حسن وهدير (كاملة)
حسن وهدير.. لما الزوج يختار أمه على حساب مراته، والنتيجة كانت صدمة محدش توقعها!
الجزء الأول: أنا مش طالبة غير حقي!
— إنت بجد مصدق نفسك يا حسن؟! مامتك بتتدخل في كل حاجة في البيت! دي بتفتح الباب وتدخل من غير ما تستأذن، وأنا بقيت أخاف أقعد براحتي في بيتي، لأحسن ألاقيها داخلة عليّا فجأة!
حسن بصلي بضيق وقال: — عاوزاني أعمل إيه يعني؟ أمنع أمي إنها تدخل بيتي؟ دي أمي، ومن حقها تيجي في أي وقت تحبه!
بصيتله بكسرة وقلت: — طب وأنا؟ أنا فين من كل ده يا حسن؟ مش من حقي آخد راحتي في بيتي؟ مش من حقي أمشي أمور بيتي بمزاجي وأقرر أنا عايزة أعمل إيه من غير ما أحس إن فيه حد بيراقبني؟
رد بعصبية: — هو إنتِ كل يوم لازم تفتحي الموضوع ده؟! أمي عملتلك إيه لكل ده؟
ضحكت بمرارة وقلت: — عملت إيه؟! إنت بجد بتسألني عملت إيه؟ دي بتحددلي أطبخ إيه، وأنضف إمتى، وأشتري إيه، وأحط إيه فين! حتى لو قررت أغير مكان حاجة في البيت، لازم أسمع محاضرة كاملة عن إني مش بفهم وإنها أدرى مني!
حسن رفع صوته: — عشان هي أكبر منك وعندها خبرة، وعايزة مصلحتنا!
— مصلحتنا ولا مصلحتك إنت بس؟! وبعدين أنا مش ضد أمك، والله العظيم مش ضدها، بس فيه فرق بين إني أحترمها وأقدرها، وبين إنها تبقى هي صاحبة القرار في بيتي!
حسن سكت لحظة، وبعدها قال: — إنتِ مكبرة الموضوع أوي.
بصيتله وأنا حاسة إن كل كلمة بقولها بتضيع على الفاضي.
— أنا ميت مرة أقولك إن البيوت أسرار، وإن مش كل حاجة بتحصل بينا ينفع تتحكي. لكن إنت معندكش مشكلة تحكي لأمك كل كلمة بقولها، وكل مشكلة تحصل بينا، وبعدها ألاقيها بتكلمني بطريقة غريبة، أو تيجي البيت عشان تعلمني الصح من الغلط!
حسن رد بسرعة: — أمي عمرها ما قصدت تضايقك.
— حتى لو مش قصدها، النتيجة إني بقيت مش مرتاحة! أنا بقيت حاسة إني عايشة في بيت مش بيتي!
سكت شوية، وبعدها قلتله: — اعمل اللي يريحك يا حسن، بس من النهارده، طول ما أنا في البيت، هقفل باب أوضتي عليّا لو احتجت خصوصيتي، ومش هفضل طول الوقت مستنية حد يدخل عليّا من غير استئذان.
حسن انفجر في الكلام: — إنتِ إيه يا شيخة؟! نفسي أعرف كل ما تشوفيني رايق لازم تنكدي عليّا! دي بقت عيشة تقصر العمر! إنتِ بتكرهي الواحد يقعد معاكي في مكان واحد!
وبعدها خد مفاتيحه وخرج، ورزع الباب وراه لدرجة إن جسمي كله اتنفض.
وقفت مكاني شوية، مش قادرة أتحرك.
كنت مستنية منه كلمة واحدة تطمني، أو حتى إنه يقول لي إنه فاهم أنا حاسة بإيه.
لكن كالعادة، خرج وهو شايف نفسه المظلوم، وسابني أنا أراجع نفسي وأسألها إذا كنت فعلًا بطلب كتير.
قعدت على طرف السرير، وبصيت حواليا.
