ربيت ابن اخويا اليتيم حكايات زهرة الربيع
ربيت ابن اخويا اليتيم عندي في البيت وكنت عايز اجوزه بنتي ، بس هو كان بيحب واحده جارتنا بجنون ، وبطريقتي قدرت افرقهم والبنت اتجوزت شاب غيره في نفس عمارتنا ، وكنت فاكر اني قفلت الموضوع ده لحد ما صدمني يوم خطوبته وراحلها شقتها عند جوزها واللي عمله وقتها ميخطرش على بال بشر ولا يصدقه عقل ابدا!!!!!
من بعد ما أخويا الله يرحمه مات هو ومراته في حادثه، وأنا شايل ابنهم الوحيد نادر على كتافي وهو لسه طفل لا حول له ولا قوة. ربيته أحسن تربية، أكلته من لقمة ولادي، وكنت حاطط في بطني بطيخة صيفي اني اكيد هجوزه بنتي سمر ، لان الولد ده ربيته على ايدي وعارف اخلاقه وكمان لان أبوه سايبله تركة وميراث كبير. ، أهو يبقى جوز بنتي في حضني ومطمن عليه وعلى ماله لحد ما أموت.
لكن خاب تملي ومفيش حاجه مشيت زي ما مخطط لها.
نادر كبر وبقى شاب، ودخل الجامعة، وهناك اتعرف على بنت زميلته وجارتنا في العمارة اللي قدامنا اسمها وعد.
البنت كانت كويسة على عينى وعلى رأسي، بس الواد اتعلق بيها لدرجة تفقع المرارة، بقى بيقضي نص يومه عند أهلها وشبه خاطبها وملوش سيره غيرها.
أنا في الأول كنت سايبه على عماه، قلت سيبه يتبسط بفترة الجامعة، بكرة يعقل ويعرف انها متناسبهوش.
لحد اليوم اللي جيه وقالي فيه يا عمي، أنا عايز أخطب وعد رسمي، بحبها ومش هقدر أعيش من غيرها.
طبعاً رفضت رفض قطعي. وقولتله تنسى الكلام ده، أنت هتتجوز بنت عمك، دي اللي من مستواك وبتفهم أصل العيلة.
طبعا نادر اتجنن! لأول مرة أشوفه بيقف قدامي وبيعلي صوته، قعد يقولي أنا بشوف سمر زي اختي! وبحب جارتنا وعايزها هي، مش عايز غيرها!.
ضغطت عليه بكل قوتي، وقولتله لو أخدت الخطوة دي، قسماً بالله ما هتشم قرش واحد من تركة أبوك، وهطردك من البيت!.
ورغم كل ده فضل مصر على رأيه.
وقتها عرفت ان التهديد مش هيجيب نتيجه معاه.
في يوم، استنيته لما راح الشغل، وروحت لأبو البنت دي. دخلت عليه وقعدت معاه، وقلتله كلمتين زي السمّ قولتله اتقي الله في بنتك، وبلاش تشاغل ابن أخويا، الواد خاطب وخطوبته على بنتي الأسبوع الجاي، وكل اللي بيعمله معاها ده تسلية وقت فراغ مش أكتر، عشان عيال، ولما يجي يتجوز هيتجوز بنت عمه اللي من مستواه انتو متناسبهوش وبنتك مجرد لعبه وهو قايلي بلسانه انه بيتسلى معاها وهيتجوز بنتي انا.
أبو البنت اتعصب واتجنن، وحلف لو وزنها دهب ما هيجوزهاله، ومنعها تشوفه نهائي، وخد منها التليفون، وبقى يقفل الباب في وش نادر من غير حتى ما يفهمه إيه اللي جرى.
نادر بقى رايح جاي زي المجنون يخبط على الباب ومحدش يفتحله يحاول يوصلها مش عارف .
بس الي قسم ضهره ان ابوها راح خطبها لواحد تاني في نفس العمارة كان ميت عليها من الأول.
نادر يوم ما عرف بالموضوع اتجنن راح بيت ابوها وبقى يخبط بجنون ويزعق بس محدش فتحله والناس كلها تفرجت عليه. ويوم خطوبتها، أبوها كان ماجر عيال بلطجية وقفوا حرس، ضربوه وطردوه قدام الناس من غير حتى ما يشوفها ولا يلمحها.
