام عربية نص نقل ولا اني اروح و اتقدملك.
ثانية واحدة هو انا واقفة بتكلم معاك ليه اصلا انت تعرفني يا أخ
بصلي بدهشة كده و رفع حاجبه
اخ لأ انا مش اخوك انا حيالله جوزك بس
يخربيت الزهايمر و سنينه و انت عامل ايه دلوقت يا فقش.
عارفة الفشار لما بتحطيه على النار ويبدأ يفرقع.
استغربت و قلت
اه ماله.
انا بقا هفرقع اكتر منه.
فين الشراب الابيض بتاعي
مش عارفة بس ممكن تلاقيه
و ايه هيودي شرابي درج المطبخ.
مش متأكدة بصراحة هو كان درج المطبخ و لا درج التلاجة مع الخضار.
وشه اتقلب وقرب مني و انا خفت منه
مالك يا ابو حميد انت هتتحول ولا ايه صلي على النبي في قلبك يا راجل ده انا بس بفكر معاك بصوت عالي.
قوووم اصحى .
هي الساعة معاك كام
اتنين بعد الضهر.
طب تفتكري اي نوع اللي ممكن حد يعملها في الوقت ده.
ماعرفش انت شايفني خبرة
وبعدين انا برجع من الشغل مهدود حيلي
يعني النية موجودة.
سكت و تقريبا و الله اعلم كان بيستغفر
لأ انا مش هعيش معاك .
طب اي دليلك على الكلام اللي بتقوليه ده
حلمت انك كنت بتكلم بنت في التليفون و بتقولها ايوة يا سيد.
اممم حلم اه
وبعدين قعد يتلفت حوليه
انت بتدور على ايه ادور معاك
كان في كرباج حمير هنا مش عارف راح فين.
انا عايزة غزل بنات يا زين.
مش هتبطلي شغل العيال ده بقا و تكبري الناس بتبص علينا.
سكت و ما اتكلمتش و من بعدها بطلت اتكلم معاه بعفوية بقيت هادية و باردة و ده عكس طبيعتي المرحة
عاملت اكل اي النهاردة و يارب مغامراتك مع الحلل و انت بتحرقي الأكل قصدي و انت بتطبخي تكون سابتك النهاردة تجهزي الغدا
ابتسمت بسخرية و قلت
لأ اطمن الاكل على السفرة ممكن تروح تاكل.
و انت مش هتاكي معايا
معلش
ده الكرتون اللي بتحبيه تعالي نتفرج عليه سوا.
لأ انا هدخل انام تعبت من شغل البيت النهاردة.
يعني هتفرج عليه لوحدي
و ليه تتفرج عليه و انت اصلا مش بتحب الكرتون الكرتون ده للعيال.
قومي يلا هننزل.
اتفزعت و هو بيصحيني من النوم
ننزل فين يا زين انت اتجننت دي الساعة اتنين باليل.
ننزل نتمشى انت مش كان نفسك في كده من زمان.
كنت هفرح لو طلب مني ده من زمان بس ابتسمت بحزن و انا بقوله
اه و انت كنت ترد عليا و تقولي بطلي جنان امته هتكبري.
عشان كنت عبيط ماكنتش فاهم صح.
و اي بقا اللي انت فهمته و طلع صح
ان كل واحد فينا جواه طفل عمره ما بيمو ت حتى لو عجز الطفل بردو موجود جوانا بس مستني الفرصة انه يطلع وانا بقا عايز اطلع الطفل اللي جواك من تاني
بس انت بتشوف ان تصرفاتي دي بتحرجك قدام الناس.
انا جربتك و انت عاقلة و جربتك و انت طفلة لقيت انك و انت عاقلة مملة بس و انت طفلة.. احلى بكتير.
بس ايه اللي غيرك!
عشان الطفل اللي جوانا ده مش بيطلع غير مع الناس اللي احنا بنحبهم و يوم ما الطفل اللي جواك ده يبطل يظهر و انت معايا هعرف انك بطلتي تحبيني.
ابتسمت بفرحة ماعرفتش ارد عليه اقول ايه لقيت نفسي رحت ناحية الدولاب بس هو
سبقني و خرج دريس و قال
البسي ده بتبقي
نزلنا سوى وكنت مبسوطة لأ كنت هطير من الفرحة من زمان كان نفسي انزل بليل و اتمشى بس يكون مع اكتر شخص بحبه كان حلم بالنسبة لي بس هو عرف يحققه.
ها هتقوليلي نفسك في اي غير غزل البنات و لا مش ناوية تكفليني في الخروجة دي.
ضحكت و قلت
لأ ده انت صارف و مكلف بقا
كله يهون عشان خاطر العيون.
الحقني يا زين انا بولد.
اتخض من صوت صريخي اتفزع يا عيني ووقع من على السرير وهو بيقول بسرعة
ايه اعمل ايه اتصل بالدكتور لأ تلقيه نايم الساعة اربعة الفجر طب اجيب امي لأ امي ميتة مايحصش ازعجها في تربتها في وقت زي ده.
بعدين سكت كده شوية وانا هموت و اضحك على منظره
ثانية واحدة انت مش حامل اصلا.
ابتسمت ببراءة
لأ ما هي دي كانت بروفا عشان اشوف هتعمل ايه لما اولد بجد.
لأ اطمني ياروحي انا قطعت الخلف أصلا.
زين
نعم
اي ده انت رديت بسرعة...كده كاريزمتك ضاعت خد بالك
هقفل السكة في وشك خدي بالك
طب زين انت بتحبني
لأ متجوزك شفقة.
انا بتكلم جد.
عارفة كليوباترا
السجاير!
لأ السجاير دي اللي هشربها مخصوص عشان اطفيها انا قصدي الملكة كليوباترا
ايوة مالها
هي وقعت مارك انطونيو في حبها و انت وقعتيني في حبك.
أحب ذلك الشخص الذي يجاريني في طفولتي المتأخرة
تحبي أوصلك
حدوتة_زين
سميه_عبدالسلام