الشقة اللي فرشتها معاه قطعة قطعة، واللي كنت بحلم إنها تبقى مملكتي الصغيرة، بقيت بحس فيها إني ضيفة.
حتى الأكل اللي بطبخه، مامت حسن هي اللي بتختار معظمه.
لو عملت أكلة هو بيحبها، تقول لي إنها مش صحية.
ولو عملت أكلة مختلفة، تقول لي إن ابنها مش متعود عليها.
ولو اشتريت حاجة للبيت، لازم تعرف بكام، وليه اشتريتها، وهل كانت ضرورية ولا لأ.
وأنا كنت بسكت.
كنت بقول لنفسي إنها أمه، وإن المفروض أراعي سنها وأحترمها.
لكن مع الوقت، اكتشفت إن سكوتي خلاها تفتكر إن من حقها تقرر عني كل حاجة.
والمشكلة الأكبر كانت حسن نفسه.
كان شايف إن أي اعتراض مني على تصرفات أمه هو اعتراض عليها شخصيًا، وإن من واجبي أتحمل كل حاجة لمجرد إنها أمه.
مع إني عمري ما طلبت منه يبعد عنها، ولا يمنعها تزورنا.
كل اللي طلبته إنها تخبط قبل ما تدخل، وإنه ما يحكيش أسرار بيتنا لحد.
لكن حتى الطلب البسيط ده كان بالنسباله إهانة لأمه.
مسحت دموعي، وقررت إني مش هكلم حد من أهلي.
كنت خايفة الموضوع يكبر، وأبويا يتدخل، وتتحول المشكلة لخناقة بين العيلتين.
لبست ونزلت أتمشى شوية.
رحت قعدت قدام البحر، وبصيت للموج وأنا بحاول أهدّي نفسي.
كنت بسأل نفسي: هو أنا غلطانة عشان عايزة خصوصية؟
هو الجواز معناه إني لازم أتنازل عن حقي في إني أكون مرتاحة في بيتي؟
فضلت قاعدة لحد ما الدنيا بدأت تظلم، وبعدها رجعت.
طلعت على شقتي، وفتحت الباب بالمفتاح.
لكن أول ما دخلت، سمعت صوت رجالة جاي من الصالة.
استغربت، لأني كنت متأكدة إني قفلت الباب وأنا نازلة.
قربت بحذر، ولقيت حسن قاعد مع صاحبه محمد، وبيتكلموا.
محمد كان بيقول: — بص يا حسن، إنت غلطان.
حسن رد بضيق: — إنت كمان هتدخل في الموضوع؟
— أيوه، هدخل، عشان إنت صاحبي ومش عايز أشوف بيتك بيضيع منك بسبب تصرفات ممكن تتصلح.
وقفت عند باب الصالة، من غير ما يحسوا بيا.
محمد كمل: — إنت غلطان لما تدي والدتك مفتاح شقتك وإنت عارف إنها بتدخل في كل حاجة. إنت شوفت إخواتك عاملين إزاي؟ هل والدتك بتقدر تدخل على مرات واحد فيهم من غير استئذان؟ هل بتحدد لهم ياكلوا إيه ويعملوا إيه؟
حسن سكت.
محمد قال: — مراتك من حقها تاخد راحتها في بيتها. مش معقول تفضل طول الوقت خايفة إن والدتك تدخل عليها فجأة. حتى لو والدتك مش قاصدة تضايقها، إنت المفروض تحط حدود واضحة.
حسن قال: — بس دي أمي يا محمد!
رد محمد بهدوء: — محدش قال غير كده. أمك ليها حق الاحترام والتقدير، وليها حق تزورك وتفرح بيك. لكن ده مش معناه إن خصوصية بيتك تبقى ملغية. وبعدين، مش كل مشكلة تحصل بينك وبين مراتك تروح تحكيها لأمك.
حسن رد بسرعة: — أنا بحكيلها عشان أفضفض معاها!