رجع البيت يومها حالته تصعب على الكافر. دخل في نوبة اكتئاب عميقة، ومكانش فاهم البنت غدرت بيه كده ليه، ولا إيه اللي اتغير فجأة ، ورغم انه صعب عليا جدا وقتها بس كان لازم اكمل عشان مصلحته هو وبنتي.
الأيام عدت، وكل ما العريس الجديد كان بيعدي من قدام شقتنا رايح جاي على شقة عروسته، ونادر يسمع الهيصة والفرح بودانه، حالته كانت بتسوء أكتر وأكتر. وأنا الصراحة مكنتش برحم؛ كنت بزيد عليه بالكلام عشان يشلها من دماغه، أقوله أهي اللي فضلتها على بنت عمك باعتك، انت مكنتش مالي عينها أصلا.
شويه شويه الواد اتدمر تماماً. دخل في اكتئاب شديد، ساب صلاته، وبقى قاعد محبوس في أوضته طول اليوم، ودقنه طولت وبقى منظره يقرف، وبدأت تطلع عليه ريحة الحشيش والقرف ده، وبقى شبه غريب وسطنا.
لحد ما جه يوم الفرح وعد. في الليلة دي، شرب كتير ولخبط الدنيا وتعب فجأة وجرينا بيه على المستشفى ، وهناك الدكتور لحقه بصعوبه.
وأول ما خلص فرحها ورجعت البيت، فكرت في نفسي وقلت أهو خلاص، البنت اتجوزت وبقت في بيت غيره، مفيش قدامه غير بنتي. دخلت عليه واقترحت عليه نعمل خطوبته على بنتي فوراً.
الواد ساعتها كان زي الطير المذبوح، مفيش فيه طاقة ينطق بكلمة، كان بيوافق على أي حاجة أقولها وخلاص فقالي ..تمام
أنا فرحت، وحسبت إني خلاص حليت المشكله وبكرة بعد الجواز يعقل وينسى.
وجه يوم الخطوبة والناس تجمعت في الصالة، والبيت كان منور، وبنتي لبست الفستان وجهزت .
دخلت على نادر أوضته عشان أناديه ، بس اتفاجأت لما لقيته زي ما هو، قاعد في الظلمة، ريحته تقرف، قاعد على السرير كأنه شبح، لا استحمى، ولا حط نقطة مياه على وشه، ولا حتى لبس البدلة اللي جبناهاله، قاعد بهدومه المبهدلة وشعره المتبهدل ودقنه الطويلة.
زعقت فيه بعصبية يا ابني حرام عليك! الناس بره ملوا الصالة والبنت جاهزة، قوم البس بلا جنان واخلص!.
بص لي بعيون حمرا غرقانة دموع وتعب، وقال بصوت بارد ميت أنا كويس كده... يلا.
ومشي قدامي . أنا كنت بحاول أنادي عليه وأحاول امنعه يخرج بالمنظر ده قدام الناس، بس هو مسمعش مني ولا كأنه سامع صوت. طلع قدام الضيوف اللي كانوا قاعدين في الصالة، والكل سكت مرة واحدة، والناس بقت تبص له بذهول واستغراب من المنظر المرعب اللي طلع بيه.
وقف ثانية واحدة في نص الصالة، مكلمش ولا مخلوق، ولا حتى بص لبنتي اللي كانت واقفة بفستانها مذهولة.
وفجأة طلع بره الشقة كلها وهو بيجري زي المجنون
أنا جريت وراه بكل قوتي عشان أشوفه رايح فين
بس اتجمدت مكاني لما لقيته راح خبط بكل قوته على شقة وعد اللي لسه متجوزة امبارح راحلها شقة جوزها!
واللي عمله وقتها...ميخطرش على بال بشر، ولا يصدقه عقل أبداً!!!!!!
حكايات زهرة الربيع
لو نفسك تشوف الجزء الجديد... أثبت وجودك!
اعمل لايك وسيب كومنت ، وما تنساش تصلي على سيدنا النبي ﷺ.
قصة جامده مستنياك... تابعها من هنا
الجزء الثاني الباب اللي اتفتح بعد ما ضاعت الفرصة
وقفت مكاني وأنا شايف نادر بيخبط على باب شقة وعد بكل قوته.