محمد قال: — طب حط نفسك مكان هدير. لو هي كانت بتحكي كل أسرار بيتك لأمها، وكل خناقة تحصل بينكم، وبعدها أمها تدخل تتكلم معاك وتقولك تعمل إيه وما تعملش إيه، كنت هتقبل؟
حسن رد من غير تفكير: — طبعًا لأ! كنت هقول إنها مش أمينة على بيتي!
محمد بصله وقال: — أهو إنت بنفسك جاوبت على السؤال.
حسن سرح شوية، وبعدها قال: — هفكر يا محمد. هفكر، بس سيبني دلوقتي محتاج أكون لوحدي.
محمد قام، وقبل ما يمشي قال: — فكر بسرعة يا حسن. لأن مراتك لو فضلت حاسة إنها مش صاحبة قرار في بيتها، هتوصل لمرحلة مش هتقدر تستحمل فيها أكتر. وساعتها ممكن تطلب الطلاق، وإنت اللي هتخسر.
حسن بصله بصدمة: — طلاق؟!
محمد رد: — أيوه، طلاق. متفتكرش إن أي ست هتفضل مستحملة طول عمرها عشان بس تحافظ على شكل البيت قدام الناس.
محمد خرج من الشقة، وأنا فضلت واقفة مكاني.
لأول مرة من شهور، حسيت إن فيه حد فاهم أنا بمر بإيه.
لكن المفاجأة الحقيقية كانت إن حسن، اللي طول الوقت كان مقتنع إنه صح، بدأ يسمع كلام شخص من بره البيت، بينما أنا كنت بتكلم معاه كل يوم ومش بيوصل له أي حاجة.
رجعت بهدوء ناحية الباب، وقفلت الباب ورايا.
حسن رفع عينه، ولما شافني، اتوتر.
قال: — إنتِ كنتِ فين؟
رديت بهدوء: — كنت بتمشى.
بصلي شوية، وبعدها قال: — إنتِ سمعتي حاجة من اللي اتقال؟
بصيتله وقلت: — سمعت كفاية يا حسن.
وسبته واقف، ودخلت أوضتي.
لكن اللي ما كنتش أعرفه، إن أمه كانت في الوقت ده بتخطط لحاجة أكبر بكتير من مجرد إنها تدخل شقتنا بمفتاح.
كانت عايزة تثبت لحسن إن مراته هي المشكلة، وإنه مهما حاول يصلح العلاقة بينا، لازم يفضل تحت سيطرتها.
وكانت مستعدة تعمل أي حاجة عشان توصل لهدفها.
الجزء الثاني: خطة حماتي
في نفس الليلة، حسن راح لبيت أمه.
كانت قاعدة في الصالة، وأول ما شافته، لاحظت إنه مش على طبيعته.
قالت: — مالك يا حبيب ماما؟ متكدر كده ليه؟
حسن رد: — مفيش يا ماما، شوية مشاكل في البيت.
بصتله باهتمام مصطنع وقالت: — عليّا أنا برضه؟ قول يا حبيبي، وإنت هتلاقي مين أحسن مني تفضفض له؟
حسن اتردد شوية، وبعدها قال: — بصراحة يا ماما، أنا بقيت تعبان من الخناقات اللي بتحصل بيني وبين هدير.
الأم اتظاهرت بالدهشة: — ليه يا حبيبي؟ دي بتتخانق معاك على إيه المرة دي؟
حسن حكى لها عن كلامي، وعن إني طلبت منه إنك ما تدخليش الشقة من غير استئذان، وإننا ما نحكيش تفاصيل حياتنا الخاصة لحد.
الأم سكتت شوية، وبعدها قالت: — يا حبيبي، هو أنا عملت إيه لكل ده؟ ده أنا بدخل عشان أساعدكم، وأشوف ناقصكم إيه، وأخلي البيت ماشي كويس.
حسن قال: — أنا عارف يا ماما، بس هي بتقول إنها مش بتاخد راحتها.
الأم ردت بسرعة: — يعني هي عايزة تمنعني من بيتي؟! هو أنا غريبة عنك يا حسن؟! ده أنا اللي ربيتك وصرفت عليك، وفي الآخر أبقى مش من حقي أدخل أشوف ابني؟!