كان شكله مرعب، شعره منكوش، هدومه متبهدلة، وعينيه حمرا من السهر والبكاء.
أنا جريت وراه وأنا بصرخ
نادر! إنت اتجننت؟! إنت بتعمل إيه هنا؟ ارجع يا ابني!
لكنه ما سمعنيش.
فضل يخبط ويصرخ
وعد! افتحي يا وعد! أنا عارف إنك جوه! أنا لازم أشوفك! خمس دقايق بس!
باب الشقة اتفتح فجأة.
لكن اللي ظهر قدامنا ما كانش وعد.
كان جوزها الجديد، شاب اسمه كريم.
كان لابس تريننج، وشكله واضح إنه لسه صاحي من النوم. بص لنادر من فوق لتحت، وقال باستغراب
إنت مين وعايز إيه؟
نادر قرب منه وقال بصوت مبحوح
أنا نادر... عايز أشوف وعد.
كريم بصلي، وبعدين رجع بص لنادر.
وعد مين؟!
نادر رد بعصبية
مراتك! أنا عايز أشوف وعد!
كريم اتغيرت ملامحه، لكنه ما مدش إيده عليه ولا زقه.
قال بهدوء
إنت جاي تخبط على باب بيتي الساعة دي وتطلب تشوف مراتي؟ إنت واعي بتقول إيه؟
نادر فجأة نزل على ركبته قدامه.
آه والله، نادر اللي طول عمره كان شايف نفسه راجل ومش بيقبل حد يكسر كلمته، نزل على ركبته قدام جوز البنت اللي بيحبها.
وقال بصوت مليان دموع
والنبي يا كريم... أنا مش جاي أعمل مشكلة. أنا بس عايز أسألها سؤال واحد. هي ليه عملت فيا كده؟ أنا عملتلها إيه؟
كريم فضل ساكت.
وفي اللحظة دي ظهرت وعد من وراه.
كانت لابسة إسدال، وشكلها اتغير تمامًا لما شافت نادر.
إيدها راحت على بقها، وعينيها اتمَلَت دموع.
نادر؟!
نادر رفع راسه بسرعة.
وعد!
مد إيده ناحيتها، لكنها رجعت خطوة لورا.
قالت بصوت مرتعش
إنت بتعمل إيه هنا؟!
كنت عارف إنك مش هتقدري تنسيني! كنت عارف إنك مستنية فرصة تشوفيني فيها!
كريم لف ناحيتها باستغراب.
إنتوا تعرفوا بعض؟
وعد ما ردتش.
نادر بدأ يتكلم بسرعة
قولي له يا وعد! قولي له إنك كنتِ بتحبيني! قولي له إننا كنا متفقين نتجوز! قولي له إن أبوكي هو اللي فرق بينا!
كريم بص لوعد.
الكلام ده صحيح؟
وعد نزلت عينيها.
أيوه... كنا بنحب بعض.
حسيت إن قلبي اتقبض.
كريم سكت لحظة، وبعدين قال
طيب، إنتِ ليه ما قلتيليش؟
وعد بدأت تعيط.
كنت خايفة.
نادر اتدخل
خايفة من إيه؟! أنا كنت مستعد أعمل أي حاجة عشانك!
وعد بصتله وقالت
وأنا كنت مستنية منك تعمل حاجة واحدة بس يا نادر.
إيه؟
إنك ما تسيبنيش لوحدي قدام أبويا.
الكلمة دي نزلت عليه زي الصاعقة.
نادر فضل باصصلها، مش فاهم.
قال
أنا؟! أنا اللي سبتك؟ ده أنا كنت كل يوم واقف تحت البيت! كنت بخبط بالساعات! كنت بتبهدل قدام الناس عشان أوصلك!
ردت وهي بتبكي
أنا عارفة. بس إنت كنت بتخبط وتمشي. ما حاولتش مرة تخلي حد كبير يتكلم مع أبويا. ما حاولتش تدخل من باب بيتنا بشكل رسمي. كنت بتقوللي استحملي شوية، ولما أكبر وأخلص الجامعة هاجي أخطبك.
نادر قال
كنت لسه بجهز نفسي!
وأنا كنت خايفة. أبويا كان بيضغط عليا